តារាសម្ដែងចិន Zhao Lusi បានជួបគ្រោះថ្នាក់រហូតបណ្ដាលឱ្យបាត់បង់ឈាមជាច្រើនកំលុងពេលថតរឿង “The Story of Pearl Girl”។

ទើបតែចាក់ផ្សាយនៅដើមខែវិច្ឆិកានេះ ប៉ុន្តែ “The Story of Pearl Girl” ដែលជារឿងភាគបុរាណចុងក្រោយរបស់ Zhao Lusi បានទទួលការគាំទ្រជាខ្លាំង និងបានក្លាយជាភាពយន្តដំបូងប្រចាំឆ្នាំ២០២៤ ដែលអាចទទួលបានពិន្ទុរហូតដល់ ១០ ០០០ លើវេទិកា Youku ក្នុងរយៈពេលត្រឹម ២ថ្ងៃក្រោយចេញផ្សាយ។
បើទោះជាសាច់រឿងចំណុចខ្លះទទួលបានការរិះគន់ថាមិនសូវសមហេតុផល ប៉ុន្តែភាពយន្តនេះបានទទួលការសរសើរជាខ្លាំងសម្រាប់ការសម្ដែងដ៏ប៉ិនប្រសប់ និងយកចិត្តទុកដាក់របស់តួអង្គ។ ជាពិសេសតួឯកស្រី Zhao Lusi គឺបានខិតខំប្រឹងប្រែងយ៉ាងខ្លាំងសម្រាប់ការសម្ដែងតួអង្គនេះ និងត្រូវជួបឧបទ្ទវហេតុដែលបណ្តាលឱ្យនាងបាត់បង់ឈាមជាច្រើនពេលកំពុងថត។



យោងតាមសារព័ត៌មានចិន Sohu ក្នុងឈុតមួយដែលត្រូវសម្ដែងក្រោមទឹក Zhao Lusi នៅតែអាចបង្ហាញទេពកោសល្យសម្ដែងរបស់ខ្លួនយ៉ាងរលូនល្អ ដោយមិនត្រូវការប្រើអ្នកសម្ដែងជំនួសនោះទេ។ ប៉ុន្តែមានពេលមួយ តារាវ័យ ២៥ឆ្នាំរូបនេះត្រូវបាត់បង់ឈាមជាច្រើននៅពេលជើងរបស់នាងមុតប៉ះនឹងរបស់ស្រួចក្រោមទឹក។
ក្រៅពីនេះ សុខភាពរបស់នាងក៏រងផលប៉ះពាល់យ៉ាងធ្ងន់ធ្ងរដោយការត្រាំក្នុងទឹកត្រជាក់យូរពេក។ ក្រោយព័ត៌មាននេះត្រូវបានផ្សព្វផ្សាយ ទស្សនិកជនជាច្រើនបានកោតសរសើរពីការធ្វើការប្រកបដោយវិជ្ជាជីវៈរបស់ Zhao Lusi ខណៈអ្នកខ្លះក៏បានសម្ដែងនូវអារម្មណ៍សោកស្ដាយផងដែរពេលដឹងថានាងមានឧបទ្ទវហេតុធ្ងន់ធ្ងរពេលកំពុងថត។ គួរបញ្ជាក់ថា ភាពយន្តភាគ “The Story of Pearl Girl” ដែលមានសរុប ៤០ភាគ មានសាច់រឿងនិយាយពីដំណើរជីវិតតស៊ូរបស់ក្មេងស្រីអ្នករកគុជខ្យងដ៏វៃឆ្លាតនិងពូកែម្នាក់ ហើយភាពយន្តនេះដែរក៏ជាការវិលត្រលប់មកចាប់ដៃគូគ្នាជាលើកទី២ របស់ Zhao Lusi និងតួឯកប្រុសរបស់នាងក្នុងរឿង “The Long Ballad” គឺតារាសម្ដែង Liu Yu Ning។ ភាពស៊ីសង្វាក់ និង Chemistry ដ៏ស័ក្ដិសមរបស់អ្នកទាំងពីរបានធ្វើរឿងនេះទទួលបានការសរសើរច្រើនក្នុងចំណោមទស្សនិកជននិយមទស្សនារឿងភាគចិន ៕





























Account
Security
Favourite Content