ក្រុមហ៊ុន Cambodia International Models (CIM) ថ្មីៗនេះបានប្រកាសតែងតាំង លោក ធា សុខតុលា ជា Mister National Universe Cambodia 2024 ជា title កម្មវិធីថ្មីសន្លាងដែល CIM ទើបទិញសិទ្ធិបានក្នុងឆ្នាំ ២០២៤ នេះ។
ក្រោយប្រកាសតែងតាំងជា Mister National Universe Cambodia 2024 បុរសឯករូបសង្ហា ធា សុខតុលា មានភារកិច្ចតំណាងប្រទេសកម្ពុជាទៅចូលរួមប្រកួតកម្មវិធី Mister National Universe លើកទី៦ នៅប្រទេសថៃ អំឡុងខែមិថុនា ឆ្នាំ ២០២៤ ខាងមុខនេះ។



នៅចំពោះមុខទស្សនិកជនជាច្រើនក្នុងថ្ងៃប្រកាសតែងតាំងតំណែងថ្មី តុលា បានបង្ហាញអារម្មណ៍រំភើបដែលមានឱកាសតំណាងកម្ពុជាលើឆាកអន្តរជាតិជាថ្មីម្តងទៀត បន្ទាប់ពីលោកបានចូលរួមប្រកួតកម្មវិធី Mister International 2023 នៅប្រទេសហ្វីលីពីន កាលពីចុងឆ្នាំ ២០២៣ កន្លងទៅ។
បុរសឯករូបសង្ហានេះប្តេជ្ញាប្រឹងប្រែងបញ្ចេញឱ្យអស់ពីសមត្ថភាព ដើម្បីបង្ហាញឱ្យវេទិកាអន្តរជាតិឃើញពីរូបរាងកាយមាំមួនរបស់បុរសកម្ពុជា ក៏ដូចជាភាពរួសរាយរាក់ទាក់ និងស្នាមញញឹមដ៏ផ្អែមល្អែមរបស់បុរសកម្ពុជាផងដែរ។ អ្វីដែលមិនអាចភ្លេចបាន គឺលោកនឹងពាំនាំវប្បធម៌ដ៏រស់រវើករបស់ខ្មែរយើងទៅបង្ហាញលើឆាកអន្តរជាតិ ប៉ុន្តែសុំមិនទាន់លម្អិតឱ្យដឹងពេលនេះឡើយ។





គួររំឮកផងដែរថា នេះជាលើកទី២ដែលកំលោះសង្ហា ធា សុខតុលា ក្លាយជាបេក្ខភាពតំណាងប្រទេសកម្ពុជាទៅចូលរួមប្រកួតកម្មវិធីអន្តរជាតិ។ តួយ៉ាង កាលពីចុងឆ្នាំ ២០២៣ លោកបានតំណាងកម្ពុជាចូលរួមប្រកួតកម្មវិធី Mister International 2023 នៅប្រទេសហ្វីលីពីន ហើយជាលទ្ធផលលោកបានឈ្នះពានឈុតតំណាងជាតិស្អាតជាងគេ លំដាប់រងទី២។
Mister National Universe Cambodia 2024 សង្ឃឹមថា ពុកម៉ែបងប្អូន និងអ្នកនិយមតាមដានវិស័យ beauty pageant នៅកម្ពុជាទាំងអស់ នឹងបន្តគាំទ្រលោកសម្រាប់ដំណើរឆ្ពោះទៅការប្រកួតអន្តរជាតិនៅប្រទេសថៃ នាងពេលឆាប់ៗនេះ៕



























Account
Security
Favourite Content