បើទោះជាតារាខេប៉ុបជាច្រើនទទួលបានការស្រឡាញ់គាំទ្រពីមហាជនក៏ដោយ ប៉ុន្ដែពួកគេមិនមែនជួបតែរឿងសប្បាយរីករាយឡើយ។ ពីក្រោយស្នាមញញឹមរបស់ពួកគេពេលខ្លះក៏ជួបបញ្ហាស្ត្រេសរហូតអ្នកខ្លះចង់ចាកចេញពីសិល្បៈថែមទៀត។
ថ្មីៗ នេះ Solar សមាជិករបស់ចម្រៀង Mamamoo បានទម្លាយពីរឿងដែលធ្វើឱ្យរូបនាងមានសម្ពាធផ្លូវចិត្តខ្លាំង និងមានអារម្មណ៍ពិបាកផ្គាប់ចិត្តដល់អ្នកជុំវីញ ដោយបានលើកឡើងថា បញ្ហារក្សារូបរាងឱ្យបានស្រស់ស្អាតជារឿងលំបាកខ្លាំងបំផុត។ នេះបើយោងតាមប្រភពព័ត៌មាន Kpophit។


នាងបន្ដថា នៅពេលដែលនាងឡើងគីឡូ ក៏ត្រូវបានមហាជនរិះគន់ព្រាតរឿងរូបរាងធំមិនស្អាតជាដើម។ ប៉ុន្ដែនៅពេលដែលនាងស្គមតូច ក៏រិះគន់ទៀតរឿងស្គមពេក មិនស្អាត មិនទាក់ទាញ។ ជាក់ស្ដែង មិនថារូបរាងនាងប្រែជាស្គម ឬធាត់ គឺតែងត្រូវគេរិះគន់ជាហូរហែរ។
នាងបានបន្ថែមថា៖ “វាពិតជារឿងពិបាកមួយក្នុងការថែរក្សារូបរាង ព្រោះមនុស្សតែងរិះគន់មិនឈប់ធ្វើយ៉ាងណាក៏មិនត្រូវចិត្ដ។ វាពិតជាវេទនាខ្លាំង តើនាងមិនអាចសូម្បីតែឡើងគីឡូ ឬស្រកគីឡូ?”


ហើយនាងមិនមែនជាមនុស្សតែម្នាក់ដែលជួបរឿងនេះទេ តារាខេប៉ុបជាច្រើនសុទ្ធតែជួបបញ្ហានេះ ប្រសិនបើអ្នកមិនចេះធ្វើចិត្តច្បាស់ជាមានបញ្ហាផ្លូវចិត្តមិនខាន។ ទោះជាអ្នកប្រឹងប្រែងយ៉ាងណា ក៏អ្នកនៅតែមានមនុស្សម្នាក់ស្អប់ និងបញ្ចេញមតិអាក្រក់ដាក់ដែរ។
គួររំឮកដែរថា ប្រទេសកូរ៉េខាងត្បូងត្រូវបានគេរាយការណ៍ថា ជាប្រទេសមួយដែលផ្ដោតលើសម្រស់ខ្លាំង ដូច្នេះមិនថាតារាសម្ដែង ឬតារាចម្រៀងតែងទទួលបានការរិះគន់ខ្លាំងនៅពេលដែលសម្រស់របស់ពួកគេប្រែប្រួលចុះស្គម និងឡើងធាត់ខុសធម្មតា។ ជាហេតុធ្វើឱ្យតារាជាច្រើនមានសម្ពាធ និងផ្ដោតលើការថែរូបរាងខ្លាំង៕

























Account
Security
Favourite Content