កាលពីថ្ងៃទី ១០ ខែ វិច្ឆិកា ឆ្នាំ ២០២៣ ភាពយន្ដខ្នាតធំរបស់ Marvel Studio រឿង “The Marvels” បានចាក់បញ្ចាំងជាផ្លូវការនៅសហរដ្ឋអាមេរិក និងបណ្ដាប្រទេសនានាជុំវិញពិភពលោក។ រឿងនេះមានការចូលរួមសម្ដែងពីតារាល្បីៗ ដូចជា Brie Larson. Iman Vellani, Sameul L.Jackson, Park SeoJoon និងផ្សេងៗ ទៀត។

មែនទែនទៅ បន្ទាប់ពីចាក់ផ្សាយជាផ្លូវការរឿងនេះក៏បានក្លាយជាប្រធានបទត្រូវគេវែកញែកពាសពេញបណ្ដាញសង្គម។ មួយក្នុងចំណោមនោះគឺការលេចមុខរបស់តារាប្រុសកូរ៉េ Park SeoJoon មានត្រឹមរយៈពេល ២ នាទី ៤៧ វិនាទីប៉ុណ្ណោះ ដោយគ្រប់គ្នារំពឹងទុកថាលោកជាតួអង្គសំខាន់ម្នាក់ក្នុងភាពយន្ដ The Marvels។

ក្រៅពីចំណុចខាងលើ ភាពយន្ដរបស់ Marvel មួយនេះហាក់មិនសូវរកបានប្រាក់ចំណូលខ្ពស់ដូចការរំពឹងទុកឡើយ ជាពិសេសបើប្រៀបធៀបនឹងភាពជោគជ័យរបស់សែស្រឡាយរឿងនេះកាលពីវគ្គមួយគឺអាចរកបានចំណូលច្រើនជាង ១,១ ពាន់លានដុល្លារអាមេរិក។ “The Marvels” ត្រូវបានគេរំពឹងថា អាចរកបានប្រាក់ចំណូលចន្លោះពី ៧០ ទៅ ៧៥ លានដុល្លារអាមេរិកនៅពេលចាក់ផ្សាយសប្ដាហ៍ដំបូងនៅសហរដ្ឋអាមេរិក និងកាណាដា តែជាក់ស្ដែងភាពយន្ដនេះអាចរកបានត្រឹម ៤៦ លានដុល្លារអាមេរិកប៉ុណ្ណោះ ខណៈប្រាក់ចំណូលសរុបទូទាំងពិភពលោកអាចរកបានត្រឹមជាង ១១១ លានដុល្លារអាមេរិក។ ដើមឡើយរឿងដែលអាចរកចំណូលទាបបំផុតនៅសប្ដាហ៍ដំបូងរបស់ Marvel គឺ “The Incredible Hulk” រកបាន ៥៥,៤ លានដុល្លារអាមេរិកនៅឆ្នាំ ២០០៨ និង “Ant-Man” រកបាន ៥៧,២ លានដុល្លារអាមេរិក ក្នុងឆ្នាំ ២០១៥។

គួរបញ្ជាក់ថា យោងតាមប្រភពព័ត៌មាន Forbes បានឲ្យដឹងថា “The Marvels” ជាភាពយន្ដមួយដែលចំណាយដើមទុនអស់ច្រើនរហូតដល់ ២០០ ទៅ ២៧០ លានដុល្លារអាមេរិក ខណៈបច្ចុប្បន្នប្រាក់ចំណូលដែលរកបានមិនទាន់អាចស្រង់ដើមបាននៅឡើយនោះទេ។ មហាជនជាច្រើនជឿថា រឿងមួយនេះប្រឈមមុខនឹងការខាតដើមក្រោយមិនសូវមានអ្នកទៅទស្សនា និងការរិះគន់ពាសពេញបណ្ដាញសង្គម ៕























Account
Security
Favourite Content