មិនខ្លាចខាតបង់ តារាប្រុសស្រីប៉ុន្មានដួងនេះសម្រេចផ្អាកធ្វើកម្មវិធីបែបកម្សាន្តសប្បាយ Entertainment ខណៈកម្ពុជាកំពុងជួបទុក្ខត្រូវកងទ័ពថៃបើកការបាញ់ប្រហារលើពលរដ្ឋស្លូតត្រង់កម្ពុជាបណ្ដាលឱ្យស្លាប់ និងរងរបួសច្រើននាក់។


ដូចដែលមហាជនបានជ្រាប នាល្ងាចថ្ងៃទី ១២ ខែ វិច្ឆិកា ឆ្នាំ ២០២៥ ទាហានថៃបានបើកការបាញ់ប្រហារលើពលរដ្ឋស៊ីវិលស្លូតត្រង់ស្ថិតក្នុងភូមិ ព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ខណៈពួកគាត់កំពុងស្នាក់នៅក្នុងជម្រកកៅស៊ូតង់ក្នុងដែនអធិបតេយ្យភាព នៃព្រះរាជាណាចក្រកម្ពុជា បណ្ដាលឱ្យស្លាប់ ១នាក់ និងរងរបួសធ្ងន់ស្រាល ៣ នាក់។
ដំណឹងនេះបានធ្វើឱ្យពលរដ្ឋកម្ពុជាទាំងក្នុងនិងក្រៅស្រុកឈឺចាប់និងទង្វើព្រៃផ្សៃរបស់ចោរសៀមមកលើពលរដ្ឋស៊ីវិលកម្ពុជាដែលពួកគាត់សុទ្ធសឹងជាជនស្លូតត្រង់ និងពុំមានអាវុធក្នុងដៃ។ ដោយឡែកបណ្ដាតារាប្រុសស្រីច្រើនរូបក្នុងប្រទេសកម្ពុជាបាននាំគ្នាចេញវីដេអូ និងសារព្រោងព្រាតលើបណ្ដាញសង្គមរៀបរាប់អំពើយង់ឃ្នង អមនុស្សធម៌របស់ទាហានថៃមកលើប្រជាជនកម្ពុជា ព្រមទាំងទាមទារឱ្យមានដំណោះស្រាយដ៏សមសម្របមួយ ដើម្បីទាមទារយុត្តិធម៌ជូនជនស៊ីវិលដែលបានស្លាប់រងបួសក្រោមគ្រាប់កាំភ្លើងរបស់ទាហានថៃ។


ជាមួយគ្នានេះបណ្ដាតារាចម្រៀង តារាបង្ហាញម៉ូត និងតារាចម្រៀងរ៉េបទាំងនេះក៏បានបង្ហោះសារទាំងយប់ភ្លាមៗសុំពន្យារពេលរៀបចំកម្មវិធីជួបជុំ ខនស៊ឺត និងការទម្លាក់បទចម្រៀង ដោយសារតែស្ថានភាពនាពេលនេះគឺមិនសក្ដិសមទាល់តែសោះនៅក្នុងការបញ្ចេញសកម្មភាពទាំងអស់នេះ ក្នុងនោះមានតារាចម្រៀង ទេព បូព្រឹក្ស, តារាបង្ហាញម៉ូត ដេវីត អ៊ឺងហាវ , តារារ៉េប Emi-អ៊ីមី និង Ranngo។


យប់មិញនេះ អ្នកនាង ទេព បូព្រឹក្ស និងស្វាមី ជី ដេវីត បានចេញវីដេអូសុំទោសដល់អ្នកគាំទ្ររបស់ពួកគេដោយវេរប្រាក់ទាំងអស់ជូនអ្នកបានជាវសំបុត្រចូលរួម TBP Fan Party ដែលគ្រោងធ្វើនាថ្ងៃទី ២៣ វិច្ឆិកា ២០២៥ ហើយរ៉ាប់រងការខាតបង់ផ្សេងៗដោយខ្លួនឯង។
មួយវិញទៀត ដេវីត អ៊ឺងហាវ ដែលជាតារាបង្ហាញម៉ូតស្រកក្រោយដ៏មានឥទ្ធិពល១រូបក៏បានចេញសេចក្ដីប្រកាសពន្យារពេលកម្មវិធី Listening Party ដែលបានកំណត់ធ្វើនៅថ្ងៃទី ១៦ ខាងមុខនេះ ដោយសារតែមានផ្ទុះហេតុការណ៍នៅតំបន់ព្រំដែនហើយលោក និងក្រុមការងារយល់ថាពេលវេលានេះមិនសមរម្យក្នុងការរៀបចំកម្មវិធីនេះឡើយ។
រីឯតារារ៉េប Emi-អ៊ីមី និង Ranngo បានបង្ហោះសារខ្លីតែខ្លឹមយ៉ាងដូច្នេះថា៖ «ដោយសារប្រទេសជាតិកំពុងមានបញ្ហា ខ្ញុំបាទនិង Ranngo សុំលើកថ្ងៃផុសបទចម្រៀងនេះវិញ» លោកបានបញ្ជាក់ក្នុងខមិនបន្ថែមទៀតថា៖ «តាមដានស្ថានការណ៍ជាតិយើងទាំងអស់គ្នា»៕
រូបភាព ៖ Tep Boprek, David Eung Hao, Emi























Account
Security
Favourite Content