ចាប់តាំងពីបង្ហាញមុខក្នុងរឿងភាគ “The Glory” ភាពល្បីល្បាញរបស់តារាស្រី Song HyeKyo កាន់តែកើនឡើងមួយលំដាប់ថែមទៀត ជាពិសេសធ្វើឲ្យនាងនៅតែបន្ដគ្រងតំណែងជាតារាសម្ដែងស្រីកូរ៉េដ៏លេចធ្លោអស្ចារ្យម្នាក់។
បន្ទាប់ពីទទួលជោគជ័យខ្លាំងក្នុងរឿង “The Glory” តារាស្រីរូបនេះក៏បង្ហាញខ្លួនជាហូរហែក្នុងកម្មវិធីលំដាប់ពិភពលោក និងមមាញឹកក្នុងការងារយ៉ាងខ្លាំង។ ថ្មីៗនេះ តារាស្រី Song HyeKyo បានថតដាក់ក្របទស្សនាវដ្ដី ELLE សម្រាប់ខែកញ្ញា ឆ្នាំ ២០២៤ ខាងមុខ។ ក្នុងនោះនាងក៏បាននិយាយពីអារម្មណ៍ទាក់ទងការងារ និងប្រភេទបុរសដែលនាងចូលចិត្ដផងដែរ។



តារាស្រីវ័យ ៤២ ឆ្នាំរូបនេះ បានលើកឡើងថា បន្ទាប់ពីជ្រើសសម្ដែងក្នុងរឿង “The Glory” រួចមក នាងចាប់អារម្មណ៍ចំពោះរឿងប្រភេទបែបនេះ។ ជាពិសេស នាងមិនចង់វិលត្រឡប់ទៅសម្ដែងរឿងបែបមនោសញ្ចេតនាកម្សត់ ឬរឿងស្នេហាបែបផ្អែមល្ហែមទៀតឡើយ។ នាងចង់សាកល្បងអ្វីដែលថ្មី និងមិនធ្លាប់ធ្វើពីមុន នាងមានជំនឿលើខ្លួនឯង អាចមានសមត្ថភាពធ្វើបានច្រើនលើសពីនេះ។
ក្នុងបទសម្ភាសន៍របស់ទស្សនាវដ្តីនោះ Song HyeKyo ក៏បានត្រូវគេចោទសួរពីប្រភេទមនុស្សប្រុសដែលនាងពេញចិត្ដ។ ជាការឆ្លើយតបតួឯកស្រីរឿង «បំណុលផ្ទះ ជំពាក់ស្នេហ៍» បានលើកឡើងថា នាងស្រឡាញ់ពេញចិត្ដមនុស្សដែលអាចធ្វើឲ្យនាងសប្បាយចិត្ដ ដោយគ្រាន់តែបាននិយាយជាមួយគេ។ នាងពិតជាមានអារម្មណ៍រីករាយចំពោះមនុស្សដែលនៅជុំវិញលើកទឹកចិត្ដនាង។ ជីវិតមិនមែនជួបតែរឿងសប្បាយនោះទេ ដូច្នេះនាងព្យាយាមក្លាយជាមនុស្សចាស់ទុំល្អម្នាក់។



ក្រៅពីនោះ តួឯកស្រី «Descendants of the Sun» ក៏បានរំឭកដល់អាជីពសិល្បៈ ដោយនាងនឹងបន្ដប្រឹងប្រែងធ្វើយ៉ាងណាឲ្យបានល្អ មិនឲ្យទស្សនិកជនអស់សង្ឃឹមលើនាង។ តារាស្រីរូបនេះនឹងទទួលយកការរិះគន់ កែតម្រូវរាល់កំហុសឆ្គងនានាផងដែរ។
គួរបញ្ជាក់ថា Song HyeKyo ឬប្រជាជនខ្មែរភាគច្រើនហៅថា ហាន់ ជីអ៊ុន ជាតារាសម្ដែងស្រីជើងចាស់ម្នាក់ក្នុងវិស័យសិល្បៈកូរ៉េខាងត្បូង។ នាងបានចាប់ផ្ដើមសម្ដែងតាំងពីឆ្នាំ ១៩៩៦។ រហូតដល់ឆ្នាំ ២០១៧ ក៏សម្រេចចិត្ដរៀបមង្គលការ សាងគ្រួសារជាមួយតារាសម្ដែងប្រុស Song JoongKi តែចំណងអាពាហ៍ពិពាហ៍របស់អ្នកទាំងពីរមិនបានយូរឡើយ និងសម្រេចលែងលះគ្នាវិញក្នុងឆ្នាំ ២០១៩៕























Account
Security
Favourite Content