ប្រធានបទបវរកញ្ញានៅកម្ពុជានៅតែត្រូវបានលើកឡើងមកពិភាក្សា ហើយក៏មិនទាន់មានភាពស្ងប់ស្ងាត់ឡើយ ក្រោយកម្មវិធី Miss Universe Cambodia 2025 ទើបតែបញ្ចប់។ អ្វីដែលធ្វើឲ្យអ្នកគាំទ្រកម្មវិធី Miss Universe Cambodia ឆេះឆួលអារម្មណ៍ ពេលឃើញរូបភាព សៃហ្វុន លំដាប់រងទី១ Miss Universe Cambodia 2023 ឈរថត និងអបអរសាទរដល់ម្ចាស់មកុដ Miss Universe Cambodia 2025។ ក្រោយមក រូបភាព សៃហ្វុន ជាមួយម្ចាស់មកុដ Miss Universe Cambodia 2024 ក៏បានលេចឡើងម្ដងទៀត ផ្គុំគ្នាជាមួយ ហ្វីយ៉ាតា ជយលាភីថ្មីថ្មោង។


សៃហ្វុន បានមកគាំទ្រដល់បេក្ខភាពទាំងអស់នៃ Miss Universe Cambodia 2025 ហើយកញ្ញាក៏បានអបអរដល់ម្ចាស់ជយលាភីផងដែរ ហើយកាលពីឆ្នាំមុន សៃហ្វុន ក៏បានមកទស្សនាការប្រកាសម្ចាស់មកុដ Miss Universe Cambodia 2024 ដែរ។ ២ ឆ្នាំមកនេះបវរកញ្ញាកម្ពស់ ១.៧៧ ម៉ែត្រ រូបនេះបានមក ទស្សនា និងបានថតរូបជុំគ្នាជាមួយម្ចាស់មកុដ Miss Universe Cambodia ធ្វើឲ្យអ្នកគាំទ្រ លើកឡើងថា តើពេលណាបានកញ្ញាវិលមករកឆាកប្រកួតម្ដងទៀត។
អ្នកគាំទ្រនៅក្នុងវិស័យបវរកញ្ញាលើកឡើងពីអត្តចរិតថ្លៃថ្នូររបស់ សៃហ្វុន ហើយក៏បានពោលសរសើរថានាង គឺជាបវរកញ្ញាដែលចេះអបអរដល់អ្នកដទៃ ពេលឃើញគេទទួលបានផ្លែផ្កា។ មិនតែប៉ុណ្ណោះ ឆ្នាំដែល ចន សុទីម៉ា ត្រូវចេញទៅប្រកួត នាងក៏បានទៅចូលរួមជូនដំណើរ ព្រមទាំងផ្ដល់កម្លាំងចិត្តពីចម្ងាយទៀត។ ចិត្តបរិសុទ្ធបែបនេះហើយ ទើបធ្វើឲ្យកញ្ញានៅតែជាជម្រើសឈានមុខ ក្នុងកែវភ្នែកអ្នកគាំទ្ររបស់នាង និងអ្នកគាំទ្រវិស័យបវរកញ្ញាកម្ពុជា។


សៃហ្វុន ធ្លាប់បានលើកឡើងកាលឆ្នាំប្រកួត Miss Universe Cambodia 2023 ថា នោះជាវេទិកាចុងក្រោយរបស់នាងហើយ។ ដូចនេះតើកញ្ញានឹងធ្វើដូចការលើកឡើងគ្រានោះ ឬក៏វិលត្រឡប់មកកាន់ឆាកបវរកញ្ញាណាមួយទៀត តាមការចង់បានរបស់អ្នកគាំទ្រ ឬយ៉ាងណា។
រឭកឡើងវិញកាលពី ២ ឆ្នាំមុន កញ្ញា សៃហ្វុន ជាបវរកញ្ញាកែភេទដំបូងគេរបស់ប្រទេសកម្ពុជា ដែលបានដាក់ពាក្យចូលរួមប្រកួតកម្មវិធី Miss Universe Cambodia បន្ទាប់ពីស្ថាប័ន Miss Universe បើកឱកាសឲ្យស្ត្រីកែភេទអាចដាក់ពាក្យប្រកួតបានដូចស្ត្រីទូទៅ ដោយពួកគេត្រូវកាន់អត្តសញ្ញាណប័ណ្ណ និងលិខិតឆ្លងដែនរបស់មនុស្សស្ត្រី៕






រូបភាព៖ SaiFhon និង AB Studio























Account
Security
Favourite Content