បើមើលពីសម្បកក្រៅ Rosé ហាក់ដូចជាមនុស្សស្រីម្នាក់មានភាពរឹងមាំ និងចូលចិត្តភាពរីករាយ ប៉ុន្តែជាក់ស្ដែងនាងគឺជាមនុស្សដែលគិតច្រើន បណ្ដាលឱ្យមានភាពស្មុគស្មាញ ថែមទាំងធ្លាប់មានជំងឺបាក់ទឹកចិត្តផងដែរ។ កាលពីថ្ងៃទី៥ ខែធ្នូ ម្ចាស់បទ APT រូបនេះបានបង្ហាញខ្លួននៅក្នុងកម្មវិធី Zip Daesung លើឆាណែលយូធូបផ្ទាល់ Daesung សមាជិក BIGBANG ដោយបានបើកបង្ហាញពីបទពិសោធន៍ជីវិតរបស់នាងមួយចំនួន និងការជួបប្រទះជំងឺបាក់ទឹកចិត្តផងដែរ។

នៅក្នុងវីដេអូនាងបានសារភាពថា ក្រៅពីការងារនាងមិនមានចំណូលចិត្តអ្វីផ្សេងនោះទេ ហើយនាងនឹងមានអារម្មណ៍ពេញលេញនៅពេលដែលបានសម្រេចបានការងារអ្វីមួយ។ ហេតុនេះហើយទើបពេលឈប់សម្រាក នាងមិនមានចំណូលចិត្តធ្វើរឿងផ្សេង។
Rosé បានបន្ដឱ្យដឹងថា “ខ្ញុំជាមនុស្សញៀននឹងការងារ ដូចនេះហើយខ្ញុំធ្វើការមិនឈប់មិនឈរសោះ ព្រោះវាមិនទាន់ដល់ចំណុចកំពូលនៃការអស់កម្លាំងនៅឡើយទេ។ តែបញ្ហានៅត្រង់ ពេលខ្ញុំនៅតែបន្តធ្វើការទៀត ខួរក្បាលរបស់ខ្ញុំចាប់ផ្ដើមមានអារម្មណ៍ដូចលែងដំណើរការ។ ខ្ញុំបារម្ភថា បើខ្ញុំបន្តធ្វើការខុសផ្លូវបែបនោះទៀត ខ្ញុំប្រហែលជាមិនអាចបន្តការងារដែលខ្ញុំស្រលាញ់ទៀតទេ“។

យ៉ាងណាមិញ Rosé នៅតែដាស់តឿនខ្លួនឯងឱ្យមានភាពប្រុងប្រយ័ត្នជាមួយនឹងការធ្វើអ្វីមួយជានិច្ច ព្រោះចុងបញ្ចប់មានតែនាងខ្លួនឯងប៉ុណ្ណោះដែលជាអ្នកទទួលខុសត្រូវលើរឿងគ្រប់យ៉ាង ដូច្នេះទើបនាងឆ្លៀតពេលខ្លះសម្រាកពេញមួយថ្ងៃ មើលថ្ងៃលិចដ៏ស្រស់ស្អាត និងទៅភោជនីយដ្ឋាន pasta ដ៏ល្បីមួយកន្លែង ដោយវាជាលើកដំបូងក្នុងជីវិតហើយដែលនាងមានអារម្មណ៍បែបនេះ។
ជាមួយគ្នានោះ Rosé ក៏បានចែករំលែកពីការរស់នៅក្នុងជីវិតថ្មីមួយបែបទៀត។ ដោយកាលពីមុននាងមានកិច្ចការជាច្រើនត្រូវធ្វើ មើលទៅហាក់ដូចជាការសាងរនាំងមួយដ៏ធំដែលខណ្ឌចែករវាងនាងខ្លួនឯង និងមជ្ឈដ្ឋានខាងក្រៅ។ នាងធ្លាប់ថាបានប្រសិនបើជញ្ជាំងទាំងនោះរលំ នាងមិនអាចធ្វើអ្វីបានឡើយ។ ប៉ុន្តែបន្ទាប់ពីសម្រាកមក នាងមានអារម្មណ៍ខ្លួនឯងមានសមត្ថភាពធ្វើរឿងជាច្រើនដែលនាងបានធ្វេសប្រហែសមិនបានធ្វើកាលពីមុន។


កាន់តែគួរឱ្យចាប់អារម្មណ៍ជាងនេះទៅទៀត Rosé បានទម្លាយជាលើកទីមួយគឺ ដោយសារតែនាងស្រ្តេសខ្លាំងពេក បានធ្វើឱ្យរាងកាយរបស់នាងបញ្ចេញសញ្ញាមិនប្រក្រតីដូចជាឡើងរោល ឬប្រតិកម្មស្បែកកម្រិតខ្លាំង។ លើសពីនេះ នាងក៏ទទួលស្គាល់ថាខ្លួនឯងមានជំងឺបាក់ទឹកចិត្តអំឡុងពេលនោះ ដោយគិតថាវាដូចជាជំងឺផ្ដាសាយដែលអ្នកណាក៏អាចជួបប្រទះដែរ។ មូលហេតុដែលនាំឱ្យមានអារម្មណ៍ស្រ្តេសខ្លាំងបែប គឺមកពីនាងតែងតែគិតថាបើសិនជាថ្ងៃណាមួយមិនមានអ្នកខ្វល់ពី BLACKPINK ទៀត តើនាងនឹងត្រូវធ្វើយ៉ាងណាក្នុងជីវិត? នាងចាប់ផ្ដើមមានអារម្មណ៍ថាអាចនឹងក្លាយជាមនុស្សម្នាក់ដែលបាត់បង់ការងារទាំងវ័យក្មេងថែមទៀតផង។
ក្រោយពីអ្នកគាំទ្របានទស្សនាវគ្គមួយនេះក្នុងកម្មវិធី Zip Daesung ហើយ ពួកគេក៏បាននាំគ្នាសន្និដ្ឋានបានមួយផ្នែកថា វិបត្តិជាច្រើននៅក្នុងចិត្តរបស់ Rosé ក៏អាចជាចំណែកមួយធ្វើឱ្យការចេញសកម្មភាពជាតារាទោលក្រោយសមាជិកផ្សេងទៀតក្នុងក្រុម BLACKPINK ថែមទាំងបានស្រកទម្ងន់ខ្លាំងផងដែរ។ យ៉ាងណាមិញ BLINK ក៏រីករាយឡើងវិញនៅពេលដែលឃើញ Rosé កាន់តែប្រសើរឡើង មានសាច់មានឈាមឡើងវិញក្រោយបញ្ចេញបទ APT ជាមួយ Brun Mars និងចាប់ផ្ដើមសកម្មភាពជាបន្ដបន្ទាប់៕























Account
Security
Favourite Content