តួសម្ដែងជើងចាស់របស់ TVB តារាប្រុស Roger Kwok បានបង្ហើបពីបំណងប្រាថ្នារបស់ខ្លួនថាចង់សម្រេចបំណងកូនប្រុសបន្ដការសិក្សានៅបរទេស។ បំណងរបស់លោកបានធ្វើឲ្យមហាជនជាច្រើនលើកឡើងថា លោកជាឳពុកដែលមានទំនួលខុសត្រូវម្នាក់។


តារាប្រុស Roger Kwok ជាតារាសម្ដែងដែលប៉ិនប្រសប់ម្នាក់ និងបង្ហាញខ្លួនក្នុងរឿងភាគជាច្រើន។ ក្រឡេកមើលជីវិតគ្រួសារវិញ លោកបានរៀបការជាមួយភរិយា Cindy Au ក្នុងឆ្នាំ ២០០៦ និងទទួលបានចំណងដៃកូនពីរនាក់គឺប្រុសម្នាក់ ស្រីម្នាក់។
បច្ចុប្បន្ន កូនប្រុសច្បងរបស់លោកមានអាយុ ១៥ ឆ្នាំហើយ និងជាពេលវេលាមួយដែលគេត្រូវគិតគូពីជំនាញដែលគេចង់សិក្សាដើម្បីអាជីពនាពេលអនាគត។ បើតាមសម្ដីរបស់តារាប្រុស Roger Kwok កូនប្រុសរបស់លោកគឺមានទេពកោសល្យលើការផ្លុំត្រែ ជាពិសេស រូបគេក៏បង្ហាញពីបំណងចង់សិក្សាផ្នែកតន្ដ្រី។ លោកក៏បានអនុញ្ញាតឲ្យកូនប្រុសរបស់លោកទៅសិក្សាបន្ដនៅឯប្រទេសអង់គ្លេសផ្នែកតន្ដ្រី។



លោកបានបន្ដថា៖ វាពិតជារឿងល្អមួយដែលក្មេងជំទង់ទើបមានអាយុ ១៥ ឆ្នាំ មានបំណងប្រាថ្នាច្បាស់លាស់ និងដឹងពីអ្វីដែលគេចង់ធ្វើ។ លោកជឿថា កូនប្រុសរបស់លោកមានឈាមជ័រផ្នែកសិល្បៈបន្ដពីលោក។
លោកបានបន្ថែមថា៖ អ្វីដែលធ្វើឲ្យលោកភ្ញាក់ផ្អើលនោះគឺការរស់នៅប្រទេសអង់គ្លេសគឺចំណាយច្រើន អ្វីៗ ក៏ថ្លៃ។ មែនទែនទៅ ការចំណាយគឺច្រើនជាងលោករំពឹងទុក។ លោកប្រហែលជាត្រូវខិតខំបន្ដ និងរកការងារធ្វើបន្ថែមដើម្បីឲ្យកូនប្រុសរបស់លោកអាចសម្រេចបំណងរបស់គេបាន។ កាលពីមួយរយៈមុន លោក និងតារាប្រុស Kenneth Ma មានឱកាសចូលរួមកម្មវិធីនៅឯបរទេស លោកសង្ឃឹមមានឱកាសការងារជាច្រើនទៀត។


និយាយដល់ការត្រឡប់មកសម្ដែងរឿង លោកបានលើកឡើងថា លោកមិនទាន់ដឹងច្បាស់នៅឡើយពេលណាត្រឡប់មកសម្ដែងវិញ តែលោកនឹងទទួលសម្ដែងប្រសិនបើលោកស្រឡាញ់ពេញចិត្ដជាមួយតួអង្គដែលគេផ្ដល់ឲ្យលោក ៕























Account
Security
Favourite Content