ទំព័រហ្វេសប៊ុកផ្លូវការ Town Film App កាលពីពេលថ្មីៗកន្លងទៅ បានបង្ហោះចែកចាយរូបភាពជាច្រើនសន្លឹក បង្ហាញពីឈុតក្រៅឆាកនៃការថតខ្សែភាពយន្តថ្មីសន្លាងមួយ ជាភាពយន្តខ្នាតធំលើកឡើងអំពីគុនខ្មែរដ៏អស្ចារ្យ នាសម័យឆ្នាំ ១៩២២ បណ្តាលឱ្យប្រិយមិត្តអ្នកប្រើប្រាស់បណ្ដាញសង្គមភ្ញាក់ផ្អើលជាខ្លាំងពេលបានឃើញផ្ទាំងទស្សនីយភាពដ៏ត្រជាក់ភ្នែកមួយនេះ។

កាន់តែភ្ញាក់ផ្អើលខ្លាំងជាងនេះទៀតនោះ គឺវត្តមានបវរកញ្ញាចក្កវាឡកម្ពុជាឆ្នាំ ២០២០ រ៉េត សារីតា ក៏មុខសម្ដែងក្នុងខ្សែភាពយន្តខ្នាតធំនេះផងដែរ។ ប្រាប់ចំពោះមុខអ្នកសារព័ត៌មានសិល្បៈក្នុងស្រុក សារីតា ថា នាងពេញចិត្តសម្ដែងរឿងនេះខ្លាំងណាស់ ទោះបីត្រូវចោលការងារជាច្រើន ដើម្បីថតក៏នាងសុខចិត្ត ព្រោះរឿងនេះបង្ហាញពីភាពអស្ចារ្យនៃគុនខ្មែរ ជាសម្បត្តិដ៏មានតម្លៃរបស់កម្ពុជាយើង។ មួយវិញទៀត នាងខ្លួនឯងក៏ស្រលាញ់វិស័យភាពយន្តខ្លាំង ទើបសុខចិត្តលៃលកពេលវេលាថតភាពយន្តនេះឱ្យខានតែបាន។
មកទល់ពេលនេះ ខ្សែភាពយន្តខ្នាតធំរបស់ Town ថតបានប្រមាណជាង ៥០% ហើយ ដោយប្លង់ភាគច្រើនគឺស្ថិតនៅក្នុងទឹកដីខេត្តសៀមរាប ដូច្នេះសោភារូបស្រស់នេះត្រូវធ្វើដំណើរចុះឡើងដើម្បីថត ជាហេតុធ្វើឱ្យនាងមានភាពមមាញឹកខ្លាំង។ ពិតជាពិសេសខ្លាំងណាស់ ក្នុងរឿងនេះ សារីតា ត្រូវសម្ដែងជាតួអង្គប្រពន្ធរបស់អ្នកប្រដាល់គុនខ្មែរ ធឿន ធារ៉ា ដែលការសម្ដែងជាមួយអ្នកប្រដាល់ល្បីឈ្មោះរូបនេះធ្វើឱ្យ សារីតា ភ្ញាក់ផ្អើល និងស្ងើចសរសើរសមត្ថភាពជាខ្លាំង។

តារាសម្ដែងរូបស្រស់នេះបានពោលសរសើរថា អ្នកប្រដាល់គុនខ្មែរ ធឿន ធារ៉ា ជាមនុស្សរួសរាយរាក់ទាក់ គួរឱ្យស្រលាញ់ គ្រាន់តែពេលលេងជាមួយនាងដៃធ្ងន់បន្តិច ប៉ុន្តែការសម្ដែងរបស់អ្នកទាំងពីរស៊ីមេទ្រីគ្នាល្អ រហូតបវរកញ្ញារាងតូចច្រឡឹងនេះជឿជាក់ថា តាមរយៈស្នាដៃភាពយន្តខ្នាតធំនេះនឹងអាចធ្វើឱ្យពិភពលោកស្គាល់កម្ពុជាយើងកាន់តែច្បាស់ជាងនេះទៅទៀត។
Miss Universe Cambodia 2020 បង្ហើបឱ្យដឹងថា សម្រាប់ឆ្នាំ ២០២៤ នេះ នាងមមាញឹកមែនទែន។ ជាក់ស្ដែង គ្រាន់តែឈានចូលថ្មីនេះភ្លាម កាលវិភាគការងាររបស់នាងត្រូវបានកក់រហូតដល់ខែកក្កដាឯណោះ តែយ៉ាងណាតារាស្រីរូបនេះនៅតែឆ្លៀតពេលថតភាពយន្តឱ្យបានព្រោះវាជាអ្វីដែលនាងស្រលាញ់ចូលចិត្ត៕



























Account
Security
Favourite Content