កម្មវិធីប្រកួតបវរកញ្ញាភេទទីកម្ពុជាឆ្នាំ ២០២៣ (Miss Queen Cambodia 2023) បានរកឃើញម្ចាស់ជយលាភីហើយ បានទៅលើកញ្ញា ម៉ៃយ៉ា ខណៈបេក្ខភាពជើងខ្លាំងម្នាក់ទៀត ជា ដេវីណា ជាប់ជា 1st Runner up Miss Queen Cambodia 2023។
ភាពជោគជ័យរបស់ ម៉ៃយ៉ា ធ្វើឱ្យអ្នកគាំទ្ររបស់ ដេវីណា និងម្ចាស់ហ្វេនផេកមួយចំនួននាំគ្នាសម្តែងការមិនពេញចិត្តជាខ្លាំងលើបណ្តាញសង្គម ព្រោះគ្រប់គ្នាគិតថា ដេវីណា ស្អាត និងមានសមត្ថភាព ស័ក្តិសមទទួលបានតំណែង Miss Queen Cambodia 2023 ជាង ម៉ៃយ៉ា។

ជុំវិញរឿងរ៉ាវដែលកំពុងកើតឡើងយ៉ាងក្តៅគគុកនេះ លោក ម៉ែន និមលរតន៍ នាយកប្រត្តិបត្តិក្រុមហ៊ុន CIM និងជាអ្នកទទួលបន្ទុករៀបចំការប្រកួត Miss Queen Cambodia 2023 បានប្រាប់ឱ្យ ដឹងថា លោកទទួលស្គាល់សមត្ថភាព ភាពខ្លាំង និងរូបសម្រស់ស្រស់សោភារបស់បេក្ខភាពទាំងពីរ គឺ ម៉ៃយ៉ា និង ដេវីណា។ តែការដាក់ពិន្ទុឱ្យបេក្ខភាពមិនមែនមើលតែលើភាពស្រស់ស្អាតផ្នែកខាងក្រៅប៉ុណ្ណោះទេ តែគណៈកម្មការពិនិត្យមើលគ្រប់ជ្រុងជ្រោយយ៉ាងលម្អិតតាំងពីដំណាក់កាលត្រៀមខ្លួន រហូតដល់ការប្រកួតវគ្គផ្ដាច់ព្រ័ត្រ។
រវាង ម៉ៃយ៉ា និង ដេវីណា មានចំណុចខុសគ្នាជាច្រើន ហើយកត្តាដែលធ្វើឱ្យ ម៉ៃយ៉ា ដណ្តើមបានជយលាភីនោះ គឺដោយសារនាងមានលក្ខណៈសម្បត្តិ និងការត្រៀមខ្លួនមកបានល្អជាង ដេវីណា។ ជាក់ស្តែង ម៉ៃយ៉ា ជាបេក្ខភាពម្នាក់ដែលបានចូលរួមការងារសង្គមច្រើន ហើយចេះប្រូម៉ូតខ្លួនឯងលើប្រព័ន្ធអ៊ីនធឺណិតបានល្អទៀត។ មិនតែប៉ុណ្ណោះ អំឡុងពេលប្រកួត ម៉ៃយ៉ា ជាមនុស្សដែលមានសន្តានចិត្ត ចេះយល់ទុក្ខធុរៈបេក្ខភាពរួមប្រកួត និងមានទឹកចិត្តចេះចែករំលែកសម្ភារៈជាមួយបេក្ខភាពផ្សេងៗទៀតផង ដូចជាពេលប្រកួតនាងបានចែករំលែកសម្លៀកបំពាក់ដែលមាន ជាមួយបេក្ខភាពដែលខ្វះខាត។ ចំណុចសំខាន់ជាងនេះ នាងជាមនុស្សចេះសម្របខ្លួនធ្វើការជាក្រុមបានល្អ ដែលនេះសំខាន់ណាស់សម្រាប់បេក្ខភាពត្រូវតំណាងឱ្យកម្ពុជាលើឆាកអន្តរជាតិ ព្រោះទៅប្រកួតនៅឆាកអន្តរជាតិ គឺត្រូវចេះធ្វើការងារជាក្រុម។ ចំណុចតូចៗទាំងនេះហើយដែល គណៈកម្មការ និងបេក្ខភាពរួមប្រកួតមើលឃើញថា ម៉ៃយ៉ា មាន ប៉ុន្តែ ដេវីណា ខ្វះខាត។
លោក ម៉ែន និមលរតន៍ ទទួលស្គាល់ថា ដេវីណា ពិតជាមានរូបសម្រស់ស្រស់ស្អាត ការប្រើប្រាស់ភាសាអង់គ្លេសក៏ល្អប្រសើរជា ម៉ៃយ៉ា តែព្រោះនៅមានចំណុចខ្វះខាតខាងលើ ទើបនាងឆក់មិនបានតំណែងជយលាភី Miss Queen Cambodia 2023។ ទោះជាយ៉ាងនេះក្តី ក៏នាងនៅតែជាបេក្ខភាពពោរពេញដោយថាមពលម្នាក់ ហើយក្រុមហ៊ុនក៏កំពុងសំឡឹងមើលកម្មវិធីដែលស័ក្តិសមសម្រាប់នាងចេញទៅប្រកួតផងដែរ។ លោកថែមទាំងជឿជាក់ថា ប្រសិន ដេវីណា ទៅប្រកួតនៅអន្តរជាតិមែន នាងនឹងអាចចូលដល់វគ្គ Top ចុងក្រោយទៀតផង។
នាយកប្រត្តិបត្តិរូបនេះ មិនខឹងសម្បារការរិះគន់ និងការមិនចេញចិត្តរបស់អ្នកគាំទ្រ និងម្ចាស់ហ្វេនផេកមួយចំនួននោះទេ តែលោកចង់ឱ្យគ្រប់គ្នាបើកចិត្តឱ្យទូលាយទទួលការពិតជាក់ស្តែង ព្រោះការដាក់ពិន្ទុត្រូវធ្វើឡើងយ៉ាងសុក្រឹតបំផុត ហើយគណៈកម្មការពិនិត្យមើលគ្រប់ជ្រុងជ្រោយតាំងពីដំណាក់កាលត្រៀមខ្លួន រហូតដល់ការប្រកួតចុងក្រោយ។
សូមជម្រាបថា អំឡុងពេលនៃការគ្រងមកុដក្នុងនាមជាជយលាភីបវរកញ្ញាភេទទី៣កម្ពុជា ២០២៣ ម៉ៃយ៉ា នឹងត្រូវធ្វើដំណើរទស្សនកិច្ចក្នុងខេត្តមួយចំនួនក្នុងប្រទេសកម្ពុជា ដើម្បីផ្សព្វផ្សាយពីតំបន់ទេសចរណ៍ ប្រពៃណី និងវប្បធម៍របស់ខ្មែរយើង។ បន្ថែមពីលើនោះ ម៉ៃយ៉ា ក៏នឹងតំណាងឱ្យជាតិកម្ពុជាចូលរួមប្រកួតប្រជែងកម្មវិធី Miss International Queen 2023 នៅប្រទេសថៃ នាពេលឆាប់ៗខាងមុខនេះ៕























Account
Security
Favourite Content