តារាចម្រៀងពោរពេញដោយក្បាច់រាំគ្រលែងចង្កេះរបស់ រ៉ាប៊ី ទើបទម្លាក់បទចម្រៀងថ្មីមួយចំណងជើងថា «ព្រឹកសុំ១ យប់សុំ១» កាលពីថ្ងៃទី៣ ខែវិច្ឆិកា កន្លងទៅនេះ។ ប៉ុន្តែគួរឱ្យភ្ញាក់ផ្អើលស្នាដៃចម្រៀងថ្មីរបស់តារាចម្រៀងរូបស្រស់នេះ ផ្ទុះខ្លាំងលើសស្មានដោយមានអ្នកចុចចូលស្តាប់រហូតដល់ជាង ២ លានដង ក្នុងរយៈពេលប៉ុន្មានថ្ងៃប៉ុណ្ណោះ។ នេះបើយោងតាមការបង្ហោះរបស់ទំព័រហ្វេសប៊ុកផ្លូវការ Rabee នៅថ្ងៃទី ៧ ខែវិច្ឆិកា ឆ្នាំ២០២៣។


មែនទែនទៅចំណងជើងបទចម្រៀងដែល រ៉ាប៊ី ទើបទម្លាក់លើទីផ្សារថ្មីៗក្តៅៗ បានកើតជាប្រធានបទឱ្យហ្វេនៗរបស់នាងផ្ទុះការវែកញែកផ្សេងៗគ្នា ដោយសារពេលអានទៅ វាហាក់បង្កប់អត្ថន័យអ្វីម៉្យាងសម្រាប់ពួកគេ។ តែយ៉ាងណា ការពិតត្រូវបានបកស្រាយនៅក្នុងឃ្លាប្រយោគនៃចម្រៀងនោះតែម្តង ដែលពាក្យថា «ព្រឹកសុំ១ យប់សុំ១» របស់ រ៉ាប៊ី គ្រាន់តែចង់សំដៅដល់ការសុំថើបមួយពីប្ដីតែប៉ុណ្ណោះ។

ទោះជាយ៉ាងនេះក្តី អ្វីដែលគេចាប់អារម្មណ៍ខ្លាំងជាងនេះនោះ គឺសកម្មភាពស្និទ្ធស្នាលគ្នាខ្លាំងរវាងកំលោះសង្ហា Nick Taylor និង រ៉ាប៊ី ទោះបីកន្លងមកអ្នកទាំងពីរធ្លាប់ថត MV ជាមួយគ្នាមកច្រើនហើយក៏ពិតមែន តែកាយវិការផ្អែមល្ហែមខ្លាំងក្នុង MV បទ «ព្រឹកសុំ១ យប់សុំ១» ធ្វើឱ្យអ្នកគាំទ្រអ្នកទាំងពីរ អត់ទ្រាំមិនគិតទៅន័យស្នេហាមិនបាននោះឡើយ ខណៈដែលពួកគេចង់ឃើញ រ៉ាប៊ី និងកីឡាករបាល់ទាត់រូបនេះក្លាយជាគូស្នេហ៍គ្នាពិតៗ តាំងពីរឃើញអ្នកទាំងពីររួមការងារគ្នាលើកដំបូង។


ក្នុងចម្រៀងស្នេហាផ្តោះផ្តង «ព្រឹកសុំ១ យប់សុំ១» នេះ រ៉ាប៊ី មិនបានបោះបង់ចោលអត្តសញ្ញាណរបស់ខ្លួនឡើយ នោះគឺ ក្បាច់រាំរស់រវើក និងការបង្ហាញភាពសិចស៊ី ដោយតារាចម្រៀងរូបស្រស់នេះ នៅតែរាំរែងចង្កេះតូចច្រឡឹង ជាមួយក្បាច់រាំថ្មីប្លែកទាក់ចិត្តហ្វេនៗ ដូច្នេះទើបបទចម្រៀងថ្មីនេះផ្ទុះការគាំទ្រខ្លាំងដូចទឹកបាក់ទំនប់បែបនេះ៕

























Account
Security
Favourite Content