តារាសម្ដែងពហុជំនាញ ព្រះកាយ័ចន្ទ បានចូលរួមប្រកួតចម្រៀងក្នុងកម្មវិធីលំដាប់ពិភពលោក The Voice Cambodia រដូវកាលទី ៣ តែអ្វីដែលគួរឲ្យសោកស្ដាយនាងមិនបានជាប់ទៅវគ្គបន្តឡើយ។ តារាចម្រៀង និងសម្ដែងរូបនោះ បានឲ្យដឹងថា នាងឡើងកម្មវិធីនេះ ដើម្បីបំពេញក្ដីស្រមៃលោកឪពុកដែលបានចែកឋានទៅហើយនោះ។

ម្ចាស់ក្លឹប ព្រះកាយច័ន្ទ បានជ្រើសបទ “មួយលានឆ្នាំ ” ដែលជាសំនៀងដើមរបស់ ឱក សុគន្ធកញ្ញា និងជា coach មួយរូបក្នុងកម្មវិធីតែម្ដង។ ក្នុងការឆ្លើយតបរបស់ពិធីករថា សង្ឃឹមមាន coach ប៉ុន្មានរូបបែរកៅអីមករកនោះ នាងឆ្លើយដោយមិនសូវទុកចិត្តខ្លួនឯងប៉ុន្មានឡើយ តែខំប្រឹងឲ្យអស់ពីលទ្ធភាព ដើម្បីអាចឈានទៅវគ្គបន្ទាប់។
តែគួរឲ្យសោកស្ដាយការបកស្រាយបទ “មួយលានឆ្នាំ” ដែលទទួលបានការគាំទ្រពីសំណាក់ទស្សនិកជនច្រើនពេញស្ទូឌីយោក៏ពិតមែន តែមិនទាន់អាចធ្វើឲ្យកៅអីគ្រូបង្វឹកទាំង ៤ រូបមកបានដែរ។ បើទោះជាមិនមានគ្រូបង្វឹកណាម្នាក់ចុចបង្វិលកៅអីជ្រើសយកក៏ពិតមែន តែនាងនៅតែញញឹម ក្នុងការឡើងឆាកនេះដែរ។
ក្រោយបកស្រាយចម្រៀងចប់ គ្រូបង្វឹកទាំង ៤ បានបង្វែរកៅអីឃើញហើយ សម្ដែងការភ្ញាក់ផ្អើលខ្លាំង ព្រោះមិននឹកស្មានថាតារាល្បីរូបនេះ ចូលមកប្រកួតឡើយ ហើយ coach កញ្ញា បញ្ជាក់ថាពេលច្រៀងហេតុអ្វីបានជាទស្សនិកជនហ៊ោខ្លាំងម្ល៉េះ តាមពិតព្រោះតារាល្បីប្រចាំប្រទេសរូបនេះសោះ។

សំណួរចាក់ដោតសួរថា “តើកាលលោកប៉ានៅមានជីវិត គាត់ចង់ឲ្យព្រះកាយច័ន្ទក្លាយជាមនុស្សបែបណា” ដែលពិធីការិនីសួរទៅបេក្ខជន The Voice Cambodia រដូវកាលពី ៣ រូបនេះ ធ្វើឲ្យរលីងរលោងទឹកភ្នែក និងឆ្លើយតបថា បើទោះជានាងល្បីប៉ុណ្ណា ច្រៀងពីរោះប៉ុណ្ណាក៏ដោយ តែចង់ឲ្យនាងឡើងប្រឡងក្នុងកម្មវិធី។ ដែលនេះជាការសម្រេចក្ដីស្រមៃឲ្យឪពុកជាលើកចុងក្រោយ បើទោះជាលោកបានចែកឋានតាំងពីអំឡុងឆ្នាំ ២០២១ មកម្ល៉េះ។
ឪពុក ព្រះកាយច័ន្ទ មានឈ្មោះថា ពៅ ចាន់តារា គឺជាអ្នកដែលតែងតែនៅកៀកកិតជិតកូនស្រីបណ្ដូលចិត្ត ជាអ្នកតុបតែងខ្លួន ផ្តល់ដំបូន្មានល្អៗដល់នាងគ្រប់ពេល មានព្រះកាយច័ន្ទ ក៏មានវត្តមានលោកដែរ។ មិនតែប៉ុណ្ណោះឪពុក ព្រះកាយច័ន្ទ ក៏ជាអតីតសិល្បករ និងជាគ្រូបង្រៀនផ្នែកសិល្បៈបុរាណមួយរូបដែរ៕





























Account
Security
Favourite Content