គម្រោងការចេញទៅរស់នៅសហរដ្ឋអាមេរិកជាមួយស្វាមីរបស់ ងិន ម៉ារ៉ាឌី Miss Universe Cambodia 2021 ជិតបានសម្រេចហើយ ក្រោយកូនស្រីបណ្តូលចិត្តនាងទទួលបានសញ្ជាតិជាពលរដ្ឋអាមេរិកស្របច្បាប់កាលពីពេលថ្មីៗ ខណៈដែលរូបនាងក៏កំពុងរត់ការធ្វើឯកសារ ដើម្បីចេញទៅរស់នៅទីនោះជាលក្ខណៈក្រុមគ្រួសារដែរ។


កន្លងទៅថ្មីៗនេះ Miss Universe Cambodia 2021 បានផ្តល់កិច្ចសម្ភាសន៍ឱ្យដឹងថា នាងមានគម្រោងផែនការជីវិតច្បាស់លាស់ សម្រាប់ការចាកចេញទៅរស់នៅអាមេរិក ហើយចង់បើកហាងសាឡនមួយនៅទីនោះ។ ម៉ារ៉ាឌី ថា ដោយសារតែនៅស្រុកខ្មែរនាងជាមនុស្សស្រីដែលស្រលាញ់ភាពស្រស់ស្អាត ដូច្នេះទើបចង់បើកហាងសាឡនតាមចំណូលចិត្តរបស់ខ្លួនឯង ក៏ដូចជាផ្តល់ភាពស្រស់ស្អាតឱ្យអ្នកជុំវិញខ្លួនផងដែរ។
បវរកញ្ញារាងតូចច្រឡឹងនេះបញ្ជាក់ថា ហាងសាឡនរបស់នាងអាចនឹងប្លែកជាងសាឡានផ្សេងៗបន្តិច ដោយចង់ដាក់ឈ្មោះថា Universe Salon ដើម្បីបង្ហាញឱ្យបងប្អូនរស់នៅអាមេរិកដឹងថា ស្ត្រីខ្មែរមានសមត្ថភាពខ្ពស់ មិនត្រឹមអាចធ្វើជាស្ត្រីមេផ្ទះ ជាអ្នកសិល្បៈប៉ុណ្ណោទេ តែស្រ្តីខ្មែរយើងក៏អាចបង្កើតអាជីវកម្មដោយខ្លួនឯង ដោយមិនចាំបាច់រស់ពឹងផ្អែកលើស្វាមីទាំងស្រុងនោះឡើយ។


ទោះបី Miss Universe Cambodia 2021 សម្រេចចិត្តលាមាតុភូមិទៅរស់នៅតាមស្វាមី តែចិត្តនាងនៅតែស្រលាញ់វិស័យសិល្បៈខ្លាំង ហើយប្រសិនមានឱកាសនាងក៏ពិចារណាការងារសិល្បៈណាដែលធ្វើតាមប្រព័ន្ធឌីជីថលបានទៅតាមលទ្ធភាព និងភាពជាក់ស្តែងពេលទៅរស់នៅទីនោះ។ ដូច្នេះទើបសព្វថ្ងៃ ម៉ារ៉ាឌី សម្រុកទទួលការងារសិល្បៈផ្សេងៗដែលអាចធ្វើទៅបាន ដើម្បីទុកជាស្នាដៃទៅថ្ងៃក្រោយ ព្រោះពុំដឹងថា ថ្ងៃមុននឹងទៅជាយ៉ាងណាឡើយ។
ចិត្តជាកុលស្រ្តីខ្មែរ និងជាស្ត្រីនៃចក្កវាឡកម្ពុជា ងិន ម៉ារ៉ាឌី ប្តេជ្ញារក្សាកូនស្រីឱ្យដើរតាមគន្លងប្រពៃណីខ្មែរ ជាស្រ្តីដែលមានអត្តចរិតថ្លៃថ្នូរ ស្រស់ស្អាត សុភាពរាបសារ ទន់ភ្លន់ ជារួមគឺអ្នកម្តាយរូបនេះមិនឱ្យកូនស្រីភ្លេចអត្តសញ្ញាណជាតិខ្មែរនោះឡើយ ទោះបីរស់នៅធំធាត់លើទឹកដីសហរដ្ឋអាមេរិក៕

























Account
Security
Favourite Content