ធ្លាប់ជាបវរកញ្ញាម្នាក់ដែលរងការ bully ច្រើនរាប់មិនអស់ តែចុងក្រោយ ងិន ម៉ារ៉ាឌី បានប្រែក្លាយខ្លួនឯងមកជានិមិត្តរូបសម្រាប់បវរកញ្ញា-បុរសឯកជាច្រើន ព្រោះនាងបានបង្ហាញឱ្យគ្រប់គ្នាឃើញថា ការ bully ទាំងនោះគ្មានឥទ្ធិពលអ្វីចំពោះខ្លួនឡើយ ប្រសិនស្គាល់ខ្លួនឯងច្បាស់ ហើយក្លាហានជម្នះបញ្ហាទាំងអស់នោះ។

សកម្មភាព និងទង្វើតូចៗរបស់ Miss Universe Cambodia 2021 ធ្វើឱ្យនាងត្រូវគេចាត់ទុកជាបវរកញ្ញាមានគុណភាពម្នាក់ក្នុងវិស័យបវរកញ្ញានៅកម្ពុជា ព្រោះនាងបានផ្លាស់ប្តូរគំនិតមហាជនជាច្រើនដែលធ្លាប់មើលនាងក្នុងផ្លូវអវិជ្ជមានឱ្យងាកមកមើលនាងក្នុងផ្លូវវិជ្ជមានវិញ តាមរយៈការប្រតិបត្តិខ្លួនយ៉ាងខ្ជាប់ខ្ជួន រួមទាំងការចែករំលែកបទពិសោធន៍ល្អៗជាមួយមនុស្សជុំវិញខ្លួន។
ក្រោយបញ្ចប់តំណែងនាងបានរៀបការសាងគ្រួសារយ៉ាងមានសុភមង្គល ថែមទាំងមានកូនស្រីដ៏គួរឱ្យស្រលាញ់ម្នាក់ទៀត តែបវរកញ្ញាចង្កេះមួយក្ដាប់រូបនេះ ឆ្លៀតចែករំលែកបទពិសោធន៍ផ្សេងៗទាក់ទងការប្រកួតថ្នាក់ជាតិ-អន្តរជាតិឱ្យប្អូនៗជំនាន់ក្រោយ ក៏ដូចជាការរៀបចំខ្លួនឱ្យល្អស័ក្តិសមជាបវរកញ្ញាម្នាក់ផងដែរ។


ជាក់ស្តែង ក្នុងពិធីជួបជុំគ្នាជាលើកដំបូងនៃការប្រកួត Miss Queen Cambodia 2024 កាលពីពេលថ្មីៗកន្លងទៅ អ្នកនាង ងិន ម៉ារ៉ាឌី បានចែករំលែកផ្សេងៗពីការប្រកួត រួមជាមួយការត្រៀមខ្លួន និងការប្រឈមមុខការរិះគន់ផ្សេងៗដែលអាចនឹងកើតឡើងអំឡុង ឬក្រោយពេលប្រកួតចប់។ ឆ្លៀតឱកាសនេះ បវរកញ្ញាចក្កវាឡកម្ពុជាឆ្នាំ ២០២១ ក៏បានចែករលែកគន្លឹះតូចៗ ដើម្បីក្លាយជាបវរកញ្ញាមានគុណភាពផងដែរ។
Miss Universe Cambodia 2021 លើកឡើងថា វាមានកត្តាគួបផ្សំច្រើន ក្នុងការជម្រុញឱ្យក្លាយជាបវរកញ្ញាមានគុណភាព។ ចំណុចចាប់ផ្តើមដ៏សំខាន់នោះ គឺខ្លួនយើងផ្ទាល់ ព្រោះពាក្យថា គុណភាព វាកើតចេញពីការប្រតិបត្តិខ្លួនរបស់យើង។
ជាបវរកញ្ញា មិនមែនស្រស់ស្អាតតែខាងក្រៅប៉ុណ្ណោះទេ តែយើងត្រូវមានភាពស្រស់ស្អាតពីខាងក្នុង (សំដៅលើសុជីវធម៌ វិន័យ និងការគោរពពេលវេលា ជាដើម) ការគោរពឱ្យតម្លៃលើមនុស្សជុំវិញខ្លួន ហើយរឹតតែសំខាន់គឺយើងត្រូវមានភាពថ្លៃថ្នូរជាប់មកជាមួយជានិច្ច។ លើសពីនេះទៀត យើងត្រូវខំប្រឹងដុះខាតពង្រឹងសមត្ថភាព ហើយអនុវត្តន៍វាប្រកដដោយភាពថ្លៃថ្នូរ។ ម៉ារ៉ាឌី សង្កត់ធ្ងន់ថា «បវរកញ្ញាដែលមានគុណភាព គឺជាបវរកញ្ញាម្នាក់ដែលគេត្រូវការតែម្តង ហើយគេឱ្យតម្លៃយើងទៀត អ៊ីចឹងកត្តាតូចៗទាំងអស់ពិតជាសំខាន់ខ្លាំងមែនទែន»។


គួររំឮកផងដែរថា ថ្វីដ្បិតតែ Miss Universe Cambodia 2021 មិនអាចបំបែកកំណត់ត្រានាំកម្ពុជាចូលក្នុងវគ្គ Top ក៏ពិតមែន ប៉ុន្តែនាងស្រូបទាញចិត្តមនុស្សម្នាយ៉ាងច្រើនកុះករ ក្រោយបង្ហាញឱ្យពិភពលោកឃើញភាពស្រស់ស្អាត ភាពក្លាហានអង់អាចរបស់ស្រ្តីខ្មែរក្នុងការប្រកួតប្រជែង ទោះបីស្ថិតក្នុងដំណាក់កាលណាក៏ដោយ ក៏នាងនៅតែញញឹមទទួលយកការពិត ហើយបោះជំហានទៅមុខប្រកបដោយទំនុកចិត្ត និងភាពជឿជាក់លើខ្លួនឯង។
បច្ចុប្បន្ន ម៉ារ៉ាឌី នៅតែទទួលធ្វើការងារសិល្បៈដូចធម្មតា ដរាបណាទិដ្ឋការ (VISA) របស់នាងមិនទាន់ធ្លាក់មក។ ប៉ុន្តែគម្រោងទៅអនាគត អ្នកម្តាយរូបស្រស់នេះនឹងផ្លាស់ទៅរស់នៅជួបជុំជាមួយស្វាមីនៅឯសហរដ្ឋអាមេរិក៕

























Account
Security
Favourite Content