កម្ពុជា​ដែល​ទើប​ទទួល Miss Grand International 2024 បាន​ប៉ុន្មាន​ថ្ងៃ​មក​នេះ ក៏​ស្រាប់តែ​មាន​បញ្ហា​ខ្លាំង​កាលពី​យប់​ម្សិលមិញថ្ងៃ ៦ ខែតុលា ឆ្នាំ ២០២៤ រហូត​ដល់​ម្ចាស់​ស្ថាប័ន គឺ​លោក Nawat Itsaragrisil បាន​ប្រកាស​ដក​កម្ពុជា​ជា​សហ​ម្ចាស់​ផ្ទះ​រៀបចំ​កម្មវិធី។

ស្ថាប័ន Miss Grand International បាន​ឲ្យ​ដឹង​ថា​សកម្មភាព​បន្ត​នា​ពេល​ខាង​មុខនឹង​ត្រូវ​​ធ្វើ​នៅ ​ប្រទេស​ថៃ ដែល​ចាប់ផ្ដើម​នៅ​ថ្ងៃ ៧ ខែ​តុលា ឆ្នាំ ២០២៤ នេះតទៅ។ ក្នុង​សេចក្ដី​ប្រកាស​ផ្លូវការ​របស់ MGI បាន​រៀបរាប់​ថា “យើង​សោកស្ដាយ​ក្នុង​ការ​ជូន​ដំណឹង​ថា ប្រទេស​កម្ពុជា​នឹង​លែង​ធ្វើ​ជា​ប្រទេស​ម្ចាស់​ផ្ទះ​របស់​យើង​ទៀត​ហើយ ដោយសារ​តែ​ស្ថាប័ន​ម្ចាស់​ផ្ទះ​មិន​អាច​បំពេញ​តម្រូវការ​ដូច​មាន​ចែង​ក្នុង​កិច្ចសន្យា នៃ​កិច្ច​ព្រមព្រៀង​ម្ចាស់ផ្ទះ។ ជាអកុសល ពួកគេ​មិន​អាច​ផ្តល់​សេវាកម្ម​ដែល​ស្រប​តាម​ស្តង់ដារ​របស់​ស្ថាប័ន Miss Grand International (MGI) បានទេ។ យើង​សូម​កោតសរសើរ​​ចំពោះ​ការ​យោគយល់​របស់​អ្នក ហើយ​ទន្ទឹង​រង់ចាំ​ការ​គាំទ្រ​បន្ត​របស់​អ្នក“។

មិន​បង្អង់​យូរក្រោយ​ខាងលោក Nawat ចេញ​សេចក្ដី​ប្រកាស​បែបនោះហើយ អ្នកស្រី អ៊ឹម សុគន្ធា ក៏​បាន​ចេញ​មុខ​មក live បកស្រាយ​បញ្ហា​មួយ​ចំនួន ព្រម​​​ទាំងប្រកាស​ថា Miss Grand Cambodia លែង​បន្ត​អាជ្ញាប័ណ្ណ​ជាមួយ​ស្ថាប័ន Miss Grand International ដោយសារ​ស្ថាប័ន Miss Grand មិន​គោរព​កម្ពុជា​ក្នុង​នាម​ជា​ប្រទេស​ម្ចាស់​ផ្ទះ និង​មិន​សហការ​ជាមួយ​ភាគី​កម្ពុជា។

បេក្ខភាព Miss Grand international បាន​មក​ដល់​កម្ពុជា ៤ ថ្ងៃ និង​បាន​ធ្វើ​ទស្សនកិច្ច​នៅ​កម្ពុជា​ដូច​ជា​រមណីយដ្ឋានវត្ត​ភ្នំ និង​ចូលរួម​ទស្សនា​ស្វែងយល់​ពី​ប្រវត្តិ​ខ្លះ​ៗ​នៅ​វាល​ពិឃាដ​ជើងឯក។ ចំណែក​បញ្ហា​ធំ​គឺ រឿង​ការ​ញ៉ាំ​អាហារ​ពេល​ល្ងាច​នៅ​លើ​ទូក តែ​ដោយសារ​បញ្ហា​បច្ចេកទេស និង​អាកាសធាតុ​មិន​អំណោយផល ធ្វើឲ្យ​មាន​រឿង​វែងឆ្ងាយ រហូត​ដល់​ផ្ដាច់​កម្ពុជា​ជា​ម្ចាស់ផ្ទះ និង​ផ្ដាច់​កុងត្រា​ជាមួយ​ស្ថាប័ន​បវរកញ្ញា​មួយ​នោះ​ថែម​ទៀត​ផង។

អ្នកគាំទ្រ​កម្ពុជា​ពិតជា​​បារម្ភ​ខ្លាំង​ថា​បញ្ហា​នោះ ជះ​ឥទ្ធិពល​មិន​ល្អ​ទៅ​ដល់​កញ្ញា ប៊ី សុធារី Miss Grand Cambodia 2024 ដែល​កំពុង​ស្ថិត​ក្នុង​សមរភូមិ​ប្រកួត៕