ព្រះនាងតូច នរោត្តម ជេនណា មានគោរមងារផ្លូវការថា អ្នកអង្គម្ចាស់ក្សត្រិយ៍ នរោត្ដម ជេនណា «Princess Jenna Norodom»។ ព្រះនាងជាបុត្រីរបស់អ្នកអង្គម្ចាស់ក្សត្រិយ៍ នរោត្ដម បុប្ផារី ត្រូវជាព្រះរាជនត្តា (ចៅស្រី) ព្រះករុណាព្រះបាទសម្តេច នរោត្តម សីហនុ ព្រះបរមរតនកោដ្ឋជាទីគោរពសក្ការដ៏ខ្ពង់ខ្ពស់បំផុត ជាព្រះភាគិនេយ្យា (ក្មួយស្រី) នៃព្រះករុណាព្រះបាទសម្តេច ព្រះបរមនាថ នរោត្តម សីហមុនី។ ព្រះនាងតូចមានទេពកោសល្យសិល្បៈតាំងពីនៅតូចត្រឹម ៥ ទៅ ៦ព្រះវស្សា ហើយសមត្ថភាពសិល្បៈរបស់ទ្រង់ ចេះតែបន្តរីកចម្រើនទៅតាមវ័យ រហូតមានកិត្តិនាមល្បីល្បាញខ្លាំង ត្រូវបានប្រជានុរាស្ត្រស្គាល់ទូទាំងនគរ។ មិនតែប៉ុណ្ណោះថែមទាំងល្បីនៅលើឆាកអន្តរជាតិទៀតផង ដូចជានៅប្រទេសកូរ៉េ និងចិនជាដើម។ មិនមែនជារឿងចៃដន្យ តែគ្រប់យ៉ាងដែលព្រះនាងទទួលបានពេលនេះ គឺកើតចេញពីសមត្ថភាពពិតៗ។ ដូចនេះនៅថ្ងៃនេះ AMS-Infotainment សូមលើកយកសមត្ថភាពសិល្បៈឆ្នើមៗរបស់ព្រះនាងតូច ជេនណា មករៀបរាប់ដូចតទៅ៖
១.ព្រះនាងតូច ជេនណា ជាតារាចម្រៀងមួយរូប អាចច្រៀងបានច្រើនទម្រង់ និងច្រើនភាសា
ព្រះនាងតូច ត្រូវបានមហាជនស្គាល់កាន់តែច្បាស់ពីដឹកដមសំនៀងតាមរយៈបទ «ដួងច័ន្ទ»។ ពេលនោះព្រះនាងនៅមានព្រះជន្មក្មេងខ្លាំងណាស់ តែមនោសញ្ចេតនា និងទឹកដមសំឡេងដ៏ក្រលួច ធ្វើឱ្យបទចម្រៀងមួយនេះ ផ្ទុះការគាំទ្រជាខ្លាំង។ ក្រៅពីអាចច្រៀងបទបែបមនោសញ្ចេតនា ទ្រង់អាចច្រៀងជាចង្វាក់ប្រជាប្រិយដូចជា រាំវង់ កន្ទ្រឹម តាលុង សារ៉ាន់ជាដើម។ មិនតែប៉ុណ្ណោះទម្រង់មហោរី យីកេ ក៏ទ្រង់អាចច្រៀងបានយ៉ាងពីរោះ។ ក្រៅពីភាសាជាតិ ទ្រង់អាចមានសមត្ថភាពច្រៀងភាសាបរទេសដូចជា ភាសាអង់គ្លេស ចិន បានយ៉ាងល្អ។


២.ព្រះនាងតូច ជេនណា ជាតារាភាពយន្តមួយរូបពេញដោយសមត្ថភាព
ត្រឹមព្រះជន្ម ៩វស្សា ព្រះនាងតូច ជេនណា បានសម្រេចសមិទ្ធផលភាពយន្តភាគធំៗជាបន្តបន្ទាប់ គួរជាទីកោតសរសើរ ហើយភាពយន្តដែលផ្ទុះល្បីកក្រើក គឺរឿង «ទេពធីតាព្កុលមាស» និង «នគរមាស» របស់ទូរទស្សន៍ CTN។ ថ្មីៗនេះទ្រង់ទើបបង្ហាញព្រះភ័ក្ដ្រជាថ្មីក្នុងភាពយន្តដុំ បញ្ចាំងក្នុងភាពយន្តរបស់ផលិតកម្ម LD គឺរឿង «នាងរាត្រី»។


៣.ព្រះនាងតូច ជេនណា អាចរាំរបាំព្រះរាជទ្រព្យ និងរបាំប្រពៃណីបានយ៉ាងល្អ
ព្រះនាងតូចបានហាត់រៀនរាំរបាំតាំងពីនៅតូចមកម្ល៉េះ ហើយទ្រង់ក៏ធ្លាប់បានបង្ហាញសមត្ថភាពមួយនេះ តាមរយៈវីដេអូផ្សេងៗ នៅលើបណ្ដាញសង្គមជារឿយៗ។ ទ្រង់អាចរាំរបាំអប្សរា ឬរបាំព្រះរាជទ្រព្យ របាំប្រពៃណីជាច្រើនផ្សេងទៀត។


៤.ព្រះនាងតូច ជេនណា អាចរាំចង្វាក់ K-POP បានយ៉ាងល្អ
បុរាណមិនយឺត សម័យមិនបរទេស ពាក្យនេះពិតជាស័ក្ដិសមនឹងយកមកនិយាយ ចំពោះព្រះនាងតូច ជេនណា។ ក្រៅពីទម្រង់បុរាណខ្មែរ ព្រះនាងក៏មានសមត្ថភាពរាំចង្វាក់បរទេសជាពិសេសចង្វាក់ K-POP ទ្រង់ក៏ធ្លាប់បានឡើងសម្ដែងនៅវេទិកាផ្សេងៗជាច្រើនមកហើយដែរ។ បែបនេះហើយ ទើបបានជាព្រះនាង ត្រូវបានកាសែតធំៗរបស់កូរ៉េចុះផ្សាយព្រោងព្រាតពីព្រះនាងតូច។


៥.ព្រះនាងតូចអាចសម្ដែងកីឡារាំបានយ៉ាងល្អ
ប្រសិនបើអ្នកបានតាមដានព្រះនាងតូចជេនណា ជាប្រចាំប្រាកដជាធ្លាប់បានឃើញព្រះនាងបញ្ចេញសមត្ថភាពលើកីឡារាំបានយ៉ាងល្អ ហើយថែមទាំងធ្លាប់បង្ហាញសមត្ថភាពមួយនេះចំពោះមុខមហាជនជាច្រើនទៀតផង។

៦.ព្រះនាងតូច ជេនណា មានសមត្ថភាពអាចថត TVC ស្បតពាណិជ្ជកម្មបានយ៉ាងល្អ
ដោយសារសមត្ថភាពច្រើនយ៉ាងនេះហើយ ទើបបានជាព្រះនាងតូច នរោត្ដម ជេនណា ត្រូវបានក្រមហ៊ុនធំៗ ទាំងក្នុង និងក្រៅប្រទេស ចាប់អារម្មណ៍យកព្រះនាង ធ្វើជាទូតសុឆន្ទះជាបន្តបន្ទាប់។ ការងារទាំងនេះតម្រូវឱ្យព្រះនាងថតស្បតពាណិជ្ជកម្មឱ្យផលិតផលទាំងនោះ ហើយតាមរយៈវីដេអូផ្សព្វផ្សាយពាណិជ្ជកម្មទាំងនោះ បានបញ្ជាក់ឱ្យយើងឃើញកាន់តែច្បាស់ពីសមត្ថភាពអ្នកអង្គម្ចាស់ក្សត្រិយ៍នរោត្ដម ជេនណា ៕
























Account
Security
Favourite Content