ក្រោយប៉ូលីសបានឃាត់ខ្លួន Lil Nas X លើការចោទប្រកាន់ ៤ករណី នៅថ្ងៃទី២៥ ខែសីហា តារាចម្រៀងអាមេរិកាំងរូបនេះ បានត្រឡប់មកមានសេរីភាពជាបណ្ដោះអាសន្ន ជាមួយនឹងប្រាក់ធានាខ្លួនចំនួន ៧៥ ០០០ដុល្លារអាមេរិក ត្រៀមខ្លួនសម្រាប់សវនាការក្រោយ។

យោងតាមទស្សនាវដ្ដី People កាលពីថ្ងៃទី២១ ខែសីហា កន្លងទៅ នាយដ្ឋានប៉ូលិសទីក្រុង Los Angeles បានទទួលការរាយការណ៍ថា មានបុរសម្នាក់បានដើរអាក្រាតកាយនៅលើមហាវិថី Ventura ក្នុងអាការៈខុសប្រក្រតី ដោយក្រោយមកទើបអាចកំណត់អត្តសញ្ញាណបានថា បុរសរូបនោះគឺជាសិល្បករចម្រៀងមួយរូប ដែលមានឈ្មោះថា Lil Nas X។
ក្រោយមកតារាប្រុសវ័យ ២៦ឆ្នាំរូបនេះ បានព្យាយាមតតាំងជាមួយនឹងប៉ូលិស រហូតអាចឃាត់ខ្លួន និងបញ្ចូលទៅកាន់មន្ទីរពេទ្យជាមួយនឹងអាការៈស្រដៀងគ្នានឹងមនុស្សស្រវឹង ទំនងមកពីការប្រើប្រាស់សារធាតុញៀនលើសកម្រិត មុននឹងអាចឃាត់ខ្លួនដាក់ពន្ធនាគារ នៅប៉ុន្មានថ្ងៃកន្លងមកនេះ។
Lil Nas X បានក្លាយជាជនជាប់ចោទលើ ៤ករណី រួមមាន អំពើហិង្សាដែលនាំឱ្យប៉ូលិសរងរបួសរាងកាយចំនួន ៣ករណី និងការរារាំងប៉ូលិសពីការបំពេញតួនាទី ១ករណីទៀត។ រហូតមកដល់ថ្ងៃទី២៥ ខែសីហា នេះ ម្ចាស់បទ Old Town Road បានបង្ហាញខ្លួននៅឯតុលាការ ដោយលោកបានបដិសេធការចោទប្រកាន់ទាំងអស់ មុននឹងទទួលបានការដោះលែងខ្លួនបណ្ដោះអាសន្ន ជាមួយនឹងប្រាក់ធានាខ្លួន ៧៥ ០០០ដុល្លារអាមេរិក។


យ៉ាងណាមិញ លោកនឹងត្រូវបង្ហាញខ្លួនម្ដងទៀត ក្នុងសវនាការ នៅថ្ងៃទី១៥ ខែកញ្ញា ខាងមុខនេះ។ ក្នុងករណីថា លោកពិតជាបានល្មើសមែន តារាប្រុសនឹងត្រូវប្រឈមមុខ ជាប់ពន្ធនាគាររយៈពេល ៥ឆ្នាំ។ បន្ថែមពីនេះ តុលាការក៏បញ្ជាឱ្យ Lila Nas X ត្រូវចូលរួមជាមួយនឹង Narcotics Anonymous ចំនួន ៤ដង ក្នុងមួយសប្ដាហ៍ ក្នុងគោលបំណងឱ្យលោកអាចកាត់ផ្ដាច់ពីគ្រឿងញៀន ព្រោះប៉ូលិសបានជឿជាក់ថា លោកបានប្រើប្រាស់គ្រឿងញៀននៅពេលកើតហេតុ។
ដោយឡែក លោក Drew Findling ដែលជាមេធាវីរបស់ Lil Nas X បាននិយាយថា កូនក្ដីរបស់ខ្លួនមិនដែលបង្កបញ្ហាអ្វីពីមុនមកនោះទេ ហើយគាត់នឹងមិនធ្វើឱ្យរឿងហេតុនេះបំផ្លាញជីវិតសិល្បកររបស់កូនក្ដីខ្លួនឡើយ។
មេធាវីរូបនេះ បានជឿជាក់ថា Lil Nas X នៅមានវ័យក្មេង អមដោយសម្ពាធ ដូច្នេះទង្វើនេះអាចជារឿងធម្មតា។ លោកក៏រំឭកផងដែរថា កាលពីខែកុម្ភៈកន្លងទៅ កូនក្ដីខ្លួនទើបតែបានចែករំលែកវីដេអូមួយដែលទទួលស្គាល់ថា ខ្លួនកំពុងតែមានរឿងច្របូកច្របល់ ហើយរយៈពេលប៉ុន្មានឆ្នាំចុងក្រោយមកនេះ គឺជាពេលវាលាដ៏លំបាកសម្រាប់ Lil Nas X ៕
























Account
Security
Favourite Content