ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
Li Bing Bing ជាតារាស្រីចិនជើងចាស់ល្បីល្បាញម្នាក់។ ចាប់ផ្ដើមអាជីពជាតារាសម្ដែងក្នុងឆ្នាំ ១៩៩៤ រហូតមកដល់ពេលនេះនាងមានបទពិសោធន៍ជិត ៣០ ឆ្នាំទៅហើយក្នុងការសម្ដែង។ តារាស្រីវ័យ ៥១ ឆ្នាំរូបនេះត្រូវបានគេស្រលាញ់តាមរយៈខ្សែភាពយន្តជាច្រើនដូចជា Seventeen Years, A World Without Thieves, Waiting Alone, The Knot និង Forbidden Kingdom ជាដើម។
ក្រៅពីទទួលបានភាគជោគជ័យក្នុងប្រទេសកំណើតរបស់ខ្លួន តារាស្រី Li Bing Bing ក៏បានបន្ដខិតខំប្រឹងប្រែង និងមានឱកាសឈានចូលដល់ទីផ្សារអន្តរជាតិ និងទទួលបានជោគជ័យជាមួយខ្សែភាពយន្តហូលីវូដល្បីៗ ជាបន្តបន្ទាប់ដូចជា The Meg, Transformers: Era of Destruction និង Resident Evil 5។
មិនត្រឹមតែទទួលបានជោគជ័យក្នុងវិស័យភាពយន្ដ នាងក៏ត្រូវបានគេចាត់ទុកជាតារាស្រីដែលមានពាណិជ្ជកម្មផ្សព្វផ្សាយយ៉ាងច្រើនក្នុងស្រុក។ ក្នុងឆ្នាំ ២០០៧ Li Bingbing បានក្លាយជាអ្នកតំណាងគ្រឿងអលង្ការ Montblanc ក្នុងតំបន់អាស៊ីប៉ាស៊ីហ្វិក ហើយបានក្លាយជាតារាសម្តែងដំបូងគេដែលតំណាងឱ្យម៉ាកប្រណីតអន្តរជាតិមួយនេះ។ ក្នុងឆ្នាំ ២០១៣ Li Bingbing បានក្លាយជាអ្នកតំណាងពិភពលោកដំបូងគេនៃម៉ាកយីហោប្រណិតអន្តរជាតិ GUCCI។
ក្នុងអាជីពជាអ្នកសិល្បៈ Li Bing Bing ឈ្នះពានរង្វាន់ភាពយន្តជាច្រើនដូចជាពានរង្វាន់ Golden Rooster Award, Hua Biao Award, Hundred Flowers Award, Golden Horse Award។ នាងត្រូវបានគេចាត់ទុកថាជាតារាស្រីម្នាក់ដែលមានការតស៊ូ និងពុះពារខ្លាំងក្នុងវិស័យសិល្បៈចិន។ នាងធ្លាប់បញ្ជាក់ប្រាប់ថា មូលហេតុដែលនាងជោគជ័យដូចសព្វថ្ងៃដោយសារតែនាងបានដាក់គោលដៅលើខ្លួនឯងតាំងពីមានអាយុ ១៦ ឆ្នាំថា បើទោះជាមានបញ្ហាលំបាកយ៉ាងណាក៏នាងបន្ដខិតខំប្រឹងប្រែងឱ្យដល់គោលដៅដែលខ្លួនចង់បាន។ រំឭកទៅកាលពីឆ្នាំ ២០០៥ ពេលនាងថតរឿងនាងធ្លាក់ខ្លួនឈឺរហូតប្រកាច់ដួលតែនាងមិនបានបោះបង់ចោលនោះទេដើម្បីបំពេញការងាររបស់ខ្លួនឱ្យដល់ទីបញ្ចប់។
ក្នុងឆ្នាំ ២០១៥ ពេលថតរឿង Ancient Tomb Guards នាងបានក្តៅខ្លួនចំនួន ២១ ថ្ងៃជាប់ៗគ្នា ដោយសារនាងមិនអាចសម្របតាមលក្ខខណ្ឌអាកាសធាតុនៅកន្លែងថតបាន ប៉ុន្ដែនាងនៅតែបន្ដថតរហូតដល់ចប់។ មិនទាន់អស់នៅឡើយ ដើម្បីបន្ដពង្រឹងសមត្ថភាពរបស់ខ្លួននាងបានទៅរៀនភាសាអង់គ្លេសបន្ថែមនៅពេលមានអាយុ ៣០ ឆ្នាំ ទោះជាមានការលំបាកយ៉ាងណាក៏នាងនៅតែតស៊ូរហូតនាងអាចប្រើប្រាស់ភាសាអង់គ្លេសបានស្ទាត់ជំនាញ។ បច្ចុប្បន្ន នាងត្រូវបានគេរាយការណ៍ថាមានទ្រព្យសម្បត្ដិសរុបប្រមាណ ១៤០ លានដុល្លារអាមេរិក និងក្លាយជាតារាស្រីចិនដ៏ជោគជ័យម្នាក់។
ក្រឡេកមកមើលជីវិតស្នេហារវិញ នាងមានស្នេហាដំបូងក្នុងវ័យ ១៩ ឆ្នាំ ដោយបានទាក់ទងមិត្ដប្រុសក្រៅសិល្បៈម្នាក់រហូតដល់ទៅ ១៣ ឆ្នាំ ប៉ុន្ដែដោយសារអាជីពខុសគ្នាមិនសូវមានពេលវេលាសម្រាប់គ្នាអ្នកទាំងពីរក៏សម្រេចចែកផ្លូវគ្នា។ ក្រោយមកតារាស្រីរូបនេះក៏បានជួបជាមួយតារាប្រុស Wang ZhongLei និងជាម្ចាស់ក្រុមហ៊ុនមួយផងដែរ។ អ្នកទាំងពីរបានសេពគប់គ្នាក្រោយស្គាល់គ្នាបានមួយរយៈ ប៉ុន្ដែមិនបានប៉ុន្មានក៏ចែកផ្លូវគ្នា។ ក្នុងឆ្នាំ ២០១៧ រូបនាងត្រូវគេទម្លាយថាកំពុងសេពគប់ជាមួយមិត្ដប្រុសក្រៅសិល្បៈម្នាក់ដែលជាម្ចាស់ក្រុមហ៊ុនវិនិយោគមួយនៅប្រទេសចិន និងមានអាយុក្មេងជាងនាងដល់ទៅ ១៦ ឆ្នាំ។ បន្ទាប់ពីសេពគប់គ្នា ៤ ឆ្នាំអ្នកទាំងពីរក៏បានចែកផ្លូវគ្នា។
ក្នុងឆ្នាំ ២០២១ តារាស្រី Li Bing Bing ក៏បានប្រកាសជាសាធារណៈថានាងមិនមានទំនាក់ទំនងស្នេហាជាមួយនរណាទៀតឡើយ និងត្រឡប់មករស់នៅជីវិតបែប single វិញ។ អ្វីដែលគួរឱ្យភ្ញាក់ផ្អើល នៅក្នុងឆ្នាំ ២០២២ នាងក៏បាននិយាយក្នុងបទសម្ភាសន៍ទៀតថា នាងនឹងមិនយកកូនទេ និងសម្រេចរស់នៅជីវិតខ្លួនមួយ។ ចំណែកទ្រព្យសម្បត្ដិរបស់នាងវិញ នាងលើកឡើងថានឹងផ្ទេរទៅឱ្យក្មួយប្រុស និងក្មួយស្រីបង្កើតរបស់នាង។
បន្ទាប់ពី Li Bing Bing ប្រកាសបែបនេះ មហាជនជាច្រើនបានបញ្ចេញមតិលើកទឹកចិត្តនាងថា សំខាន់ឱ្យតែនាងសប្បាយរីករាយបើទោះជានៅតែម្នាក់ឯងក៏មិនចោទជាបញ្ហាអ្វីឡើយ។ សុខភាពផ្លូវចិត្តល្អ និងការចេះធ្វើឱ្យខ្លួនឯងធូរស្រាលទើបជារឿងសំខាន់៕
Account
Security
Favourite Content