តារាចម្រៀងស្រីល្បី Celine Dion ម្ចាស់បទ “My Heart Will Go On” បានទម្លាយថា ខ្លួនកំពុងជាប់មានជំងឺដ៏កម្រម៉្យាង ជាហេតុធ្វើឲ្យនាងត្រូវផ្អាកសកម្មភាពសិល្បៈនានា ជាពិសេសការប្រគំតន្ដ្រីទេសចរណ៍របស់ខ្លួនដែលគ្រោងធ្វើនៅក្នុងឆ្នាំ ២០២៤។
ជំងឺរបស់តារាស្រី Celine Dion ត្រូវបានរាយការណ៍ថា ជាជំងឺពាក់ព័ន្ធសរសៃប្រសាទដ៏កម្រមួយ ហើយជំងឺនេះធ្វើឲ្យប៉ះពាល់យ៉ាងខ្លាំងដល់ជីវិតប្រចាំថ្ងៃរបស់នាង។ វាធ្វើឲ្យនាង ពិបាកក្នុងការដើរ ហើមសាច់ដុំ ពេលខ្លះមិនអាចសូម្បីច្រៀង និងប៉ះពាល់ដល់រាងកាយទាំងមូល។ បើទោះជាមានការគាំទ្រពីអ្នកជុំវិញ និងការមើលថែពីក្រុមគ្រូពេទ្យជំនាញ ប៉ុន្ដែវានៅតែជារឿងពិបាកខ្លាំងមួយសម្រាប់រូបនាងខ្លាំងក្នុងការតស៊ូប្រឆាំង។


ថ្មីៗ នេះ តារាស្រី Celine Dion ក៏បានបញ្ចេញពីភាពយន្ដឯកសារ “I Am Celine Dion” និងបានរៀបរាប់ពីជំងឺដែលរូបនាងកំពុងប្រឈមមុខជាមួយវាយ៉ាងលំបាក។ វាបង្ហាញពីអារម្មណ៍ឈឺចាប់ និងភាពលំបាកដែលតារាស្រីវ័យ ៥៦ ឆ្នាំរូបនេះត្រូវឆ្លងកាត់។ សកម្មភាពទាំងអស់នោះធ្វើឲ្យអ្នកគាំទ្រជាច្រើនហាក់មានអារម្មណ៍ឈឺចាប់ និងអាណិតអាសូរដល់រូបនាងយ៉ាងខ្លាំង។
ជាមួយគ្នាដែរ នៅក្នុងឈុតមួយនៃភាពយន្ដឯកសារ បានបង្ហាញឲ្យឃើញរូបនាងស្រាប់តែប្រកាច់ភ្លាមៗ និងកន្ដ្រាក់សាច់ដុំពាសពេញរាងកាយ ហើយមិនអាចធ្វើចលនាបានរហូតដល់ទៅ ១០ នាទី។ នាងត្រូវការចាក់ថ្នាំទប់ស្កាត់ និងបន្ថយការឈឺចាប់។ តារាស្រី Celine Dion បានទម្លាយថា នាងពិតជាមានអារម្មណ៍ខ្មាស់អៀនខ្លាំង នៅពេលនាងមិនអាចគ្រប់គ្រងរាងកាយរបស់ខ្លួនឯងបាន និងបង្ហាញឲ្យឃើញស្ថានភាពមិនល្អបែបនេះ។ នាងក៏បានលើកឡើងបន្ថែមថា៖ ទោះជាមានការឈឺចាប់ និងលំបាកខ្លាំងយ៉ាងណា នាងនឹងខិតខំប្រឹងប្រែងជម្នះឲ្យបាន នាងនឹងត្រឡប់មកកាន់ឆាកតន្ដ្រីសាជាថ្មីម្ដងទៀត។


គួរបញ្ជាក់ថា ប្អូនស្រីរបស់តារាស្រីរូបនេះគឺ Claudette Dion ក៏ធ្លាប់បានទម្លាយពីស្ថានភាពរបស់បងស្រីខ្លួនដល់ទស្សនាវដ្ដី Hello! Canada និងបានលើកឡើងថា បងស្រីរបស់នាងជាមនុស្សដ៏រឹងមាំម្នាក់។ បងស្រីរបស់ខ្លួនបានព្យាយាមគ្រប់យ៉ាងដើម្បីតស៊ូជាមួយជំងឺខួរក្បាលកម្រមួយនេះ។ វាជាជំងឺមួយដែលពួកយើងដឹងពីវាតិចតួចមែនទែន ហើយនាង និងក្រុមគ្រួសារមិនអាចធ្វើអ្វីបានច្រើនឡើយ ជាពិសេសមិនអាចជួយសម្រាលការឈឺចាប់ដែលបងស្រីរបស់នាងកំពុងទទួល។ ស្របពេលដែលស្ថានភាពជំងឺរបស់ Celine Dion គ្មានភាពប្រសើរឡើង និងកាន់តែដើរទៅមុខ ៕

























Account
Security
Favourite Content