Lee Hyori ជាតារាចម្រៀងស្រីខេប៉ុបដ៏ល្បីល្បាញម្នាក់ ហើយក៏ត្រូវបានគេចាត់ទុកជារៀមច្បងដ៏ល្អម្នាក់ក្នុងវិស័យសិល្បៈសម្រាប់ក្រុមចម្រៀងជំនាន់ក្រោយៗ ផងដែរ។ ថ្មីៗ នេះ Lee Hyori ទម្លាយពីអារម្មណ៍ពិតរបស់ខ្លួន និងមានការព្រួយបារម្ភចំពោះសិស្សប្អូនរបស់ខ្លួនគឺ Jennie សមាជិក BLACKPINK និងក្រុមចម្រៀង Newjeans។

ក្នុងឱកាសបង្ហាញមុខក្នុងកម្មវិធីរបស់ KBS2 គឺ Lee Hyori’s Red Carpet ជាពិធីករ តារាស្រីរូបនេះក៏បានលើកនិយាយពីប្រធានបទ ការតុបតែង និងស្លៀកពាក់ស៊ិចស៊ីរបស់ក្រុមចម្រៀងនារី។ ជារៀមច្បងធ្លាប់ឆ្លងកាត់ព្យុះភ្លៀងជាច្រើនទម្រាំទទួលបានកេរ្ដិ៍ឈ្មោះដូចសព្វថ្ងៃ តារាស្រី Lee Hyori បាននិយាយពីអារម្មណ៍របស់នាងអំពីការស្លៀកសម្លៀកបំពាក់ស៊ិចស៊ីពេក។


Lee Hyori បានលើកឡើងថា៖ អាចនិយាយ នាងជាតារាចម្រៀងខេប៉ុបនារីដំបូងដែលហ៊ានស្លៀកសម្លៀកបំពាក់ស៊ិចស៊ីខ្លាំង នៅពេលឡើងឆាកតន្ដ្រី។ ការស្លៀកពាក់បែបនេះ ធ្វើឲ្យនាងទទួលបានមតិរិះគន់យ៉ាងច្រើនរាប់មិនអស់។ ការស្លៀកពាក់ស៊ិចស៊ីវាមិនមែនជារឿងខុសទេ តែសង្គមមួយនេះតែងតែដាក់បន្ទុកលើមនុស្សស្ដ្រី និងរិះគន់សព្វបែបយ៉ាង។ ការស្លៀកពាក់បញ្ចេញសាច់ពេកបែរជាត្រូវគេតិះដៀលទៅវិញ។


នាងបន្ដថា៖ បច្ចុប្បន្ន នាងពិតជាស្រឡាញ់ចូលចិត្ដសិស្សប្អូនជំនាន់ក្រោយគឺ Jennie សមាជិក BLACKPINK និងក្រុមចម្រៀង Newjeans។ នាងសង្ឃឹម ពួកគេនឹងមិនស្លៀកសម្លៀកបំពាក់ស៊ិចស៊ីពេក។ នៅពេលដែលឃើញពួកគេស្លៀកពាក់ស៊ិចស៊ីពេក នាងស្រែកក្នុងចិត្ដតែម្ដង កុំធ្វើបែបនេះ។ ស្លៀកពាក់ឲ្យជិតជាងនេះបន្ដិច។ នាងចង់ការពារពួកគេពីការរិះគន់ គ្មានបែបបទ និងមតិអាក្រក់ៗ។




ជាមួយគ្នាដែរ ពាក្យសម្ដីរបស់តារាស្រី Lee Hyori បានធ្វើឲ្យអ្នកគាំទ្រជាច្រើនយល់ពីជម្រៅចិត្ដរបស់នាង និងគាំទ្រការគិតរបស់នាង។ ជាពិសេស អ្នកគាំទ្រពិតជាមានអារម្មណ៍កក់ក្ដៅនៅពេលមានតារារៀមច្បងបារម្ភពីក្មេងៗ ជំនាន់ក្រោយដូច្នេះ។ ប៉ុន្ដែក៏មានមតិរិះគន់អមមកជាមួយ ដោយអ្នកគាំទ្រខ្លះលើកឡើងថា Lee Hyori កំពុងគាបសង្កត់ និងបិទសិទ្ធិតារាជំនាន់ក្រោយ មិនឲ្យស្លៀកពាក់អ្វីដែលពួកគេចង់ស្លៀក និងលើកឡើងថា នាងជាតារាស្រីចាស់គំរិលថែមទៀត៕























Account
Security
Favourite Content