កំលោះសង្ហា ឡ រ៉ែន ជាតារាសម្តែងចំណូលថ្មីដែលទើបបោះជំហានចូលវិស័យភាពយន្តខ្មែរ។ គិតមកទល់ពេលនេះលោកទើបថតបានរឿងខ្លី ៤-៥ រឿង រឿងបានកំពុងចាក់បញ្ចាំង២រឿង និងនៅមានរឿងជាច្រើនទៀតដែលថតហើយ តែបមិនទាន់ចាក់បញ្ចាំង។

គួរឱ្យចាប់អារម្មណ៍ តារាសម្តែងចំណូលថ្មីរូបនេះ ហាក់ឆ្វាក់តែរឿងខ្មោចព្រឺព្រួច ដោយលោកតែងតែត្រូវជ្រើសឱ្យសម្តែងជាតួអង្គខ្មោច ឬតួអង្គខ្មោចចូល ជាដើម។ ជាក់ស្តែង ស្នាដៃរឿងដុំ ២ រឿងដែលលោកបានចូលរួមថតសុទ្ធសឹងជារឿងខ្មោចរន្ធត់ព្រឺព្រួច ដូចជា រឿង «ក្រឡអីហ្នឹង» វគ្គ៣ និងរឿង «ថ្នាក់ ១២ង» រីឯ រឿងថតហើយមិនទាន់បញ្ចាំងក៏ជារឿងខ្មោចព្រឺព្រួចមើលហើយប៉ះសក់តែម្តង។


ឱ្យដឹងក្នុងថ្ងៃសម្ភោធរឿង «ថ្នាក់ ១២ង» ពន្លកតារាសម្តែងថ្មី ឡ រ៉ែន ថា ប្រហែលមកពីនៅក្រៅលោកចូលចិត្តសម្តែងលេងជាតួអង្គខ្មោច និងចូលចិត្តសម្តែងនៅមុខកញ្ចក់តែម្នាក់ឯង។ មួយវិញទៀត រូបសម្បិត្ត និងបុគ្គលិកលក្ខណៈមើលទៅត្រូវច្រើននិងតួអង្គខ្មោច ទើបពេលទៅ Casting ម្តងៗ ខាងផលិតកម្មឱ្យលោកជាប់តែតួអង្គខ្មោចបែបនេះ។




ឡ រ៉ែន មិនទាន់ហ៊ាននិយាយថា ការសម្តែងរបស់លោកត្រូវចិត្តអ្នកទស្សនាបានប៉ុណ្ណានោះទេ តែសម្រាប់លោក គឺពេញចិត្តការសម្តែងរបស់ខ្លួនឯង ព្រោះពេលមើលក្នុង Trailer ទៅ គឺល្អអាចទទួលយកបាន។ តែយ៉ាងណាក៏ត្រូវពង្រឹងសមត្ថភាពសម្តែងនៅរឿងបន្ទាប់ៗទៀត។ តាមរយៈរឿងខ្នាតធំ ២ របស់ LD Entertainment ធ្វើឱ្យកំលោះរូបនេះ មានគេស្គាល់កាន់តែច្រើនឡើង ព្រោះសមត្ថភាពសម្តែងដ៏ប៉ិនប្រសព្វ និងការដាក់អារម្មណ៍បានល្អក្នុងតួអង្គខ្មោចគ្រប់ទម្រង់ ដែលធ្វើឱ្យអ្នកទស្សនាព្រឺរោមតាមគ្រប់ៗគ្នា៕























Account
Security
Favourite Content