ព្រឹកមិញស្រាប់តែកំពូលតារាចម្រៀងលំដាប់ប្រទេស ខេមរៈ សិរីមន្ត បានបង្ហោះមួយឃ្លាលើទំព័រហ្វេសប៊ុកផ្លូវការរបស់លោកថា «បើតាំងខ្លួនជាអ្នកសិល្បៈហើយកុំចង្អៀតចង្អល់ពេក20ឆ្នាំមកនេះតើចង្វាក់អ្វីដែលខេមរៈសិរីមន្តមិនធ្លាប់ច្រៀងហើយច្រៀងតាំងពីបងប្អូនសិល្បៈខ្លះមិនទាន់ចេះស្លៀកខោផងសូមទានជ្រាប»។

រយៈពេលប្រមាណ ៤ ម៉ោងប៉ុណ្ណោះ ប្រយោគឃ្លាដ៏ខ្លីនេះទាក់ចិត្តបណ្តាហ្វេនៗ និងសិល្បករសិល្បការិនីជាច្រើនឱ្យចូលទៅ comment ជាមតិយោបល់ផ្សេងៗ។ ក្នុងនោះផងដែរ ហ្វេនៗភាគច្រើនបានលើកឡើងពីចង្វាក់បទដែលពួកគេពុំធ្លាប់ឮម្ចាស់បទ «Call Me PAPA» ស្រែកច្រៀង ហើយភាគច្រើនបានលើកឡើងពីចង្វាក់មហោរី និង ស្មូត។ គ្រាន់តែឃើញការលើកឡើងរបស់ហ្វេនយ៉ាងដូច្នេះ ទំព័រហ្វេសប៊ុកផ្លូវការ Khemarak Sereymun ប្រញាប់ចេញមកឆ្លើយតបថា «បងសុំរាងវ័យចាស់ជាងនេះបន្តិចទៀតសិនបងច្រៀងអោយស្តាប់ណាប្អូនសម្លាញ់»។

ទោះបីនេះជាពាក្យសន្យាតាមបែបអនឡាញក៏ពិតមែន តែហ្វេនៗជាច្រើនបានចាត់ទុកវាជាការសន្យាទៅហើយ ដោយពួកគេបានបង្ហាញពីការទន្ទឹងរង់ចាំស្តាប់កំពូលតារាចម្រៀង ខេមរៈ សិរីមន្ត ច្រៀងចង្វាក់មហោរី និងស្មូត នៅថ្ងៃណាមួយ។ តែមើលទៅពាក្យសន្យានោះហាក់មិនអាចក្លាយជាការពិតឡើយ ព្រោះម្ចាស់បទ «ពេលអូនមានអ្នកថ្មីបទធ្វើអ្វីក៏ខុស» មិនព្រមចាស់ទៅតាមវ័យរបស់លោកឡើយ ដោយឆ្នាំនេះលោកមានវ័យ ៣៨ ឆ្នាំទៅហើយ ទោះបីពេលនេះមានវ័យជ្រេបន្តិចតែលោកពូកែថែរក្សាសម្រស់ និងរូបរាងកាយមើលទៅក្មេងសង្ហាមិនចាញ់តារាចម្រៀងស្រករក្រោយនោះឡើយ៕





























Account
Security
Favourite Content