តារាសម្ដែងប្រុស ខាត់ វ៉ៃហាំង ទទួលបានពានរង្វាន់ The Best Actor នៅក្នុងកម្មវិធី Asia Top Award 2024 ដែលធ្វើឡើងនៅ Siam Paragon ទីក្រុងបាំងកក ប្រទេសថៃកាលពីពេលថ្មីៗនេះ។
កាលពីថ្ងៃទី ១៨ ខែមីនា កន្លងទៅថ្មីៗនេះ តារាសម្ដែងប្រុស ខាត់ វ៉ៃហាំង ត្រូវបានអញ្ជើញឱ្យចូលរួមនៅក្នុងកម្មវិធី Asia Top Award 2024 នៅ Siam Paragon ទីក្រុងបាំងកក ប្រទេសថៃ។ បង្ហាញវត្តមានជាមួយសិល្បករជាច្រើនមកពីបណ្ដាប្រទេសនានារួមមាន កម្ពុជា ថៃ វៀតណាម ឡាវ កូរ៉េ ចិន មីយ៉ាន់ម៉ា និងប្រទេសជាច្រើនទៀត តារាសម្ដែងប្រុសមុខមានមន្តស្នេហ៍រូបនេះ ត្រូវបានផ្ដល់កិត្តិយសក្នុងការទទួលពានរង្វាន់ជាតារាសម្ដែងប្រុសឆ្នើម The Best Actor ពីកម្មវិធីផ្ទាល់ផងដែរ។
សម្រាប់ពានរង្វាន់មួយនេះ វ៉ៃហាំង បានបញ្ជាក់ថានេះជាពានដែលទទួលបានពីអ្នកគាំទ្រ។ លោកក៏បានអរគុណទៅដល់ស្ថានីយទូរទស្សន៍ ភីអិនអិន ម្ចាស់ផលិតកម្ម និងក្រុមការងារថតទាំងអស់ដែលបានខិតខំយ៉ាងលំបាក ហើយនេះដែរគឺជាសមិទ្ធផលដែលបានពីគាត់ទាំងអស់គ្នា។ គួរបញ្ជាក់ដែរថា កាលពីខែកក្កដា ឆ្នាំ ២០២៣ កន្លងទៅ តារាសម្ដែងប្រុស ខាត់ វ៉ៃហាំង ធ្លាប់ទទួលបានពានរង្វាន់ តារាសម្ដែងប្រុសដែលមានប្រជាប្រិយប្រចាំឆ្នាំ ២០២៣ ( Asia Top Award 2023) នៅក្នុងប្រទេសថៃម្ដងហើយ ៕