អតីត Miss Grand Cambodia 2020 ចំណាត់ថ្នាក់លេខ៥ កញ្ញា ខាត់ ស្រីច័ន្ទ ហៅ Kate កាន់តែលេចធ្លោខ្លាំងឡើងរាល់ថ្ងៃ ទាំងការសម្តែង ការដើរម៉ូដ និងទីផ្សារស៉្បតពាណិជ្ជកម្មជាដើម។ មិនតែប៉ុណ្ណោះ នាងថែមទាំងបានវិវត្តន៍ខ្លួនមកជាពិធីការិនីថែមទៀតផង។ ត្បិតមិនមែនជាអ្នកអាជីពក៏ពិតមែន ប៉ុន្តែស្រីស្រស់រាងតូចច្រឡឹងនេះ ធ្វើបានយ៉ាងល្អរហូតអ្នកគាំទ្រ និងសិល្បកររួមអាជីពលាន់មាត់សរសើរនាងព្រោងព្រាត។
ខណៈការងារសិល្បៈកំពុងឡើងកូដខ្លាំង សម្រស់ និងរូបរាងនាងក៏ប្រែប្រួលដូចគ្នាដែរ រហូតមានអ្នកគិតថា នាងអាចជ្រើសយកការកែសម្ផស្ស ដើម្បីកែកុនភាពខ្វះខាតមួយចំនួន ដូចអ្វីដែលសិល្បករនិយមធ្វើនាពេលនេះ។ ពាក់ព័ន្ធរឿងនេះ ស្រីច័ន្ទ បានប្រាប់ឱ្យអ្នកសារព័ត៌មានសិល្បៈក្នុងស្រុកដឹងថា សម្រស់នាងប្រែប្រួលខ្លាំងបែបនេះ មិនមែនដោយសារនាងទៅវះកាត់កែសម្ផស្សទេ គឺដោយសារតែនាងស្រកគីឡូតែប៉ុណ្ណោះ។
Kate រៀបរាប់ថា នាងចាប់ផ្តើមសម្រកគីឡូនៅពេលដែលចូលថតភាពយន្តដំបូងៗ ព្រោះមិនចង់ឱ្យឃើញធំពេកនៅពេលថតរឿង ហើយការស្រកគីឡូបានឆាប់រហ័សបែបនេះ គឺដោយសារការងារច្រើន ហើយនាងព្យាយាមតបអាហារ និងឆ្លៀតពេលហាត់ប្រាណខ្លះៗផងដែរ។ តារាសម្តែងរាងតូចច្រឡឹងនេះបង្ហើបថា គន្លឹះងាយៗដើម្បីថែរក្សាសម្រស់រូបរាងកាយឱ្យក្មេងជាងវ័យ គឺគួរប្តូរទម្លាប់ងើបពេលព្រឹក គេងឱ្យទៀតទាត់ តមអាហារ និងឆ្លៀតពេលហាត់ប្រាណយ៉ាងហោចណាស់ ៣-៤ ដងក្នុងមួយសប្តាហ៍។
ខាត់ ស្រីច័ន្ទ ជឿជាក់ថា ការថែរក្សាសម្រស់ជារឿងចាំបាច់បំផុត សម្រាប់មនុស្សស្រី មិនថាសិល្បករក្នុងរង្វង់សិល្បៈ ឬអ្នកក្រៅសិល្បៈនោះទេ។ ដូច្នេះ គ្រប់គ្នាគួរណាស់តែថែរក្សាសម្រស់ និងសុខភាពឱ្យល្អ ព្រោះពេលយើងស្រស់ស្អាត យើងនឹងមានអារម្មណ៍ល្អ ហើយមានទំនុកចិត្តលើខ្លួនឯងថែមទៀត។
ក្រៅពីពង្រឹងអាជីពពិធីការិនី ខាត់ ស្រីច័ន្ទ ក៏នឹងបង្ហាញខ្លួនក្នុងរឿងភាគថ្មីមួយ ចំណងជើង «ស្នេហា Cover» ជាស្នាដៃតែងនិពន្ធ និងដឹកនាំរឿងដោយ អ្នកស្រី ពាន់ ភួងបុផ្ផា ផងដែរ។ តារាសម្តែងរូបនេះរំពឹងថា ឆ្នាំថ្មីនេះកេរ្តិ៍ឈ្មោះនាងនឹងល្បីល្បាញឡើងថែមមួយកម្រិតទៀត ទាំងស្នាដៃសម្តែង ពិធីការិនី បង្ហាញម៉ូដ ហើយថ្មីៗនេះ នាងក៏ទើបចុះកុងត្រាការងារជាច្រើនជាមួយផលិតកម្ម និងក្រុមហ៊ុនផ្សេងៗជាច្រើន ធ្វើឱ្យនាងមមាញឹកកាន់តែខ្លាំងឡើង៕























Account
Security
Favourite Content