កាលពីថ្មីៗ នេះ តារាសម្ដែងប្រុស Ahn Bo-Hyun បានបង្ហាញខ្លួនក្នុងវីដេអូយូធូបរបស់ “Geean84” និងបាននិយាយចែករំលែកពីបទពិសោធន៍នានាទាំងការងារ និងជីវិតឯកជន។


កំឡុងពេលជជែកគ្នាបណ្ដើរ ញ៉ាំអាហារបណ្ដើរ តារាប្រុស Ahn Bo-Hyun ត្រូវពិធីករចោទសួរថា៖ តើលោកនៅចង់បន្ដក្ដីស្រមៃធ្វើជាតារាសម្ដែងនៅពេលអនាគត ឬក៏ចង់ចាប់ផ្ដើមផ្ដោតលើជីវិតគ្រួសារ និងរៀបការ? សម្រាប់លោក តើរឿងទាំងពីរនេះមួយណា លោកគិតថាវាមានសារៈសំខាន់ជាង?
ជាការឆ្លើយតប តារាប្រុស Ahn Bo-Hyun បានលើកឡើងថា៖ សម្រាប់លោក គ្រួសារគឺជារឿងសំខាន់មួយ និងអាចនិយាយបានទុកនៅលំដាប់លេខរៀងទី ១ ខណៈការងារគឺលេខ ២។ ប៉ុន្ដែលោកក៏មិនចង់បោះបង់ការសម្ដែងរបស់ខ្លួន និងនៅតែចង់បន្ដធ្វើជាតារាសម្ដែងនៅពេលអនាគត។



លោកបានបន្ដថា៖ កាលនៅវ័យក្មេង លោកធ្លាប់បានគិតចង់រៀបការ បង្កើតគ្រួសារនៅពេលដែលដល់អាយុ ២៩ ឆ្នាំ។ លោកធ្លាប់ចង់ក្លាយជាមនុស្សម្នាក់ដែលមិនយកប្រាក់ជាធំ និងឈ្លក់វង្វេងនឹងប្រាក់។ តែរឿងរ៉ាវទាំងអស់មិនអាចកើតឡើងដូចព្រាងទុកបាននោះទេ។
នៅពេលសួរដល់រឿង តើតារាប្រុស Ahn Bo-Young មានគំនិតចង់រៀបការទេ? តារាប្រុសរូបនេះក៏បានបញ្ជាក់ថា៖ លោកមិនចង់រៀបការឡើយ។ តែពេលខ្លះនៅពេលដែលឃើញមនុស្សជាច្រើនរៀបការមានសុភមង្គល លោកក៏មានអារម្មណ៍ចង់រៀបការដែរ។



គួរបញ្ជាក់ថា តារាប្រុស Ahn Bo-Hyun បានក្លាយជាទីចាប់អារម្មណ៍របស់មហាជនជាច្រើន ក្រោយលោកប្រកាសពីទំនាក់ទំនងស្នេហាជាមួយសមាជិកក្រុមចម្រៀងនារីល្បី BLACKPINK គឺ Jisoo កាលពីឆ្នាំ ២០២៣។ សេពគប់គ្នា បានជិត ៣ ខែ អ្នកទាំងពីរក៏ប្រកាសដំណឺងបែកគ្នា ចំពោះមូលហេតុដោយសារមានការជាប់រវល់រៀងខ្លួន គ្មានពេលវេលាសម្រាប់គ្នា។ ជាមួយគ្នាដែរ ចម្លើយរបស់តារាប្រុស Ahn Bo-Hyun ត្រូវបានមហាជនជឿថា ជាផ្នែកមួយដែលធ្វើឲ្យអ្នកទាំងពីរសម្រេចចែកផ្លូវគ្នា ដោយអ្នកទាំងពីរមិនទាន់រៀបត្រៀមខ្លួនរួចរាល់ បង្កើតគ្រួសារ ឬបន្ដចំណងស្នេហានេះឲ្យបានយូរឡើយ៕























Account
Security
Favourite Content