នៅថ្ងៃទី៣ ខែមេសានេះ Jin សមាជិក្រុម BTS បានលេចវត្តមាននៅក្នុងទីក្រុង Adong ដែលជាទីតាំងទទួលរងផលប៉ះពាល់ពីហេតុការណ៍ភ្លើងឆេះព្រៃកាលពីពេលថ្មីៗនេះ ដោយលោកបានចួលរួមបម្រើអាហារដល់ប្រជាជនរងគ្រោះ។

សកម្មភាពខាងលើនេះបានកើតឡើងនៅក្នុងសាលា Gilan Middle School ដោយ Jin បានបំពេញការងារស្ម័គ្រចិត្តជាអ្នកដួសម្ហូបអាហារជូនដល់ប្រជាជននៅក្នុងតំបន់នោះ។ ដ្បិតមិនបានបង្ហាញអត្តសញ្ញាណជាសាធារណៈ និងបានពាក់មួកពាក់ម៉ាស់ទៅហើយក្ដី អ្នកស្រុកជាច្រើនរូបនៅតែអាចចំណាំតារាប្រុសរូបនេះបាន។
ផ្អែកតាមសារព័ត៌មាន Allkpop អ្នកស្រុកម្នាក់បាននិយាយថា៖ “ខ្ញុំបានឭគេនិយាយថា គាត់ជាតារាល្បី តែសម្រាប់ខ្ញុំ គាត់គឺជាយុវជនវ័យក្មេងម្នាក់ដែលមានចិត្តល្អ និងតាំងចិត្តធ្វើការណាស់។ បើទៅបីជា នៅក្នុងចំណោមអ្នកស្ម័គ្រចិត្តដទៃទៀតក្ដី គេនៅតែផ្ដោតអារម្មណ៍លើការងារ និងមិនព្យាយាមទាក់ទាញចំណាប់អារម្មណ៍ឡើយ”។
ក្រៅពីតួនាទីខាងលើនេះ តារាប្រុសវ័យ ៣២ឆ្នាំ ក៏បានផ្ដល់ការគាំទ្រផ្នែកផ្លូវអារម្មណ៍ចំពោះជនរងគ្រោះផងដែរ។ ជាក់ស្ដេង លោកបានពោលពាក្យលើកទឹកចិត្ត និងបង្ហាញក្ដីសង្ឈឹមចំពោះប្រជាជននៅក្នុងតំបន់នេះ ថាពួកគេនឹងអាចរួចផុតពីពេលវេលាដ៏លំបាកនេះបាន។
គួរបញ្ជាក់ផងដែរថា ហេតុការណ៍ភ្លើងឆេះព្រៃខាងលើបានចប់ផ្ដើមឡើងកាលពីថ្ងៃទី២១ ខែមីនា ក្នុងតំបន់ Uiseong, Cheongsong, Yeongyang និង Yeongdeok ខេត្ត Gyeongsang ភាគអាគ្នេយ៍របស់កូរ៉េខាងត្បូង ដោយបានឆក់យកជីវិតមនុស្សយ៉ាងហោចណាស់ ៣០នាក់ និងមនុស្សជាង ៣៣ ០០០នាក់ទៀតត្រូវជម្លៀសខ្លួន។ នេះបើយោងតាមកាសែត Korea Times។
អគ្គិភ័យដែលឆាបឆេះដោយសារតែអាកាសស្ងួតនេះ បានរាលដាលលើផ្ទៃដៃ ៤៨ ២៣៨ ហិកតា ចាត់ទុកជាហេតុការណ៍ភ្លើងឆេះព្រៃដ៏អាក្រក់បំផុតនៅក្នុងប្រវត្តិសាស្ត្ររបស់កូរ៉េខាងត្បូង៕
























Account
Security
Favourite Content