តារាសម្ដែងស្រីកូរ៉េខាងត្បូង Ji Yeon Soo ដែលសាធារណជនជាទូទៅស្គាល់ថាជា អតីតភរិយារបស់តារាចម្រៀងសមាជិកក្រុម U-KISS លោក Eli បានរំឭកដល់គ្រាដ៏ពិបាកបំផុតនៅក្នុងជីវិតរបស់ខ្លួន ដោយមិនភ្លេចដឹងគុណថា ដោយសារតែចម្រៀងរបស់ G-Dragon ទើបខ្លួននិងកូនអាចរស់រានមកដល់សព្វថ្ងៃនេះ។
កាលពីថ្ងៃទី៧ ខែធ្នូកន្លងមក Ji Yeon Soo បានបង្ហោះសារនៅលើបណ្ដាញទំនាក់ទំនងសង្គម Instagram ផ្ទាល់ខ្លួនដោយភ្ជាប់ជាមួយនឹងវីដេអូបស់កូនប្រុស Min Soo ព្រមសរសេរបញ្ជាក់ថា កាលនោះបើគ្មានបទ Crooked របស់សមាជិក BIGBANG ទេ ក៏ប្រហែលជាគ្មាននាងនៅថ្ងៃនេះដែរ។
អ្នកមេម៉ាយរូបនេះបានរៀបរាប់ថា៖ “ថ្ងៃ៣ ខែធ្នូ ឆ្នាំ២០១៥ ជាពេលដែលខ្ញុំពិបាកចិត្តបំផុតនៅក្នុងជីវិត ខុសគ្នាពីក្ដីសុខដែលខ្ញុំមានកាលពីខែកញ្ញានៅពេលខ្ញុំនឹងថា ខ្ញុំទម្ងន់ Min Soo។ នៅថ្ងៃនេះ ខ្ញុំគិតថាអនាគតរបស់ខ្ញុំវាបានរលាយបាត់ទៅហើយ ខ្ញុំក៏លែងអាចមានជីវិតបន្តទៅទៀតដែរ”។
ភ្ជាប់ជាមួយនឹងវីដេអូដែលខ្លួន និងកូនប្រុសច្រៀងបទ Crooked របស់ G-Dragon ចេញតាំងតែពីឆ្នាំ ២០១៣ លោកស្រីបានសរសេរបន្ថែមថា៖ “Min Soo នៅពេលដែលកូននៅក្នុងពោះរបស់ម៉ាក់ ហើយម៉ាក់មិនអាចធ្វើអ្វីបាន បទមួយនេះបានជួយជីវិតយ៉ាងទាំងពីរនាក់។ ខ្ញុំស្ដាប់មិនដឹងប៉ុន្មានរយដងទេ ក្នុងពេលជាច្រើនឆ្នាំកន្លងមក ខ្ញុំដឹងថាវាអស្ចារ្យខ្លាំងប៉ុណ្ណា ដែលចម្រៀងមួយបទអាចជួយសង្គ្រោះជីវិតរបស់មនុស្សម្នាក់បាន”។
“អរគុណដែលតែងតែនៅជាមួយខ្ញុំ។ ខ្ញុំបានព្យាយាមតស៊ូ រហូតអាចរស់នៅយ៉ាងមានក្ដីសុខដូចសព្វថ្ងៃនេះ។ អរគុណ(Min Soo) ដែលហាត់ច្រៀងបទ Crooked សម្រាប់ខ្ញុំនៅថ្ងៃបុណ្យណូអែល” Ji Yeon Soo បញ្ចប់សំណេររបស់ខ្លួនដូច្នេះ។
គួរបញ្ជាក់ដែរថា Ji Yeon Soo និងអតីតស្វាមីលោក Eli Kim បានផ្ដាច់ចំណងអាពាហ៍ពិពាហ៍រវាងអ្នកទាំងពីរកាលពីឆ្នាំ ២០២០ ក្រោយរៀបការជាមួយគ្នាបានត្រឹម ៦ឆ្នាំ។ ត្បិតកាលពីឆ្នាំ ២០២២ កម្មវិធី We Got Divorced 2 បានព្យាយាមផ្សះផ្សាទំនាក់ទំនងអ្នកទាំងពីរទៅហើយក្ដី តែជីវិតអាពាហ៍ពិពាហ៍នៅតែមិនអាចត្រឡប់មកវិញដូចដើម ដោយគ្រានោះ Eli បានរៀបរាប់ពីភាពមិនស្រណុកខ្លួននៅពេលដែលរួមរស់ជាមួយគ្នា ព្រមទាំងសារភាពថា លោកលែងស្រឡាញ់ Ji Yeon Soo ក្នុងនាមជាមនុស្សស្រីម្នាក់ទៀតហើយ តែលោកស្រឡាញ់នាងត្រឹមនាមជាម្ដាយរបស់កូនប្រុសលោកតែប៉ុណ្ណោះ៕