រយៈពេល ៩ ឆ្នាំក្រោយចាកចេញពីក្រុមចម្រៀង Girls’ Generation អតីតសមាជិក Jessica ទម្លាយពីអារម្មណ៍ពិត និងពេលវេលាដ៏ខ្មៅងងឹតក្នុងជីវិតនាង។

ថ្មីៗ នេះ Jessica Jung អតីតសមាជិកក្រុម Girls’ Generation បានត្រឡប់មកវិញជាមួយអាល់ប៊ុម BEEP BEEP ដែលបានបញ្ចេញក្នុងនៅខែ វិច្ឆិកា ឆ្នាំ ២០២៣។ អាល់ប៊ុមនេះ ជាអាល់ប៊ុមដំបូងដែល Jessica បានចេញលើកដំបូងក្នុងរយៈពេល ៦ ឆ្នាំ។ ជាមួយគ្នាដែរ រូបនាងបានបង្ហាញខ្លួនក្នុងកម្មវិធី Daily Ketchup និងនិយាយពីរឿងរ៉ាវជាច្រើនទាក់ទងនឹងអាជីពជាអ្នកសិល្បៈរបស់នាង។

Jessica បានលើកឡើងថា៖ មិនត្រឹមជាសមាជិក Girls’ Generation នាងត្រូវបានមហាជនជាច្រើនទទួលស្គាល់តាមរយៈការលេងស្ទីល Fashion។ នាងមានអារម្មណ៍ថា ការបង្កើតប្រេន BLANC & ECLARE ពិតជាគម្រោងដ៏ល្អមួយសម្រាប់នាង ខណៈនាងនឹងផ្ដោតទៅលើប្រេនមួយនេះ។ នាងក៏បានទម្លាយពីអារម្មណ៍របស់ខ្លួនក្រោយចាកចេញពីក្រុមចម្រៀង Girls’ Generation ដែរ។

នាងបានលើកឡើងថា៖ នាងព្យាយាមទុកអតីតកាលចោល មិនចង់រំឭកពីវាទៀតទេ។ នាងតែងតែសំឡឹងមើលទៅកាន់ផ្លូវល្អ កាលនោះវាពិតជាពេលវេលាដ៏ខ្មៅងងឹតបំផុតសម្រាប់នាង។ ប៉ុន្ដែជាសំណាង មានក្រុមគ្រួសារ មិត្ដភ័ក្ដិ និងអ្នកគាំទ្រតែងនៅក្បែរគាំទ្រដល់រូបនាង។ នាងមានអារម្មណ៍ថា នាងមិនឯកាឡើយ ជាពិសេសវាគឺពេលវេលាដែលអាចឲ្យនាងរៀនសូត្របានច្រើនជាងមុន និងធំដឹងក្ដីផងដែរ។

គួរបញ្ជាក់ Jessica បានបង្ហាញខ្លួនជាសមាជិកក្រុម Girls’ Generation ក្នុងឆ្នាំ ២០០៧ និងបន្ដជាសមាជិករបស់ក្រុមចម្រៀងមួយនេះរហូតដល់ឆ្នាំ ២០១៤។ ក្នុងឆ្នាំ ២០១៤ រូបនាងបានប្រកាសក្នុងបណ្ដាញសង្គម Weibo របស់ខ្លួនថា៖ នាងត្រូវបង្ខំឲ្យចាកចេញពីក្រុម។ នាងត្រូវបង្ខំឲ្យជ្រើសរើសរវាងបន្ដធ្វើជាសមាជិកក្រុម ឬជ្រើសប្រេនសម្លៀកបំពាក់របស់នាង។ នាងត្រូវគេបានដកចេញពីក្រុម និងបញ្ជាក់ប្រាប់ថានាងលែងជាសមាជិកក្រុមទៀតហើយ៕

























Account
Security
Favourite Content