HBO បានដាក់ឈ្មោះ Lisa សម្រាប់ប្រកួតប្រជែងពានរង្វាន់ តួរងឆ្នើមពីកម្មវិធី Emmy Awards ប្រចាំឆ្នាំ ២០២៥ ចំពោះស្នាដៃសម្ដែងជាតួអង្គ Mook នៅក្នុងរឿង The White Lotus រដូវកាលទី ៣។ ទន្ទឹមគ្នានឹងការកោតសរសើរ អ្នកប្រើប្រាស់បណ្ដាលទំនាក់ទំនងខ្លះលើកឡើងថា នាងមិនទាន់មានសមត្ថភាពគ្រប់គ្រាន់។

ជាក់ស្ដែង នេះជាការងារសម្ដែងលើកទី១របស់ Lisa ដោយនៅក្នុងរឿងភាគនិយាយពីដំណើរកម្សាន្តរបស់ក្រុមអ្នកមាន ដែលទទួលបានការគាំទ្រខ្លាំងជាមួយនឹងអ្នកទស្សនាជាមធ្យមប្រមាណ ១៦លាននាក់ក្នុងមួយភាគ តារាខេប៉ុបរូបនេះបានទទួលតួនាទីជា តួអង្គ Mook ដែលជាបុគ្គលិកនៅក្នុងរីស៊តប្រណិត និងជាអ្នកណែនាំផ្នែកសុខភាពម្នាក់។
យោងតាមព័ត៌មានពី Gold Derby ផលិតកម្មហូលីវូដខាងលើបានបញ្ចូនរឿង The White Lotus ទៅកាន់គណៈកម្មការដើម្បីស្នើសុំសិទ្ធិជាបេក្ខភាពដណ្ដើមពានរង្វាន់រហូតដល់ទៅ ៣៩ពានពីកម្មវិធី Emmy Awards ក្នុងឆ្នាំនេះ រួមទាំងឈ្មោះរបស់ Lisa សម្រាប់ពានរង្វាន់ តួរងឆ្នើម លើផ្នែករឿងភាគ។

ជាការឆ្លើយតបពីមហាជន អ្នកគាំទ្រជាច្រើនរូបបានចេញមុខសរសើរដល់ការសម្ដែង និងលើកទឹកចិត្តថា តារាស្រីវ័យ ២៨ឆ្នាំរូបនេះ គួរតែមានស្នាដៃបន្ថែមទៀតនៅក្នុងវិស័យភាពយន្ត។ ជាក់ស្ដែង ម្ចាស់គណនី X ម្នាក់បានសរសេរថា៖ “នាងអាចនឹងមានឱកាសឈ្នះ ការសម្ដែងរបស់នាងពិតជាល្អណាស់”។
យ៉ាងណាមិញ មហាជនមួយក្រុមទៀតបានបង្ហាញមតិផ្ទុយគ្នា ដោយមានការលើកឡើងថា ការសម្ដែងរបស់ Lisa គឺគួរសម តែតារាស្រីគួរឱ្យមានបទពិសោធន៍ និងមានស្នាដៃលេចធ្លោជាងនេះ។ តួយ៉ាង ម្ចាស់គណនី X ម្នាក់ទៀតបានសរសេរថា៖ “វាអាចស្ដាប់ទៅប្លែក តែខ្ញុំសុំទោស។ Lisa អាចនឹងចង់ចាប់ផ្ដើមអាជីពសម្ដែង តែនាងត្រូវការបទពិសោធន៍បន្ថែមទៀត និងផ្ដោតលើអាជីពនេះតែម្ដង”។

និយាយពីការយល់ឃើញរបស់អ្នកជំនាញវិញ កន្លងមកទស្សនាវដ្ដី Out ក៏ធ្លាប់បានលើកឡើងពីការសម្ដែងរបស់សមាជិក Blackpink ដែរថា Lisa ពិតជាបានបំពេញការងាររបស់ខ្លួនបានល្អ ក៏ប៉ុន្តែតួអង្គរបស់នាងគឺធម្មតា ដែលទស្សនិកជនអាចនឹងងាយភ្លេច ព្រោះតែតួ Mook មិនមានលក្ខណៈសំខាន់ និងជាប់ពាក់ព័ន្ធនឹងសាច់រឿងច្រើនគ្រប់គ្រាន់។
គួរឱ្យដឹងផងដែរថា ដ្បិត HBO បានស្នើឈ្មោះរបស់ Lisa ក៏ពិតមែន តែនាងនៅមិនទទួលបានឈ្មោះជា បេក្ខភាពពេញសិទ្ធិសម្រាប់ដើម្បីពានរង្វាន់នៅឡើយទេ។ ឯកម្មវិធី Emmy Awards ឆ្នាំ ២០២៥ វិញ នឹងធ្វើឡើងនៅថ្ងៃទី១៥ ខែកញ្ញា ខាងមុខនេះ៕
























Account
Security
Favourite Content