ការប្រកួតវគ្គផ្តាច់ព្រ័ត្រនៃកម្មវិធី Miss Queen Cambodia 2024 និងកម្មវិធី Misters of Cambodia 2024 បានបញ្ចប់ទៅហើយ កាលពីយប់ថ្ងៃទី៤ ខែឧសភា ឆ្នាំ ២០២៤ ដែលក្នុងនោះ បានរកឃើញម្ចាស់ជយលាភី Miss Queen Cambodia 2024 ចំនួន ២ រូប និងម្ចាស់ជយលាភី Misters of Cambodia 2024។
ម្ចាស់ជយលាភី ២រូប នៃកម្មវិធី Miss Queen Cambodia 2024 រួមមាន ហានី បានឈ្នះមកុដ Miss Queen Cambodia 2024 ត្រៀមតំណាងកម្ពុជាទៅប្រកួតកម្មវិធីអន្តរជាតិនាពេលឆាប់ៗនេះ ខណៈ នៀន នៀន ក្លាយជាបវរកញ្ញាភេទទី៣ កម្ពុជាដំបូងគេបង្អស់ដែលឈ្នះតំណែង Grand Winner Miss Queen Cambodia 2024 (ជយលាភីថ្មីមួយទៀតដែលក្រុមហ៊ុន CIM ទើបដាក់បញ្ជូលក្នុងកម្មវិធី MQC 2024)។
ម្ចាស់ជយលាភី Grand Winner Miss Queen Cambodia 2024 ត្រូវបានក្រុមហ៊ុន Cambodia Internatinal Models ជ្រើសតាំងជា Miss Star Cambodia 2024 ត្រៀមតំណាងប្រទេសកម្ពុជាទៅប្រកួតកម្មវិធី Miss Star International 2024 នៅប្រទេសប្រេស៊ីល នាអំឡុងខែធ្នូ ឆ្នាំ ២០២៤ ខាងមុខនេះ។

ហានី និង នៀន នៀន បានបង្ហាញអារម្មណ៍រំភើបក្រៃលែង ក្រោយឈ្នះតំណែង Miss Queen Cambodia 2024 ព្រោះទាំងពីរនាក់ពុំនឹកស្មានថា អាចមានឱកាសបានកាន់ដៃគ្នាក្នុងវិនាទីចុងក្រោយនៃការប្រកាសជយលាភីនោះទេ។

ហានី លើកឡើងថា ទីបំផុតក្តីស្រមៃដ៏ធំរបស់នាងក្លាយជាការពិតហើយ នាងពិតជារំភើបខ្លាំងរកអ្វីប្រៀបផ្ទឹមពុំបានឡើយ ពិសេសគឺនាងមានឱកាសតំណាងកម្ពុជាចូលរួមប្រកួតលើឆាកអន្តរជាតិនាពេលឆាប់ៗនេះ។ ម្ចាស់មកុដ MQC 2024 ប្តេជ្ញាខិតខំពង្រឹងសមត្ថភាពបន្ថែម និងប្រតិបត្តិខ្លួនឱ្យបានល្អស័ក្តិសមជាម្ចាស់មកុដ MQC 2024។


ក្រឡេកទៅមើល នៀន នៀន ឯណោះវិញ រំភើបខ្លាំងរហូតស្រក់ទឹកភ្នែក ពេលឮពិធីករប្រកាសថា នាងឈ្នះតំណែង Grand Winner Miss Queen Cambodia 2024។ នាងធ្លាប់លួចរំពឹងថា ខ្លួនអាចដណ្តើមមកុដ MQC 2024 តែមិននឹកស្មានថា នាងអាចបានក្លាយជាបវរកញ្ញាភេទទី៣ កម្ពុជា ដំបូងគេបង្អស់ដែលឈ្នះតំណែង Grand Winner នោះទេ។
បវរកញ្ញារូបស្រស់នេះ គ្មានអ្វីក្រៅពីពាក្យអរគុណទៅកាន់ក្រុមហ៊ុន CIM ក្រុមគ្រួសារ បណ្តាអ្នក sponsor និងមនុស្សជាទីស្រលាញ់ជុំវិញខ្លួន ដែលតែងជំរុញលើកទឹកចិត្ត ហើយជឿជាក់ថា នាងអាចធ្វើបាន។


នៀន នៀន ថា នាងនឹងខិតខំហ្វឹកហាត់ពង្រឹងចំណុចខ្វះខាតផ្សេងៗ ដើម្បីត្រៀមតំណាងកម្ពុជាទៅចូលរួមប្រកួតប្រជែងកម្មវិធី Miss Star International 2024 នៅប្រេស៊ីល នាអំឡុងខែធ្នូ ឆ្នាំ ២០២៤ ខាងមុខ។ នេះជាជំហានដំបូងនៃបវរកញ្ញាភេទទីបីកម្ពុជាឆ្ពោះទៅទ្វីបអាមេរិកខាងត្បូង។
ក្នុងនោះផងដែរ លោក ម៉ែន និមលរតន៍ នាយកប្រតិបត្តិក្រុមហ៊ុន Cambodia International Models (CIM) សង្ឃឹមថា ម្ចាស់ជយលាភីទាំងពីររូបនឹងអាចបំបែកកំណត់ត្រាបើកទ្វារអន្តរជាតិសម្រាប់ប្រទេសកម្ពុជាលើឆាកអន្តរជាតិ ឱ្យកម្ពុជាមានស្មើមុខស្មើមាត់ជាមួយប្រទេសដទៃក្នុងការប្រកួតអន្តរជាតិ៕
























Account
Security
Favourite Content