ចាប់តាំងពីរៀបការក្នុងឆ្នាំ ២០០៨ មកតារាសម្ដែងស្រីជើងចាស់ហុងកុង Gigi Lai បានសម្រេចចិត្តចូលនិវត្តន៍ពីឧស្សាហកម្មកម្សាន្ដ ហើយក៏បានក្លាយខ្លួនជាអ្នកជំនួញជោគជ័យម្នាក់ផងដែរ។ នៅក្នុងកម្មវិធីរបស់ធនាគារមួយ នាងបានផ្ដល់បទសម្ភាសពីការចិញ្ចឹមកូនស្រី និងក្ដីប្រាថ្នារបស់ពួកគេ។

តួឯកស្រី ចាវមៀន រឿង «ចាង អ៊ូជី» ឆ្នាំ ២០០១ រូបនេះមានកូនស្រីច្បងជាកូនភ្លោះមានអាយុ ១៤ ឆ្នាំ ខណៈកូនស្រីពៅមានអាយុ ១១ ឆ្នាំ។ នាងបាននិយាយថាកូនស្រីរបស់នាងស្រឡាញ់ធម្មជាតិ និងការប្រើប្រាស់បច្ចេកទេស AI ដើម្បីបង្កើតសិល្បៈថ្មី ដូច្នេះទើបនាងតែងតែនាំកូនស្រីទៅទស្សនាវិចិត្រសាលសិល្បៈក្នុងស្រុក និងក្រៅប្រទេសដើម្បីបង្ហាញពួកគេពីភាពខុសប្លែកគ្នា។
នៅពេលដែលសួរដល់រឿងគម្រោងបញ្ជូនកូនស្រីទៅរៀនក្រៅប្រទេស ឬយ៉ាងណា នាងបានឆ្លើយវិញថាពេលនេះនាងមិនទាន់បានគិតទៅដល់រឿងនេះនៅឡើយទេ។ នាងត្រូវការពេលត្រៀមចិត្តជាមុនសិនព្រោះកូនរបស់នាងពេលនេះមិនមែនជាកូនក្មេងតូចៗដូចកាលពីមុនឡើយដោយពួកគេមានចិត្តគំនិតផ្ទាល់ខ្លួន ហើយក៏ត្រូវរៀនរស់នៅដោយឯករាជ្យផងដែរ។ ដូច្នេះហើយសម្រាប់នាង នាងគ្រាន់តែចង់ឱ្យកូនៗមានសុខភាពល្អ និងសុភមង្គលប៉ុណ្ណោះ។

មកដល់ពេលនេះ Gigi ដែលមានវ័យ ៥២ ឆ្នាំ ក៏មិនទាន់ច្បាស់ពីគោលដៅអនាគតក្នុងជីវិតរបស់កូនស្រីនាងនៅឡើយទេ ទើបនាងចង់ផ្ដល់សេរីភាពឱ្យពួកគេក្នុងការជ្រើសរើសសម្រេចគោលដៅអនាគតដោយខ្លួនឯង។ នាងយល់ថាពួកគេនៅក្មេង ដូច្នេះហើយនាងអាចរង់ចាំការសម្រេចចិត្តរបស់កូនដោយមានគំនិតផ្ទាល់ខ្លួន។ នាងគោរពតាមជានិច្ច អ្វីដែលសំខាន់នោះគឺពួកគេចេះរៀនសូត្រ មានមហិច្ឆតា និងរៀនពីរបៀបទំនាក់ទំនងជាមួយអ្នកដទៃព្រមទាំងស្គាល់តម្លៃក្នុងជិវិតផងដែរ។

ប្រសិនបើនិយាយពីជីវិតផ្ទាល់ខ្លួននាងវិញ ថ្មីៗនេះ Gigi ក៏បានជួបជាមួយមិត្តរួមការងារចាស់ Charmaine Sheh នៅកន្លែងហាត់ប្រាណថែមទាំងមានគ្រូបង្វឹកផ្ទាល់ជាមនុស្សតែមួយទៀតផង។ ក្រៅពីនោះនាងក៏នៅតែរក្សាទំនាក់ទំនងជាមួយ Ada Choi, Sheren Tang, Ekin Cheng និង Bowie Lam ផងដែរ។ ជាចុងក្រោយ Gigi ក៏បានឱ្យបានដឹងដែរថានាងពិតជានឹកការសម្ដែង ប៉ុន្តែដោយសារតែវាត្រូវការរយៈពេលយូរដើម្បីថត ដូច្នេះហើយនាងមិនអាចទទួលការថតខ្សែភាពយន្ដណាមួយឡើយ បើទោះបីជាមានគេទាក់ទងមកនាងញឹកញាប់ក៏ដោយ។ នាងនឹងពិចារណានៅពេលអនាគត ប្រសិនបើនាងមានពេលគ្រប់គ្រាន់៕



























Account
Security
Favourite Content