កាលពីឆ្នាំ ២០២២ Lay សមាជិកក្រុមចម្រៀងល្បី EXO បានប្រកាសចាកចេញពីផលិតកម្ម SM entertainment។ ការចាកចេញពីផលិតកម្ម គឺក្នុងគោលបំណងស្វែងរកអ្វីដែលថ្មីសម្រាប់អាជីពសិល្បៈរបស់លោកនៅប្រទេសចិន ជាទឹកដីកំណើតរបស់ខ្លួន។ ការប្រកាសចេញពីផលិតកម្មធ្វើឲ្យតារាប្រុសរូបនេះ បានឃ្លាតឆ្ងាយពីមិត្ដរួមអាជីពជាច្រើននៅកូរ៉េខាងត្បូង ជាពិសេសមិត្តភ័ក្ដិស្ថិតក្រោមទ្រនំជាមួយគ្នា SM entertainment តែម្ដង។
ថ្មីៗនេះ Lay និង HeeChul សមាជិកក្រុម Super Junior ត្រូវបានអ្នកគាំទ្រប្រទះឃើញ ដើរជាមួយគ្នាយ៉ាងស្និទ្ធស្នាលនៅឯព្រលានយន្ដហោះ ប្រទេសកូរ៉េខាងត្បូង។ បើតាមសម្ដីរបស់អ្នកគាំទ្រ គឺអ្នកទាំងពីរបានជួបគ្នា នៅឯព្រលានយន្ដហោះតែម្ដង។ អ្នកទាំងពីរបានដើរបណ្ដើរ និយាយគ្នាយ៉ាងយកចិត្ដទុកដាក់ និងសួរនាំគ្នាបណ្ដើរ។
ជាមួយគ្នាដែរ មុនបង្ហាញខ្លួននៅព្រលានយន្ដហោះ សមាជិកក្រុមចម្រៀង Exo រូបនេះក៏បានធ្វើជំនួបអ្នកគាំទ្រនៅឯប្រទេសជប៉ុន។ ម្ចាស់បទ “Run Back To You” បានលើកឡើងថា លោកតែងតែខិតខំប្រឹងប្រែងដូចសមាជិកផ្សេងទៀត លោកមិនចង់ឲ្យក្រុម EXO មានការខកបំណងចំពោះលោក។ លោកបានទទួលក្ដីស្រឡាញ់យ៉ាងច្រើនពីសមាជិក ដូច្នេះធ្វើឲ្យលោកកាន់តែខិតខំប្រឹងប្រែងជាងមុនលើរឿងគ្រប់យ៉ាង។
ទន្ទឹមនេះ Lay បានលើកឡើងថា ក្រុមចម្រៀងរាមច្បង Super Junior គឺជាផ្នែកមួយជំរុញចិត្ដឲ្យលោកខិតខំប្រឹងប្រែង និងតស៊ូរហូតបានក្លាយជាសមាជិកក្រុមចម្រៀងខេប៉ុប។ ក្រៅពីមានភាពស្និទ្ធស្នាលជាមួយមិត្ដរួមក្រុម លោកក៏មានភាពស្និទ្ធស្នាលជាមួយសមាជិកក្រុម Super Junior ផងដែរ។
ពាក្យសម្ដី និងកាយវិការទាំងអស់នេះ ធ្វើឲ្យអ្នកគាំទ្រជាច្រើនហាក់មានការរំជួលចិត្ដ និងមានអារម្មណ៍កក់ក្ដៅ ដោយសារអស់រយៈពេលជាយូរមកហើយ ដែលពួកគេបានឃើញ Lay និយាយរំឮក ឬមានការទាក់ទងជាមួយតារាក្រោមផលិតកម្ម SM៕