សមាជិកក្រុមចម្រៀង EXID តារាស្រី Hani ត្រូវបានរាយការណ៍ថា នឹងចូលរោងមង្គលឆាប់ៗ ជាមួយមិត្ដប្រុសលោក Yang JaeWoong ដែលជាអ្នកជំនាញផ្នែកផ្លូវចិត្ដ។
យោងតាមប្រភពព័ត៌មានកូរ៉េ Sports Kyunghyang នាព្រឹកថ្ងៃទី ៣១ ខែ ឧសភា ឆ្នាំ ២០២៤ បានឲ្យដឹងថា តារាស្រី Hani និងមិត្ដប្រុសលោក Yang JaeWoong នឹងដឹកដៃគ្នាចូលរោងមង្គលសាងគ្រួសារនៅខែ កញ្ញា ឆ្នាំ ២០២៤ ខាងមុខនេះ បន្ទាប់ពីសេពគប់មើលចិត្ដថ្លើមគ្នាអស់រយៈពេល ៤ ឆ្នាំ។ បើទោះជាមានគម្លាតអាយុដល់ទៅ ១០ ឆ្នាំ ប៉ុន្ដែគូស្នេហ៍មួយគូនេះពិតជាមានភាពផ្អែមល្ហែម។ តារាស្រី Hani កើតនៅក្នុងឆ្នាំ ១៩៩២ រីឯមិត្ដប្រុសកើតក្នុងឆ្នាំ ១៩៨២។ មែនទែនទៅ តារាស្រី Hani ធ្លាប់បានរំឭកពីមិត្ដប្រុសជារឿយៗ ផងដែរ។



ជាការឆ្លើយតបពីផលិតកម្មរបស់តារាស្រី Sublime បានបញ្ជាក់ឲ្យដឹងថា៖ វារឿងឯកជនរបស់តារា ដូច្នេះពួកគេសុំមិនឆ្លើយតបច្រើននោះទេ។ បកត្រឡប់ កាលពីចុងឆ្នាំ ២០២៣ ប្រភពព័ត៌មានផ្ទៃក្នុងបានទម្លាយថា តារាស្រី Hani និងមិត្ដប្រុស មានបំណងចង់រៀបការសាងគ្រួសារ និងសង្ឃឹមអាចចូលរោងមង្គលនៅក្នុងឆ្នាំ ២០២៤។
គួរបញ្ជាក់ថា បច្ចុប្បន្នក្រៅពីការងារសិល្បៈ តារាស្រី Hani មានភាពមមាញឹកខ្លាំង ដោយសារនាងកំពុងរៀនផ្នែកចិត្ដវិទ្យា ហើយគោលបំណងរបស់នាងគឺចង់ជួយដល់មិត្ដរួមសិល្បៈ។ ប្រឡូកក្នុងអាជីពសិល្បៈអស់ជាច្រើនឆ្នាំមកហើយ នាងធ្លាប់ឃើញមិនរួមអាជីពមិនតិចទេដែលជួបទុក្ខលំបាក និងកំពុងប្រឆាំងជាមួយជំងឺផ្លូវចិត្ដ ធ្វើឱ្យនាងតាំងចិត្ដមោះមុតថា នឹងជួយដល់អ្នកដែលជួបបញ្ហាផ្លូវចិត្ដ នៅពេលបញ្ចប់ការសិក្សា៕

























Account
Security
Favourite Content