ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ព្រឹត្តិការណ៍ដេញថ្លៃសិល្បៈគំនូរ និងការដើរបង្ហាញម៉ូតសម្លៀកបំពាក់ច្នៃថ្មីដោយ លោក ចោម មួយ ក្នុងបំណងរៃអង្គាសមូលនិធិសប្បុរសធម៌ «រួមគ្នាបង្កើតពន្លឺថ្មីសម្រាប់ជីវិតរបស់ ឆលី – Save Charlie’s Life Together» កំពុងត្រៀមរៀបចំឡើងនៅថ្ងៃទី១៩ ខែឧសភា ឆ្នាំ ២០២៤ ខាងមុខ នៅទីតាំង Factory Phnom Penh ចាប់ពីម៉ោង ៥ ល្ងាចតទៅ។
ផ្តល់បទសម្ភាសន៍សន្និសីទសារព័ត៌មានប្រកាសរៀបចំកម្មវិធី «រួមគ្នាបង្កើតពន្លឺថ្មីសម្រាប់ជីវិតរបស់ ឆលី – Save Charlie’s Life Together» លោក ប្រាក់ សំណាង អ្នកផ្តួចផ្តើមបង្កើតកម្មវិធីសប្បុរសធម៌នេះបានឱ្យដឹងថា មែនទែនទៅកម្មវិធីសប្បុរសធម៌នេះកើតឡើងដោយសារកុមារាវ័យ ៤ ឆ្នាំ ឆលី កំពុងតស៊ូនឹងជំងឺមហារីកដុំសាច់ក្នុងខួរក្បាល កម្រិតធ្ងន់ធ្ងរ ហើយត្រូវការជំនួយថវិកាសម្រាប់ការព្យាបាលជាច្រើនដំណាក់កាល។ ដូច្នេះ លោកចង់បង្កើតកម្មវិធីមួយដែលអាចផ្តល់ការចង់ចាំ និងអនុស្សាវរីយ៍ល្អសម្រាប់សប្បុរជនតាមរយៈការដេញថ្លៃលក់វត្ថុសិល្បៈ ដូចជា ស្នាដៃគំនូរ និងឈុតសម្លៀកបំពាក់ច្នៃថ្មីដោយ designer ចោម មួយ ផងដែរ។
ស្នាដៃគំនូរពីសិល្បករប្រមាណជិត ៣០ នាក់ ព្រមជាមួយឈុតសម្លៀកបំពាក់ប្រហែលជាង ១០ ឈុតពី designer ចោម មួយ នឹងត្រូវដាក់ដេញថ្លៃភ្លាមៗក្នុងកម្មវិធីតែម្តង។ ក្នុងនោះ ថវិកាដែលទទួលបានពីការលក់សំបុត្រ និងការដេញថ្លៃខាងលើនឹងត្រូវបរិច្ចាគទៅកាន់មូនិធិរបស់ ឆលី ទាំងស្រុង ហើយអ្នកចូលរួមទាំងអស់ក៏អាចធ្វើការបរិច្ចាគថវិកាទៅមូនិធិរបស់ ឆលី ដោយផ្ទាល់បានផងដែរ។
លោក ព្រហ្ម ពន្លឺ សិល្បករគំនូរសហសម័យ និងត្រូវជាឪពុកបង្កើតរបស់ក្មេងប្រុស ឆលី បានបង្ហាញអារម្មណ៍ក្តុកក្តួលពេលឃើញសប្បុរជនច្រើនកុះករ រួមទាំងសិល្បកររួមអាជីពពួតដៃគ្នាជួយដល់កូនប្រុសរបស់លោកដែលកំពុងសម្រាកព្យាបាលនៅមន្ទីរពេទ្យប្រទេសថៃ។
ឪពុកកុមារា ឆលី រៀបរាប់ថា «ក្នុងនាមខ្ញុំជាឪពុករបស់ឆលី ខ្ញុំពិតជាមានសេចក្តីសោមនស្សរីករាយជាខ្លាំងនៅក្នុងការបង្កើតព្រឹត្តិការណ៍មួយនេះ ហើយការចូលរួមរបស់បងប្អូនទាំងអស់នៅក្នុងការជួយមកកូនប្រុសរបស់ខ្ញុំ អាចនិយាយបានថា ដង្ហើមរបស់កូនប្រុសរបស់ខ្ញុំដកបានដោយសារទឹកចិត្ត ១ ដុល្លារបស់បងប្អូន មួយកាក់ មួយសេន របស់បងប្អូនក៏ដោយ វាជាដង្ហើមនៃបេះដូងរបស់គាត់ (ឆលី) ព្រោះអាចនិយាយចុងក្រោយថា នេះមិនច្រើនចំពោះគេអ្នកមានសមត្ថភាព តែវាច្រើនសម្រាប់ខ្ញុំ នៅពេលចំណែករបស់បងប្អូនតាំងអស់គ្នាម្នាក់ឡើងដល់ដប់អ្នក ពីដប់ឡើងដល់ ១ពាន់ ១ម៉ឺន … ខ្ញុំគិតថា នេះហើយទឹកចិត្តមហាជនដល់ធំធេងមួយសម្រាប់ ឆលី ក្នុងការផ្តើមជីវិតថ្មីរបស់គាត់ក្នុងការព្យាបាលជំងឺមហារីកនេះ»។
ជាឪពុករបស់កូនប្រុសកំពុងតស៊ូនឹងជម្ងឺមហារីកដុំសាច់ក្នុងខួរក្បាល កម្រិតធ្ងន់ធ្ងរ លោក ព្រហ្ម ពន្លឺ គ្មានអ្វីក្រៅពីម្រាមដៃដប់សំពះអរគុណទៅកាន់សប្បុរសជនទាំងអស់ដែលបានចូលរួមបរិច្ចាគថវិកាសម្រួលបន្ទុកការព្យាបាលរបស់ ឆលី ហើយក៏សូមថ្លែងអំណរគុណដល់សិល្បកររួមអាជីពដែលមានបេះដូងចង់ជួយដល់ក្មេងដែលកំពុងដង្ហើយត្រូវការជំនួយ។ ទឹកចិត្តរបស់សប្បុរធម៌ និងសិល្បករពិតជាមានតម្លៃធំធេងណាស់សម្រាប់ ឆលី ដើម្បីព្យាបាលខ្លួនពីជំងឺដ៏កាចសាហាវនេះ។
ឆ្លៀតឱកាសនេះ លោក ប្រាក់ សំណាង និងលោក ព្រហ្ម ពន្លឺ សូមថ្លែងអំណរគុណយ៉ាងជ្រាលជ្រៅដល់ ឯកឧត្ដម អ៊ន សុទ្ធីរ័ត្ន និង លោកជំទាវ លីម ម៉ូលីហ្សា ដែលលោកទាំងពីរជាអ្នកឧបត្ថម្ភគាំទ្រធំដល់ចលនា «រួមគ្នាបង្កើតពន្លឺថ្មីសម្រាប់ជីវិតរបស់ ឆលី – Save Charlie’s Life Together» រួមទាំងដៃគូសហការឧបត្ថម្ភផ្សេងៗជាច្រើនទៀត។ ក្រៅពីវត្តមានភ្ញៀវកិត្តិយស កម្មវិធីសប្បុរធម៌ដ៏ធំនេះក៏មានការចូលរួមពី បវរកញ្ញា-បុរសឯក រួមទាំងបវរកញ្ញាភេទ៣ យ៉ាងច្រើនកុះករទៀតផង។
សូមជម្រាបថា ព្រឹត្តិការណ៍ដេញថ្លៃសិល្បៈគំនូរ និងសម្លៀកបំពាក់ច្នៃថ្មីដោយ designer ចោម មួយ នឹងរៀបចំឡើងនៅថ្ងៃទី១៩ ខែឧសភា ឆ្នាំ ២០២៤ ខាងមុខនេះនៅទីតាំង Factory Phnom Penh ចាប់ពីម៉ោង ៥ ល្ងាចតទៅ។ លោកអ្នកអាចទំនាក់ទំនងទិញសំបុត្រតាមលេខទូរស័ព្ទ 087 993 398 និង ០10 448 926 ដោយសំបុត្រមានតំម្លៃ ១៥ ដុល្លារសម្រាប់ VIP សំបុត្រពិសេសតម្លៃ ៨ ដុល្លារ និងសំបុត្រធម្មតាតម្លៃ ៥ ដុល្លារ៕
Account
Security
Favourite Content