ថ្មីៗនេះមានការរាយការណ៍ថាអ្នកផ្ដល់ភស្ដុតាងជាសារសំឡេងរបស់តារាប្រុស Kim Soo Hyun និង Kim Sae Ron ត្រូវបានគេវាយប្រហារឱ្យមានរបួសធ្ងន់ធ្ងរយ៉ាងខ្លាំងនៅលើទឹកដីសហរដ្ឋអាមេរិក។
យោងតាមស្ថានអគ្គកុងស៊ុលកូរ៉េនៅទីក្រុងញូវយ៉កបានចេញមកបញ្ជាក់ថាថ្មីៗនេះមិនមានការចាប់ខ្លួនជនជាតិកូរ៉េនៅក្នុងដែលសមត្ថកិច្ចរបស់ពួកគេលើករណីការប៉ុនប៉ងមនុស្សឃាត ឬឧក្រិដ្ឋកម្មណាមួយប្រឆាំងនឹងជនជាតិកូរ៉េរស់នៅក្រៅប្រទេសឡើយ។ ផ្អែកតាមមាត្រា ៣៦ នៃអនុសញ្ញាទីក្រុង Vienna ស្ដីពីទំនាក់ទំនងកុងស៊ុល ការអនុវត្តច្បាប់ក្នុងតំបន់ត្រូវតែជូនដំណឹងដល់ស្ថានកុងស៊ុលរបស់ប្រទេសដែលពាក់ព័ន្ធនៅពេលជនជាតិកូរ៉េណាម្នាក់ត្រូវបានចាប់ខ្លួន ឬឃុំខ្លួន។ យ៉ាងណាមិញ មកដល់ពេលនេះ ស្ថានកុលស៊ុលនៅមិនទាន់ទទួលបានការជូនដំណឹងណាមួយទាក់ទងទៅនឹងករណីពីមន្រ្តីអនុវត្តច្បាប់នៅឡើយទេ។

ហេតុការណ៍មួយនេះមិនត្រូវបានរាយការណ៍ទៅភ្នាក់ងារស៊ើបអង្កេតក្នុងតំបន់នោះទេ ប៉ុន្តែត្រូវបានរុញទៅកាន់ភ្នាក់ងារ FBI តែម្ដង។ ទាក់ទងនឹងការអះអាងថា FBI កំពុងសើបអង្កេតការករណីវាយប្រហារលើអ្នកផ្ដល់ភស្ដុតាងសារសំឡេង ស្ថានអគ្គកុងស៊ុលក៏បានថ្លែងថា៖ នេះជាព័ត៌មានដែលភ្នាក់ងាររបស់យើងមិនមាន ឬស្ថិតក្នុងគ្រប់គ្រងឡើយ។ ការចេញមុខមកបញ្ជាក់ច្បាស់ៗបែបនេះបានធ្វើឱ្យអ្នកលេងអ៊ីនធឺណេតភាគច្រើនយល់ស្របថាការអះអាងមួយនេះហាក់ដូចជាការរៀបចំទុកជាមុនតាំងពីដើមមក។
គួររំឮកផងដែរថាកាលពីថ្ងៃទី៧ ខែឧសភា មេធាវីរបស់គ្រួសារ Kim Sae Ron បានធ្វើសន្និសីទសារព័ត៌មាននៅទីក្រុងសេអ៊ូល ហើយក៏បានចែករំលែកនូវសារសំឡេងរបស់តារាស្រី Kim Sae Ron ពាក់ព័ន្ធនឹងតារាប្រុស Kim Soo Hyun ផងដែរ។ នៅក្នុងនោះ Kim Sae Ron បានសារភាពថានាងពិតជាបានមានទំនាក់ទំនងផ្លូវភេទជាមួយនឹង Kim Soo Hyun នៅពេលនាងកំពុងរៀននៅថ្នាក់ទី ៨ ពិតមែន។ នាងក៏បានលើកឡើងដែរថាតារាប្រុសរូបនេះថែមទាំងបានផ្ញើរូបភាពរបស់លោកកំពុងដេកជាមួយអាយដលម្នាក់មកឱ្យនាងមើលថែមទៀតផង។


យោងតាមការចុះផ្សាយរបស់គេហទំព័រ Koreaboo បានឱ្យដឹងថាគណនី Garo Sero អះអាងថាមានអ្នកផ្ដល់ភស្ដុតាងសារសំឡេងម្នាក់រស់នៅរដ្ឋ New Jersey បានថតសំឡេងដែលមានរយៈពេលប្រហែល ១ ម៉ោងនិង ៣០ នាទីដោយមានការព្រមព្រៀងពី Kim Sae Ron លាតត្រដាងពីមនុស្សដែលបានធ្វើទារុណកម្មលើតារាស្រី Kim Sae Ron ដោយក្នុងនោះក៏មាន Kim Soo Hyun, Youtuber និងអ្នកសារព័ត៌មានផងដែរ។ ជាអកុសលនៅថ្ងៃទី១ ខែឧសភា អ្នកផ្ដល់ភស្ដុតាងសារសំឡេងម្នាក់នោះត្រូវបានវាយប្រហារដោយមនុស្ស ២ នាក់មកដែលជាជនជាតិកូរ៉េ និងចិន។ Garo Sero ថែមទាំងបានអះអាងទៀតថាករណីនេះត្រូវបាន FBI ស៊ើបអង្កេតដោយផ្ទាល់ ហើយជនរងគ្រោះត្រូវបានវាយតម្លៃថានឹងត្រូវពិការដោយសារតែផ្នែកធំនៃសរសៃប្រសាទលើដៃរបស់គេបានដាច់រហែក ថែមទាំងត្រូវបានគេចាក់លើ ក ចំនួន ៩ ដងផ្ទួនៗទៀតផង។
ចំពោះការធ្វើសនិ្នសីទសារព័ត៌មាននេះឡើងគឺធ្វើឡើងទៅតាមការស្នើសុំរបស់សមាជិកគ្រួសារជនរងគ្រោះដែលបានស្នើសុំឱ្យបញ្ចេញព័ត៌មានមួយចំនួន ក្រោយបារម្ភថាអាចនឹងមានឧប្បត្តិហេតុអកុសលណាមួយកើតឡើង។ Garo Sero បានបញ្ជាក់ថានេះគឺជាករណីឃាតកម្មយ៉ាងច្បាស់ដែលឧក្រិដ្ឋកម្មបានកើតឡើងនៅថ្ងៃទី៣០ ខែមេសា ដោយជនជាតិកូរ៉េ និងចិនដែលជាឧក្រិដ្ឋករបានទៅដល់ទឹកដីសហរដ្ឋអាមេរិក ៥ ថ្ងៃមុនពេលធ្វើសកម្មភាពដែលវាជាករណីឧក្រិដ្ឋកម្ម និងឃាតកម្មដែលបានគ្រោងទុក៕























Account
Security
Favourite Content