តារាចម្រៀងនិងសម្ដែងចិន Huang Zitao ឬអ្នកគាំទ្រខេប៉ុបធ្លាប់ស្គាល់ថា Tao អតីតសមាជិកក្រុម EXO បានបំពេញការសន្យារបស់ខ្លួនក្នុងការផ្តល់អំណោយរថយន្តអគ្គិសនីចំនួន ៣០ គ្រឿងដល់អ្នកគាំទ្របន្ទាប់ពីគណនី Weibo របស់លោកមានអ្នក Follow លើស ១៥ លាននាក់។
យោងតាមសារព័ត៌មានចិន QQ បានរាយការណ៍កាលពីថ្មីៗនេះថា តារាប្រុសត្រកូល Huang រូបនេះបានបង្ហាញថារថយន្តនីមួយៗមានតម្លៃ ១២៣ ៨០០ យន់ (១៦ ៨៨០ ដុល្លារ) ។ ក្នុងចំណោមរថយន្តទាំង ៣០ នោះ រថយន្ត ១០ គ្រឿងត្រូវបានបរិច្ចាគទៅមូលនិធិស្ត្រី និងកុមារនៅខេត្ត Zhejiang ខណៈ ២០ គ្រឿងទៀតត្រូវបានចែកដល់អ្នកគាំទ្រតាមរយៈការជ្រើសរើសដោយចៃដន្យក្នុងកំលុងពេល live របស់លោក។
ទោះយ៉ាងណា Huang Zitao ក៏បានបញ្ជាក់ដែរថា រថយន្តចំនួន ១៥ គ្រឿងត្រូវបានឧបត្ថម្ភដោយម៉ាកយីហោដែលលោកបានសហការ ខណៈដែល ១៥ គ្រឿងទៀតគឺជាការចំណាយផ្ទាល់ខ្លួនរបស់លោក។
ឆ្លើយតបនឹងការរិះគន់ពីអ្នកគាំទ្រមួយចំនួនដែលបានសម្ដែងការខកចិត្តដែលរថយន្តទាំងនោះមិនមែនជារថយន្តប្រណីត Huang Zitao បាននិយាយថា “វាមិនអីទេ ប្រសិនបើអ្នកមិនចង់បានវា នៅមានមនុស្សជាច្រើនដែលចង់បាន។ នេះគឺជាកាដូចេញពីចិត្តខ្ញុំទាំងស្រុង” ។
បកត្រលប់ថយក្រោយវិញ ក្នុងកំលុងពេល Live នៅលើ Weibo កាលពីថ្ងៃទី ២៤ ខែធ្នូ ឆ្នាំ ២០២៤ Huang Zitao បានសន្យាថានឹងផ្តល់អំណោយជារថយន្តក្នុងស្រុកចំនួន ១០ គ្រឿង ប្រសិនបើអ្នកតាមដានគណនីរបស់លោកឈានដល់ចំនួន ១៥ លាននាក់។ បន្ទាប់ពីការប្រកាសនេះ ចំនួនអ្នកតាមដានរបស់លោកបានកើនឡើងយ៉ាងឆាប់រហ័ស រហូតដល់លើស ៤០ លាននាក់។ តារាប្រុសរូបនេះបានចែករំលែកថា៖ “គំនិតនេះ ខ្ញុំនឹកឃើញដោយចៃដន្យ ប៉ុន្តែខ្ញុំមិនដែលនឹកស្មានថាទទួលបានការចាប់អារម្មណ៍ និងការសាទរដ៏លើសលប់ពីអ្នករាល់គ្នាឡើយ”។
បច្ចុប្បន្នអាយុ ៣២ឆ្នាំ Huang Zitao ឆ្នាំបានបង្ហាញខ្លួនជាលើកដំបូងក្នុងនាមជាសមាជិកក្រុមខេប៉ុប EXO របស់ SM Entertainment ក្នុងឆ្នាំ ២០១២ ប៉ុន្តែបានចាកចេញពីក្រុមនៅឆ្នាំ ២០១៥ ដោយលើកឡើងពីហេតុផលសុខភាព ហើយក៏បានវិលត្រលប់ទៅប្រទេសចិនវិញ។
កាសែត South China Morning Post បានរាយការណ៍ថា Zitao បានទទួលមរតកទ្រព្យសម្បត្តិប្រមាណ ៣ ពាន់លានដុល្លារ បន្ទាប់ពីឪពុករបស់លោក Huang Zhongdong បានទទួលមរណភាពកាលពីឆ្នាំ២០២០៕