តារាសម្ដែងស្រីហូលីវូដ Emma Stone បានទាក់ទាញចិត្តសាធារណជន នៅពេលដែលនាងបង្ហាញវត្តមានជាមួយនឹងម៉ូដសក់ថ្មី នៅក្នុងកម្មវិធី Golden Globes ដោយបង្ហើបថានាងធ្វើនេះគឺដើម្បីឱ្យមានរូបសម្រស់ត្រូវទៅនឹងតួអង្គក្នុងខ្សែរភាពយន្តថ្មី។
ដ្បិតមិនបានបញ្ជាក់ថា ស្នាដៃថ្មីនេះមានចំណងជើងអ្វីក៏ដោយ ក៏ប៉ុន្តែតារាស្រីវ័យ៣៦ឆ្នាំបានរៀបរាប់ថា នេះជាការកាត់សក់ដែលខ្លីបំផុតនៅក្នុងជីវិតនាង ក្នុងទម្រង់សក់ដែលមានឈ្មោះថា Pixie Cut។ ម៉ូដសក់ខ្លីដូចបុរសនេះ ជាស្នាដៃរបស់ជាងប្រចាំខ្លួនឈ្មោះ Mara Roszak ដោយនាងបានបង្ហាញថាម៉ូដនេះគឺទទួលបានការបំផុសគំនិតចេញពីម៉ូដសក់របស់តារាជើងចាស់ Winona Ryder និង Liv Tyler ក្នុងចន្លោះទស្សវត្សរ៍ឆ្នាំ ១៩៩០ ដែលកំពុងតែទទួលបានការពេញនិយមជាថ្មីនៅពេលក្រោយៗនេះ។
ជាក់ស្ដែង ជាងកាត់សក់រូបដដែលក៏បានលើកឡើងដែរថា ការងារនេះមិនមែនជារឿងស្រួលប៉ុន្មានទេ ព្រោះបើខុសតែបន្តិចម៉ូដសក់ជារួមនឹងចេញជារូបរាងផ្សេងតែម្ដង។ ដូច្នេះ ទើបនាងកាត់តម្រឹមម្ដងបន្តិចៗទម្រាំតែចេញជាលទ្ធផលសម្រេច។ ដោយឡែកសម្រាប់ពណ៌សក់វិញ Tracey Cuuningham ជាអ្នកលាបឱ្យ Emma Stone ដោយប្រើប្រាស់ពណ៌ត្នោតបែកក្រហមឈ្មោះ Nutmeg ដែលដិតជាងពណ៌សក់ធម្មជាតិរបស់តារាស្រីរូបនេះ។
មានពាក្យចចាមអារ៉ាមបានលើកឡើងថា ម៉ូដសក់នេះអាចធ្វើឡើងដើម្បីថតរឿង Bugonia ដែលគ្រោងនឹងចាក់បញ្ចាំងនៅក្នុងឆ្នាំ២០២៥នេះ។ ក្នុងករណីថា ព័ត៌មាននេះជាការពិត Bugonia ជាភាពយន្តទី៤ដែល Emma Stone បានធ្វើការរួមគ្នាជាមួយនឹងអ្នកដឹកនាំរឿងលោក Yorgos Lanthimos បន្ទាប់ពីរឿង The Favorite, Poor Things និង Kinds of Kindness៕