តារាសម្ដែងប្រុស Park Jeong Min បានចេញមុខសរសើរដៃគូសម្ដែង នាង Kim Jisoo ជាថ្មីម្ដងទៀត ដោយរំឭកពីហេតុការណ៍ដែលខ្លួនបានរួមការងារជាមួយគ្នាជាលើកដំបូង តាំងតែពីមុនសម្ដែងក្នុងរឿង Newtopia ទៅទៀត។
នៅដើមឆ្នាំ២០២៥នេះ តារាសម្ដែងកូរ៉េខាងត្បូងមួយគូនេះកំពុងតែមមាញឹកក្នុងការផ្សព្វផ្សាយភាពយន្តថ្មីរបស់ខ្លួន រឿង Newtopia ដោយបានបង្ហាញវត្តមាននៅលើវីដេអូ និងកម្មវិធីផ្សេងៗ។ ជាក់ស្ដែង កាលពីថ្ងៃទី១២ ខែមករាកន្លងទៅ អ្នកទាំងពីរក៏ទើបតែបានចូលរួមនៅក្នុងវីដេអូសម្ភាសន៍របស់សារព័ត៌មានរបស់ប្រទេសហ្វីលីពីន ABS-CBN News ផងដែរ។
នៅពេលដែលសួរពីអារម្មណ៍នៅពេលដែលជួបគ្នាជាលើកដំបូង តារាស្រីវ័យ ៣០ឆ្នាំរៀបរាប់ថា៖ “ពួកយើងជួបគ្នាលើកទី១ នៅពេលដែលខ្ញុំបានចូលរួមសម្ដែងជាតារាកិត្តិយសនៅក្នុងគម្រោងភាពយន្តមួយ ហើយពេលហ្នឹងខ្ញុំកំពុងតែធ្វើកម្មវិធីប្រគំតន្ត្រីទេសចរណ៍ ក៏ខ្ញុំមិនសូវប្រាកដចិត្តថា គួរទទួលការងារនេះឬអត់? តែពេលដែលឮឈ្មោះ Park Jeong Min ខ្ញុំក៏ស្រាប់តែរំភើបដែលបានរួមការងារជាមួយគាត់”។
សមាជិកក្រុម BLACKPINK រូបនេះបានរៀបរាប់បន្ថែមពីមូលហេតុដែលនាងព្រមទទួលសម្ដែងនៅក្នុងការងារគ្រានោះ ក៏ដូចជាក្នុងរឿង Newtopia ថា៖ “នៅពេលដែលទទួលការងារកាលនោះ ខ្ញុំទទួលព្រោះដឹងថានឹងបាននៅក្នុងរឿង និងបានមើលការសម្ដែងរបស់គាត់បែបជិតៗពិតៗ ហើយខ្ញុំក៏គិតដែរថា ជាហេតុផលតែមួយដែលខ្ញុំសម្រេចចិត្តសម្ដែងនៅក្នុងរឿងមួយនេះ”។
ចំណែកពីសំណាក់តារាប្រុសវ័យ ៣៧ឆ្នាំបានឆ្លើយតបនឹងសំណួរដដែលថា៖ “ខ្ញុំដឹងមកតាំងពីយូរដែលហើយថា Jisoo ជាមនុស្សពូកែ និងខិតខំធ្វើការតាំងតែពីមុនយើងបានរួមការងារជាមួយគ្នា។ ដូចដែលគាត់ប្រាប់អ៊ីចឹង យើងជួបគ្នាជាលើកដំបូងនៅក្នុងភាពយន្តរឿង Dr. Cheon and he Lost Talisman”។
Park Jeong Min បានរៀបរាប់ពីអារម្មណ៍ដែលខ្លួនមិនដែលប្រទះ នៅពេលសម្ដែងក្នុងភាគយន្តមួយនោះថា៖ “នៅពេលដែលយើងថតឈុតឆាកនៅក្នុងរឿងនោះ ខ្ញុំបានឃើញអ្វីមួយដ៏អស្ចារ្យបានកើតឡើង ព្រោះនៅក្នុងពេល១០ឆ្នាំជាងដែលខ្ញុំជាតួសម្ដែង នេះជាលើកដំបូងដែលខ្ញុំបានឃើញក្រុមការងារគ្រប់រូបផ្ដុំគ្នាមកមើលស្គ្រីន monitor ពេលសម្ដែង។ វាដូចជាហេតុការណ៍វេទមន្តអ៊ីចឹង។ នៅពេលនោះ Jisoo បានសម្ដែងជាតួអង្គទេពធីតា ហើយអ្នកគ្រប់គ្នាដូចជាបានឃើញគាត់ជាទេពធីតាពិតៗអ៊ីចឹង។ ខ្ញុំក៏ភ្លឹកនឹងសម្រស់របស់ Jisoo ដូចគ្នា”។
នៅក្នុងវីដេអូតែមួយនេះ តួសម្ដែងល្បីឈ្មោះពីរឿង Smugglers, Start-Up និង Harbin បានបង្ហើបបន្ថែមថា ទំនាក់ទំនងរវាងរបស់លោក និងដៃគូសម្ដែងក៏កាន់តែមានភាពជិតស្និទ្នគ្នាជាងមុខផងដែរ ដោយមានពាក្យពេចន៍នៅលើហត្ថលេខាទាំង២ដែល Jisoo ឱ្យលោកជាភស្តុតាង។
ជាការពិត លោកបានលើកឡើងថា នៅក្នុងហត្ថលេខាទី១ Jisoo បានសរសេរថា៖ “អរគុណដល់សិស្សច្បង Park Jeong Min ដែលតែងតែជួយកន្លងមក” ស្របពេលដែលហត្ថលេខាទី២ នាងបែរជាសរសេរថា៖ “ខ្ញុំតាំងចិត្តរង់ចាំធ្វើការងារជាមួយនឹងបងប្រុស Jeong Min ទៀតណា៎” ដោយលោកបានប្រាប់ថា ពាក្យសម្ដីទាំងនេះគឺផ្សេងគ្នា អាចបញ្ចាក់ថាពួកគេកាន់តែជាក់ស្និទ្ធគ្នាជាងមុន និងធ្វើឱ្យលោកមានអារម្មណ៍សប្បាយចិត្តប្លែកៗផងដែរ។
គួររំឭកផងដែរ Newtopia ដែលគ្រោងនឹងចាក់បញ្ចាំងនៅថ្ងៃទី៧ ខែមករាខាងមុខនេះ ជារឿងរ៉ាវរបស់គូរស្នេហ៍មួយគូដែលសម្រេចចិត្តចែកផ្លូវគ្នា តែបែរជាពួកគេត្រូវមកប្រឈមមុខនឹងការរាតត្បាតរបស់ខ្មោច zombie ទៅវិញុ៕