បន្ទាប់ពីសម្ដែងក្នុងកម្មវិធី Crazy Horse កាលពីថ្មីៗ នេះ Lisa បានក្លាយជាប្រធានបទត្រូវគេពិភាក្សាពាសពេញបណ្ដាញសង្គម ដោយមានមតិសរសើរ និងមតិរិះគន់អមមកជាមួយគ្នាហូរហែរ។

យោងតាមប្រភពព័ត៌មាន Kbizoom បានឲ្យដឹងថា ការសម្ដែងរបស់នាងនៅឯ Crazy Horse ទទួលបានរិះគន់ខ្លាំងនៅឯប្រទេសចិន។ គណីផ្លូវការ Weibo របស់ Lisa ត្រូវបានគេរាយការណ៍ថាត្រូវបានលុបចេញនៅថ្ងៃទី ១ ខែ វិច្ឆិកា ឆ្នាំ ២០២៣ រីឯគណីក្រុមអ្នកគាំទ្រធំៗ របស់ Lisa នៅឯប្រទេសចិនក៏ត្រូវបានបិទជាបន្ដបន្ទាប់ដូចគ្នា ខណៈមហាជនសង្ស័យថារូបនាងកំពុងស្ថិតនៅក្នុងបញ្ជីខ្មៅរបស់ប្រទេសចិន និងមិនអាចបង្ហាញសកម្មភាពរបស់ខ្លួនក្នុងប្រទេសមួយនេះទៀតឡើយ។



អ្វីដែលធ្វើឲ្យមហាជនភ្ញាក់ផ្អើលសូម្បីតែប្រេនលំដាប់ពិភពលោក Bvlgari និង Celine ក៏បានលុបរូបភាពរបស់ Lisa មួយចំនួនចេញពីគណីអ៊ីនស្ដាក្រាម និងវេបសាយផ្លូវការផងដែរ។ សូម្បីតែនាយកប្រតិបត្ដិរបស់ប្រេន Bvlgari លោក Jean-Christophe Babin ក៏បានលុបរូបភាពរបស់លោកជាមួយ Lisa ចោលផងដែរ។ ចំណែកឯប្រេន Bvlgari និង Celine ដែលមានទីតាំងនៅប្រទេសចិនក៏បានលុប អត្ថបទ ឬរូបភាពដែលទាក់ទងជាមួយ Lisa ចេញទាំងអស់ដូចគ្នា។ ទង្វើអស់នេះ ធ្វើឲ្យមហាជនជឿថាអាចបណ្ដាលមកពីការសម្ដែងរបស់ Lisa នៅឯ Crazy Horse ដោយសារតែប្រទេសចិនក៏ជាទីផ្សាធំមួយរបស់ប្រេនទាំងពីរនេះផងដែរ។ តែទោះជាយ៉ាងណាក្ដីគេមិនទាន់ដឹងពីវាសនារបស់ Lisa ជាមួយប្រេនធំៗ ទាំងពីរនេះឡើយ ថាតើរូបនាងអាចនឹងត្រូវគេផ្ដាច់កុងត្រា ឬត្រឹមលុបរូបភាពដើម្បីឲ្យរឿងរ៉ាវស្ងប់ស្ងាត់សិន។




ចំពោះមូលហេតុដែលប្រជាជនចិនមានប្រតិកម្មខ្លាំងចំពោះការចូលរួមទស្សនាកម្មវិធី Crazy Horse ដោយសារតែច្បាប់មួយក្នុងចំណោមច្បាប់ផ្សេងទៀតក្នុងវិស័យសិល្បៈចិនគឺហាមឃាត់មិនឲ្យចូលរួមកម្មវិធី ឬបង្ហាញសកម្មភាពណាមួយគាំទ្រការផ្សព្វផ្សាយខ្លឹមសារអាសអាភាស។ ការសម្ដែងរបស់ Crazy Horse គឺមានរាប់បញ្ចូលនូវក្រុមអ្នករាំស្រីដែលអាក្រាតកាយ ខណៈការចូលក្លឹបទស្សនាការរាំអាក្រាតកាយក៏ជាអំពើខុសច្បាប់មួយក្នុងប្រទេសផងដែរ។ ដូច្នេះការសម្ដែងរបស់ Lisa នៅឯកម្មវិធី Crazy Horse ត្រូវបានគេចាត់ទុកជាគំរូមិនល្អសម្រាប់ក្មេងៗ ក្នុងប្រទេសចិន។

ក្រៅពី Lisa តារាស្រីលំដាប់ប្រទេសចិន Angelababy និង តារាស្រី Zhang Jiani ក៏កំពុងរងការរិះគន់ដូចព្យុះក្រោយអ្នកទាំងពីរត្រូវគេលើកឡើងថាបានទៅចូលរួមទស្សនាកម្មវិធី Crazy Horse និងត្រូវគេសង្ស័យថាកំពុងជាប់ក្នុងបញ្ជីខ្មៅដូចគ្នា៕























Account
Security
Favourite Content