ម្ចាស់ជយលាភី Man Of The Globe International 2022 លោក Kelven Fox បានវិលត្រឡប់ទៅរកការងារក្នុងវិស័យអាកាសចរណ៍វិញហើយ ក្រោយពីបើកឱ្យមានការហោះហើរពេញលេញដូចធម្មតាវិញ។ សព្វថ្ងៃលោកជាបាហុនិកា បម្រើការនៅក្រុមហ៊ុនអាកាសចរណ៍ Air Asia។


បុរសឯកពោរពេញដោយសមត្ថភាពទេពកោសល្យរូបនេះ បានប្រាប់ឱ្យដឹងថា ការដែលលោកបាត់មុខពីសិល្បៈមួយរយៈធំ ដោយសារតែជាប់រវល់ហ្វឹកហាត់ធ្វើជាបាហុនិកានៅប្រទេសថៃ ប៉ុន្តែពេលនេះលោករយាលដៃបន្តិចហើយ និងអាចត្រឡប់មកទទួលការងារសិល្បៈវិញបានខ្លះៗ។ អ្វីដែលលោកទទួលធ្វើបាននៅពេលនេះ គឺការងារពិធីករ ការថតស៉្បតពាណិជ្ជកម្ម តែមិនអាចទទួលថតភាពយន្តដូចមុននោះឡើយ ដោយហេតុថា មិនមានពេលគ្រប់គ្រាន់។
ថ្វីបើបុរសឯករូបនេះប្រកាសទទួលការងារសិល្បៈឡើងវិញ ប៉ុន្តែលោកគ្មានគម្រោង Comeback មកប្រកួត beauty pageant ម្តងទៀតនោះឡើយ ដោយសារជាប់រវល់ការងារហោះហើរច្រើន។ តែយ៉ាងណាលោកនៅតែស្រលាញ់វិស័យនេះខ្លាំង ហើយនឹងលៃលកពេលវេលាចូលរួមកម្មវិធីប្រកួតផ្សេងៗឱ្យច្រើនតាមដែលអាចធ្វើទៅបាន។


Kelven Fox មិនអាចបោះបង់ចោលមួយណាបានឡើយរវាងការងារជាបាហុនិកា និងការងារសិល្បៈ ព្រោះទាំងពីរផ្នែកសុទ្ធសឹងជាអ្វីការងារក្នុងស្រមៃរបស់លោកតាំងពីក្មេងមក។ ដូច្នេះ លោកសុខចិត្តហត់ខ្លួនឯង ដើម្បីបំពេញការងារទាំងពីរនេះក្នុងពេលតែមួយ គ្រាន់តែលោកផ្តល់អទិភាពដល់ការងារបាហុនិកាច្រើនជាងបន្តិចតែប៉ុណ្ណោះ។
បន្ថែមពីលើការងារជាបាហុនិកា កំលោះសង្ហា Kelven Fox និងក្រុមការងារ តែងតែបង្កើតវីដេអូសប្បាយៗបង្ហាញពីក្បាច់រាំ និងការ Challenge ផ្សេងៗតាមទំនោរ (trend) នាពេលបច្ចុប្បន្នផងដែរ។ បុរសឯករូបនេះ ពេញចិត្តស្តុកជាមួយការបង្កើត Content វីដេអូសប្បាយៗបង្ហោះលើបណ្តាញសង្គមហ្វេបស៊ុក និង Tik Tok ព្រោះវាបានផ្សារភ្ជាប់រវាងការងារសិល្បៈ និងការងារអាកាសចរណ៍ ហើយរឹតតែពិសេសនោះគឺលោកនៅតែអាចរក្សាប្រជាប្រិយភាពរបស់ខ្លួនដដែល ថែមទាំងមានសកម្មភាពថ្មីៗសម្រាប់ update ជាមួយហ្វេនៗថែមទៀតផង។


ឆ្លៀតឱកាសនេះ Man Of The Globe International 2022 សូមអរគុណទៅកាន់អ្នកគាំទ្រទាំងអស់ដែលស្រលាញ់ចូលចិត្តលោក និងតែងតែសួរនាំអំពីលោកគ្រប់ពេលវេលា។ ហើយលោកផ្ទាល់ក៏សូមលើកទឹកចិត្តដល់ប្អូនៗជំនាន់ក្រោយដែលមានក្តីស្រមៃចង់ក្លាយជាបាហុនិកា ឬចង់ប្រកួតកម្មវិធី beauty pageant ឱ្យក្លាហានឈោងចាប់ក្តីស្រមៃរបស់ខ្លួនឯង ទោះបីត្រូវជួបផលលំបាកច្រើនតែលោកជឿជាក់ថា ដរាបណាមានការព្យាយាមគ្មានអ្វីដែលយើងធ្វើពុំបានឡើយ៕

























Account
Security
Favourite Content