ជាតារាខេប៉ុបដ៏មានឥទ្ធិពលមួយរូប អ្វីក៏ដោយដែល Kim Taehyung ឬ V ក្រុម BTS ចាប់កាន់គឺសុទ្ធតែអាចប្រែទៅជាមាសជាប្រាក់ ហើយម៉ាកសម្លៀកបំពាក់ប្រណីត CELINE ក៏កំពុងទទួលបានផលចំណេញយ៉ាងក្រាស់ក្រែលដែរតាមរយៈការឱ្យ V ធ្វើជាទូតផ្សព្វផ្សាយម៉ាករបស់ខ្លួន។
ថ្មីៗនេះក្រុមហ៊ុន Lefty ដែលជាទីភ្នាក់ងារទីផ្សារ Influencer សម្រាប់ម៉ាកយីហោល្បីៗ បានបង្ហាញការវិភាគរបស់ខ្លួនអំពីឥទ្ធិពលរបស់ Taehyung ក្នុងនាមជា BA ថ្មីបំផុតសម្រាប់ម៉ាក CELINE ដោយបានវិភាគសកម្មភាព Instagram របស់ Taehyung ចាប់ពីថ្ងៃទី ១ ខែមីនា ឆ្នាំ ២០២៣ ដល់ថ្ងៃទី ៣១ ខែធ្នូ ឆ្នាំ ២០២៣ ហើយបានរាយការណ៍ថា Taehyung បានបង្កើតផលចំណេញផ្នែកផ្សព្វផ្សាយ (Earned Media Value) ដែលមានតម្លៃជាទឹកប្រាក់ ២៧៤ លានដុល្លារសម្រាប់ម៉ាក CELINE តាមរយៈការបង្ហោះ Post និង Stories តែ ៣១ ដងប៉ុណ្ណោះ។
Taehyung ត្រូវបានបង្ហាញជាផ្លូវការថាជាទូតផ្សព្វផ្សាយថ្មីរបស់ CELINE តាមរយៈទស្សនាវដ្ដី ELLE Korea នៅថ្ងៃទី ១៦ ខែមីនា ដែលក្រោយមក ELLE Korea ក៏បានចេញផ្សាយជាបន្តបន្ទាប់នូវសកម្មភាពថតរូប ការសម្ភាស និងវីដេអូផ្សេងៗ។ តារាចម្រៀងម្ចាស់បទ “Slow Dancing” បានធ្វើឱ្យអ្នកលេងអ៊ិនធឺណិតភ្ញាក់ផ្អើលជាមួយនឹងរូបរាងដ៏សង្ហា និងពោរពេញដោយមន្តស្នេហ៍របស់គេ ហើយទស្សនាវដ្ដី ELLE Korea បានដាក់រហស្សនាមឱ្យគេថាជា “genre destroyer” សម្រាប់សមត្ថភាពក្នុងការតម្រូវបានគ្រប់ប្រភេទ Styles និងប្រធានបទ។
ចាប់តាំងពីពេលនោះមក ឥទ្ធិពលរបស់ Taehyung សម្រាប់ CELINE គឺលេចធ្លោជាង BA ណាទាំងអស់ ហើយគ្រប់សកម្មភាពរបស់គេទាក់ទងនឹងម៉ាកនេះ បានក្លាយជាប្រធានបទពេញនិយមយ៉ាងខ្លាំងទាំងលើអ៊ីនធឺណិត និងនៅខាងក្រៅ។
សម្រាប់ម៉ាក CELINE តែមួយ V បានលេចមុខលើគម្របទស្សនាវដ្ដីចំនួន ៤ ដោយមានរូបក្របខុសៗគ្នាចំនួន ១២ ក្នុងរយៈពេលតិចជាងមួយឆ្នាំ។ គិតរួមទាំងម៉ាក និងគម្រោងផ្សេងទៀត Taehyung បានបង្ហាញខ្លួននៅលើ ទស្សនាវដ្ដី ៧ ច្បាប់ ដោយមានការថតក្រុបមុខខុសៗគ្នាសរុប ២៥ រូបក្នុងរយៈពេលជាងមួយឆ្នាំចាប់តាំងពី BTS បានឈប់សម្រាកសកម្មភាពក្រុមដើម្បីផ្តោតលើអាជីពទោលរបស់ពួកគេ។
កាលពីខែមុន ទីភ្នាក់ងារ Lefty ក៏បានដាក់ឈ្មោះ Taehyung ថាជាអ្នកមានឥទ្ធិពលក្នុងវិស័យម៉ូដលេខ ១ ផ្នែកបុរស ប្រចាំឆ្នាំ ២០២៣ និងលំដាប់ទី ៣ លើពិភពលោកបន្ទាប់ពី Kim Kardashian និង Jennie។ អ្វីដែលកាន់តែគួរឲ្យចាប់អារម្មណ៍នោះគឺក្នុងចំណោមអ្នកជាប់ចំណាត់ថ្នាក់កំពូលទាំង ១០ មានតែ V ប៉ុណ្ណោះដែលបានជាប់ដោយមិនបានចូលរួមព្រឹត្តិការណ៍ម៉ូដធំៗមួយណាឡើយក្នុងឆ្នាំ ២០២៣ ដែលបង្ហាញឱ្យឃើញកាន់តែច្បាស់ពីឥទ្ធិពលដ៏លើសលប់របស់គេ ៕