ក្រសួងការពារជាតិកូរ៉េខាងត្បូងបានច្រានចោលការចោទប្រកាន់ថាមានការផ្ដល់សិទ្ធិពិសេសចំពោះសមាជិក BTS V ក្នុងកំលុងពេលសមាជិក BTS រូបនេះបំពេញកាតព្វកិច្ចយោធា។
កាលពីថ្ងៃទី ២០ ខែវិច្ឆិកា ក្រសួងខាងលើបានឆ្លើយតបនឹងបណ្តឹងសាធារណជនដែលចោទសួរថាតើ V ដែលកំពុងបម្រើការក្នុងជួរកងទ័ព បានទទួលសិទ្ធិពិសេស រួមទាំងការប្រើប្រាស់ទូរស័ព្ទដោយគ្មានការអនុញ្ញាតនៅមជ្ឈមណ្ឌលហ្វឹកហ្វឺនកងទ័ពមែនដែរឬទេ។ ពាក្យបណ្តឹងក៏បានលើកឡើងពីការព្រួយបារម្ភថាតើឋានៈជាតារាល្បីរបស់ V បាននាំឱ្យមានការពេញចិត្តជាពិសេស ឬ ថ្នាក់លើរបស់លោកបានអនុញ្ញាតដោយចេតនានូវទង្វើល្មើសវិន័យបែបនេះ។

បញ្ហានេះបានក្លាយជាប្រធានបទចម្រូងចម្រាសបន្ទាប់ពី Min Hee Jin ដែលជាផលិតករ ADOR បានលើកឡើងអំពី V ក្នុងពេលបង្ហាញខ្លួននៅក្នុងកម្មវិធី School Music របស់ Kim Young Dae ។
ក្នុងពេលសម្ភាសន៍ ផលិតករ Min បានចែករំលែកថា មានម្ដងម្កាលដែល V បានទូរស័ព្ទមកនាងក្នុងពេលដែលរូបគេកំពុងបម្រើក្នុងជួរទាហាន និងបន្ថែមថា V ជាមនុស្សរួសរាយ និងចិត្តល្អម្នាក់។ ផលិតកររូបនេះបានបង្ហើបទៀតថា V បានផ្ញើសារខួបកំណើតឱ្យនាងតាំងពីព្រឹកព្រលឹម បន្ទាប់ពីរូបលោកបានចូលទាហានភ្លាមៗ។
បន្ទាប់ពីការសម្ភាសន៍នេះ អ្នកលេងអ៊ិនធឺណិតមួយចំនួនបានធ្វើការកត់សម្គាល់ថា V បានចុះឈ្មោះចូលទាហាននៅថ្ងៃទី ១១ ខែធ្នូ ហើយថ្ងៃកំណើតរបស់ Min Hee Jin ត្រូវនឹងថ្ងៃទី ១៦ ខែធ្នូ។ ពួកគេបានចោទសួរថាតើ V ដែលទើបតែបានចូលបម្រើការងាររយៈពេល ៥ ថ្ងៃប៉ុណ្ណោះអាចផ្ញើសារក្នុងកំលុងពេលព្រឹកព្រលឹមដោយរបៀបណា ដែលបង្កឱ្យមានការចោទប្រកាន់ពីការផ្ដល់សិទ្ធិពិសេសក្នុងជំរំយោធា។

យ៉ាងណាមិញនៅក្នុងសេចក្តីថ្លែងការណ៍ ក្រសួងការពារជាតិបានបំភ្លឺថា V បានប្រើទូរស័ព្ទរបស់លោកក្នុងកំលុងពេលម៉ោងកំណត់ដោយគោលការណ៍ទូទៅរបស់មជ្ឈមណ្ឌលហ្វឹកហាត់កងទ័ព។ សេចក្ដីថ្លែងការណ៍បានពន្យល់ថា មជ្ឈមណ្ឌលហ្វឹកហ្វឺនកងទ័ពអនុញ្ញាតឱ្យសិក្ខាកាមប្រើប្រាស់ទូរស័ព្ទរបស់ពួកគេរយៈពេលមួយម៉ោងនៅថ្ងៃចុងសប្តាហ៍ និងថ្ងៃបុណ្យឈប់សម្រាក។ ការប្រើប្រាស់ទូរស័ព្ទរបស់ V ត្រូវបានគេរាយការណ៍ថាបានកើតឡើងក្នុងកំលុងពេលដែលមានការអនុញ្ញាតនៅពេលរសៀល មិនមែនក្នុងពេលព្រឹកព្រលឹមនោះទេ។
ក្រសួងបានបញ្ជាក់បន្ថែមថា “គ្មានភស្តុតាងណាមួយដែលបង្ហាញថា V ទទួលបានការអនុញ្ញាតពិសេសក្នុងការប្រើទូរស័ព្ទក្រៅម៉ោងកំណត់ ឬភស្តុតាងបង្ហាញថាសកម្មភាពបែបនេះត្រូវបានលើកលែងទោសនោះទេ។ ព័ត៌មានលម្អិតអំពីពេលវេលាជាក់លាក់ វិធីសាស្ត្រ ឬខ្លឹមសារនៃការសន្ទនារបស់សិក្ខាកាមមិនអាចត្រូវបានបង្ហាញបានទេ ដោយសារច្បាប់ការពារព័ត៌មានផ្ទាល់ខ្លួន និងច្បាប់ការពារការសម្ងាត់ក្នុងទំនាក់ទំនង។
ការពន្យល់របស់ក្រសួងហាក់បានដោះស្រាយកង្វល់មហាជនរួចហើយ ទោះបីជាការជជែកវែកញែកនៅតែបន្តកើតមានក្នុងចំណោមអ្នកគាំទ្រ និងសាធារណជនក៏ដោយ ៕























Account
Security
Favourite Content