V សមាជិកក្រុមចម្រៀងកូរ៉េ BTS ឬឈ្មោះពិត Kim Tae Hyung បានទិញលំនៅដ្ឋានប្រណិតមួយនៅតំបន់ Cheongdam-dong សង្កាត់ Gangnam-gu ទីក្រុងសេអ៊ូល ក្នុងតម្លៃ ១៤.២ ពាន់លានដុល្លារ (ស្មើនឹងប្រហែល ១០.៣ លានដុល្លារ) ខណៈមានសេចក្ដីរាយការណ៍ថាបានបង់ប្រាក់រួច ១០០% ដោយមិនមានការប្រើប្រាស់ប្រាក់កម្ចីណាមួយឡើយ។

ផ្អែកតាមការចុះបញ្ជីអចលនទ្រព្យកាលពីថ្ងៃទី ២៤ ខែកញ្ញា V បានទិញលំនៅដ្ឋានមួយក្នុងអគារ PH129 (The Penthouse Cheongdam) ដោយជោគជ័យកាលពីថ្ងៃទី ១៧ ក្នុងខែនេះដែរ។ ទីធ្លាផ្តាច់មុខសម្រាប់អាផាតមិននេះមានទំហំសរុប 273.96 ㎡ ដោយរួមមានបន្ទប់គេង ៥ និងបន្ទប់ទឹក ៣។ របាយការណ៍មិនមានការកត់ត្រាពីការបញ្ចាំទ្រព្យផ្សេងដាច់ដោយឡែកឡើយ ដែលមានន័យថាតារាប្រុសរូបនេះបានស្នើទិញដោយបង់ជាសាច់ប្រាក់ ១០០%។
កិច្ចព្រមព្រៀងលក់ដំបូងត្រូវបានចុះហត្ថលេខាកាលពីដើមខែឧសភា ហើយមកដល់ថ្ងៃទី ១៧ ខែកញ្ញា ទឹកប្រាក់ដែលនៅសល់ត្រូវបានបង់បង្គ្រប់ ហើយការផ្ទេរកម្មសិទ្ធិក៏ត្រូវបានបញ្ចប់រួចរាល់។
សូមបញ្ជាក់ថាអគារ PH129 ត្រូវបានបញ្ចប់ការសាងសង់កាលពីខែសីហា ឆ្នាំ ២០២០ ខណៈមានជាន់ក្រោមដីចំនួន ៦ ជាន់ និង ២០ ជាន់ទៀតរាប់ពីជាន់ផ្ទាល់ ដែលមានអាផាតមិនសរុបចំនួន ២៩ យូនីត ហើយអាផាតមិននីមួយៗសាងសង់ក្នុងទម្រង់ពីរជាន់។ ដើមឡើយមានឈ្មោះថា “The Penthouse Cheongdam” ក្រោយមកអគារនេះត្រូវបានប្តូរឈ្មោះទៅជា “PH129” ដោយយោងទៅលើអាសយដ្ឋានរបស់វា (129 Cheongdam-dong)។
អគារនេះត្រូវបានគេដឹងថាជាបណ្ដុំលំនៅដ្ឋានរបស់តារាល្បីៗដូចជាតារាសម្ដែង Jang Dong gun និង Go So Young កីឡាករវាយកូនហ្គោល Park In Bi និងសាស្ត្រាចារ្យផ្នែកសម្ដែង Hyun Woo Jin ជាដើម ៕



























Account
Security
Favourite Content