ចាប់តាំងពីបង្ហាញមុខចុងក្រោយនៅក្នុងរឿង «Legend of the Demigods» របស់ TVB ក្នុងឆ្នាំ ២០០៨ មក តារាសម្ដែងប្រុសហុងកុង Benny Chan បានផ្ដោតទៅលើការសម្ដែងនៅប្រទេសចិន ហើយទីបំផុតលោក និងគ្រួសាររបស់លោកក៏បានសម្រេចចិត្តរស់នៅទីនោះតែម្ដង។ ក្រោយផ្លាស់ប្ដូរទីលំនៅ អាជីពការងាររបស់លោកក៏ហាក់ដូចជាមិនសមប្រកបខ្លាំងប៉ុន្មាននោះទេ ដែលធ្វើឱ្យលោកចាប់ផ្ដើមបាត់មុខពីវិស័យសិល្បៈម្ដងបន្ដិចៗ។

បន្ទាប់ពីខកខានបង្ហាញមុខអស់រយៈពេល ១៦ ឆ្នាំមក ពេលនេះតួ ស៊ុន អ៊ូខុង បានត្រលប់មកវិញជាមួយខ្សែភាពយន្ដភាគថ្មីបែបបុរាណដែលមានចំណងជើងថា «Justice Sung Begins» ដោយមានការចូលរួមសម្ដែងពីតារាប្រុសស្រីល្បីៗជាច្រើនដូចជា Vincent Wong, Elaine Yiu, Lam Chi Chung, Gabriel Harrison និងតារាសម្ដែងផ្សេងៗទៀតផងដែរ។

អំឡុងពេលផ្ដល់បទសម្ភាស Benny Chan បានឱ្យដឹងថាអ្នកដឹកនាំរឿង Lam Chi Chung និងផលិតករ Cheung Tat Ming បានផ្ដល់ឱកាសឱ្យលោកម្ដងទៀត ដើម្បីសម្ដែងរឿងថ្មី ដូច្នេះលោកសង្ឃឹមលោកនឹងធ្វើបានល្អ។ តួស្ដេចស្វារូបនេះក៏បានបន្ថែមទៀតថាលោកមិនខ្វល់ថាខ្លួនឯងថតនៅកន្លែងណានោះទេ បេះដូងលោកតែងតែនៅជាមួយ TVB ជានិច្ច។ ការថតជាមួយមិត្តរួមការងារចាស់ និងមិត្តរួមការងារថ្មីបានធ្វើឱ្យមានអារម្មណ៍ថានេះជាការជួបជុំដ៏ធំ ពោរពេញដោយភាពកក់ក្ដៅ និងភាពស្និទ្ធស្នាល។


គួរបញ្ជាក់ផងដែរថា «Justice Sung Begins» គឺជាខ្សែភាពយន្ដបែបបុរាណដែលនិយាយអំពើពុករលួយក្នុងសម័យរាជវង្សឈីង បានធ្វើឱ្យប្រជាជនជួបការលំបាក។ ដោយឃើញការលំបាក និងទុក្ខព្រួយដែលប្រជាជនបានជួបប្រទះ តួឯកប្រុសដែលសម្ដែងដោយ Vincent Wong ក្រោកឈរឡើងដើម្បីតតាំងស្វែករកយុត្តិធម៌មកវិញ៕
























Account
Security
Favourite Content