កាលពីថ្មីៗ នេះ ទំនាក់ទំនងស្នេហារបស់តារាស្រី Baifern និងតារាប្រុស Nine បានក្លាយជាប្រធានបទក្ដៅគគុកលើបណ្ដាញសង្គម ដោយសារតែម្ដាយរបស់តារាប្រុស Nine បានចុច Unfollow តារាប្រុសស្រីទាំងពីរលើបណ្ដាញសង្គមអ៊ីនស្ដាក្រាម។ ក្រោយឃើញដូច្នេះមហាជនជាច្រើនហាក់មានការសង្ស័យចំពោះស្នេហារបស់អ្នកទាំងពីរថាតើកំពុងមានបញ្ហាអ្វី ឬអាចឈានដល់ការបែកគ្នាទេ បើម្ដាយខាងប្រុសស្រាប់តែបង្ហាញកាយវិការបែបនេះ។ ចំណែកម្ដាយរបស់ Nine បានចេញបដិសេធថា ខ្លួនមិនបានមានជម្លោះឈ្លោះជាមួយកូនប្រុស និង Baifern ឡើយ តែមហាជនហាក់នៅមិនទាន់ជឿទាំងស្រុងឡើយ។


លុបចោលអស់ពាក្យចចាមអារ៉ាម និងការសង្ស័យរឿងស្នេហាប្រេះឆា តារាស្រី Baifern និងតារាប្រុស Nine បានបង្ហាញមុខរួមគ្នាក្នុងកម្មវិធី TrueTac។ អ្នកទាំងពីរនៅតែបង្ហាញពីភាពស្និទ្ធស្នាល និងផ្អែមល្ហែមនៅចំពោះមុខមហាជនជាច្រើន ថែមទាំងមើលទៅយកចិត្តទុកដាក់ខ្លាំងចំពោះគ្នាទៅវិញទៅមកទៀត។ សកម្មភាពរបស់អ្នកទាំងពីរធ្វើឱ្យអ្នកគាំទ្រហាក់ធូរចិត្តព្រោះទំនាក់ទំនងនៅតែល្អប្រសើរ មិនបានប្រេះឆាឡើយ ថែមទាំងមើលទៅកាន់តែយល់ចិត្ត និងផ្អែមល្ហែមលើសដើមថែមមួយកម្រិតទៀត។


គួរបញ្ជាក់ថា តារាស្រី Baifern និងតារាប្រុស Nine បានរាប់អានគ្នាអស់រយៈពេល ៤ ទៅ ៥ ហើយបន្ទាប់ពីថតរឿង “FriendZone” រួមគ្នា ក្រោយមកអ្នកទាំងពីរក៏ចាប់ផ្ដើមមើលចិត្ដថ្លើមគ្នា និងចាប់ផ្ដើមបង្ហាញពីទំនាក់ទំនងរបស់ខ្លួននៅចុងឆ្នាំ ២០២២ ថែមទាំងបង្ហោះរូបភាពស្និទ្ធស្នាលជាហូរហែរ។ រហូតដល់ខែ ឧសភា ឆ្នាំ ២០២៣ អ្នកទាំងពីរក៏បានបញ្ជាក់ប្រាប់អ្នកកាសែតច្បាស់ពីទំនាក់ទំនងរបស់ខ្លួនថា បច្ចុប្បន្នសេពគប់គ្នាជាសង្សារហើយ៕






























Account
Security
Favourite Content