សមាជិករបស់ 2NE1 ទាំងបួនរួមមាន CL, Minzy, Park Bom និង Sandara Park ត្រូវបានរាយការណ៍ថា នឹងត្រៀមខ្លួនជួបជាមួយផលិតកម្ម YG ក្នុងពេលឆាប់ៗ នេះ ខណៈត្រូវគេសង្ស័យថាពាក់ព័ន្ធនឹងគម្រោងបញ្ចេញបទចម្រៀងថ្មី។
យោងតាមប្រភពព័ត៌មានកូរ៉េ Osen សមាជិកទាំង ៤ របស់ក្រុមនារីជំនាន់ទី ២ ល្បី 2NE1 នឹងណាត់ជួបជាមួយលោក Yang Hyunsuk ជាអ្នកដឹកនាំធំម្នាក់ក្នុងផលិតកម្ម YG នៅប៉ុន្មានថ្ងៃខាងមុខនេះ។ ប្រភពព័ត៌មានដដែលបានឲ្យដឹងថា ការណាត់ជួបនេះទំនងជានិយាយពិភាក្សាអំពីការបញ្ចេញចម្រៀងថ្មីរបស់ក្រុម 2NE1។

ការបញ្ចេញចម្រៀងថ្មីទំនងជាការធ្វើពិសេសជាកាដូជូនដល់អ្នកគាំទ្រ សម្រាប់គម្រប់ខួបបញ្ចេញមុខជាផ្លូវការរបស់ 2NE1 រយៈពេល ១៥ ឆ្នាំ។ សម្រាប់គម្រប់ខួប ១៥ ឆ្នាំ របស់ក្រុម 2NE1 គឺនៅថ្ងៃទី ១៧ ខែ ឧសភា ឆ្នាំ ២០២៤ ខណៈថ្ងៃនោះ សមាជិកក្រុម 2NE1 បានបង្ហោះរូបភាពជុំគ្នាដែលធ្វើឲ្យអ្នកគាំទ្រជាច្រើនមានអារម្មណ៍រំភើបខ្លាំង។
មែនទែនទៅ កាលពីខែ ឧសភា ឆ្នាំ ២០២៤ កន្លងទៅ សមាជិកក្រុម 2NE1 គឺ CL ត្រូវបានរាយការណ៍ថា បានណាត់ជួបជាមួយលោក Yang HyunSuk ម្ដងរួចមកហើយ។

ថ្វីបើដំណឹងខាងលើមិនទាន់មានការបញ្ជាក់ផ្លូវការពីផលិតកម្ម YG និងសាមីខ្លួនផ្ទាល់សមាជិកទាំង ៤ ប៉ុន្ដែអ្នកគាំទ្រជាច្រើនបានបញ្ចេញមតិអបអរ និងរង់ចាំការត្រឡប់មកចេញបទចម្រៀងជាថ្មីម្ដងទៀតរបស់ក្រុម 2NE1។ គួរបញ្ជាក់ថា ក្រុមចម្រៀង 2NE1 ជាក្រុមចម្រៀងខេប៉ុបជំនាន់ទី ២ ដ៏ល្បីល្បាញ និងជោគជ័យខ្លាំងមួយ។ 2NE1 បានបង្ហាញមុខជាផ្លូវការក្នុងឆ្នាំ ២០០៩ និងប្រកាសរំសាយក្រុមក្នុងឆ្នាំ ២០១៦។ ទោះរំសាយក្រុមហើយក្ដីសមាជិកម្នាក់ៗ នៅតែមានភាពជិតស្និទ្ធ និងបន្ដទាក់ទងគ្នារហូតដល់បច្ចុប្បន្ន ៕
























Account
Security
Favourite Content