សិល្បករខ្មែរចំនួន ៩ រូបនឹងចេញដំណើរទៅកាន់ប្រទេសកូរ៉េខាងត្បូងនាពេលខាងមុខក្នុងគោលបំណងស្វែងរកជំនួយ ដើម្បីជួយដល់កងទ័ពជួរមុខដែលកំពុងឈរជើងការពារព្រំដែនកម្ពុជា។ នេះបើតាមការជូនដំណឹងលើផេកផ្លូវការលោក ឆឹម សក្កដា។

នាថ្ងៃទី ៥ ខែ តុលា ខាងមុខនេះសិល្បករខ្មែរចំនួន ៩ រូបនឹងចាកចេញពីមាតុប្រទេសទៅកាន់ប្រទេសកូរ៉េខាងត្បូងតាមរយៈមូលនិធិ សិល្បករទ្រទ្រង់វីរៈកងទ័ព ។ មូលនិធីត្រូវបានផ្ដួចផ្ដើមឡើងដោយសមាគមសិល្បករខ្មែរដោយមានលោកជំទាវអ្នកឧកញ៉ា ម៉ៅ ចំណាន ជាប្រធាន និងជាអ្នកដឹកនាំ។
កន្លងមកមូលនិធិដែលបង្កើតឡើង ដើម្បីកងទ័ពជួរមុខនេះតែងបានបង្កើតព្រឹត្តិការណ៍ជាហូរហែនៅតាមទីតាំងសំខាន់ៗទាំងក្នុងរាជធានីភ្នំពេញ និងតាមបណ្ដាខេត្តដោយមានការចូលរួមបរិច្ចាគជាទឹកប្រាក់របស់បងប្អូនជនរួមជាតិក៏ដូចជាភ្ញៀវទេសចរណ៍អន្តរជាតិបានមកលេង ព្រមទាំងស្នាក់នៅក្នុងប្រទេសកម្ពុជា។
ដោយឡែក សម្រាប់បេសកកម្មនាលើកនេះនឹងរៀបចំធ្វើនៅប្រទេសកូរ៉េដោយមានសិល្បករខ្មែរៗល្បីជាច្រើនរូបដូចជា បវរកញ្ញា កុយ អេនណា ដែលកញ្ញាគឺជាស្ត្រីខ្មែរដំបូងគេដែលបានបញ្ចប់បេសកកម្មដើរ ដើម្បីក្មេងៗនិងជនពិការនៅកម្ពុជាពីភ្នំពេញទៅកាន់ខេត្តសៀមរាប។ ក្រៅពីនេះក៏មានតារាចម្រៀង តារាសម្ដែង និងសិល្បករល្បីៗជាច្រើននាក់ទៀតផងដែរដូចជា ឆឹម សក្កដា, លឹម ជាឡាយ, ប៉ាច គីមមួយ-ស៊យ រតនៈ ជាដើម។
តាមរយៈមូលនិធិដែលនឹងគ្រោងរៀបចំនាពេលខាងមុខឆាប់ៗនៅក្នុងប្រទេសកូរ៉េខាងត្បូងសង្ឃឹមថាពុកម៉ែបងប្អូនក៏ដូចជាពលរដ្ឋដែលរស់នៅទីនោះចូលរួមជាថវិកាបន្តិចបន្តួចដើម្បីទ្រទ្រង់ដល់វីរៈកងទ័ពខ្មែរដែលបានលះបង់សាច់និងឈាមស្រស់ការពារបូរណភាពទឹកដីពីការឈ្លានពានរបស់កងទ័ពសៀម៕


រូបភាព ៖ សមាគមសិល្បករខ្មែរ























Account
Security
Favourite Content