នៅសល់រយៈពេលជាងមួយខែទៀត កម្មវិធីមហោស្រពល្ខោនយីកេទូទាំងប្រទេស ឆ្នាំ២០២៥ ក្រោមប្រធានបទ “គុណធម៌ និងកតញ្ញូ” នឹងខិតមកដល់ ហើយនៅថ្ងៃទី១០ ខែតុលានេះនាយកដ្ឋានសិល្បៈទស្សនីយភាព ក៏បានប្រកាសលទ្ធផលក្រុមល្ខោនយីកេចំនួន ៥ក្រុមដែលបានជាប់ទៅកាន់វគ្គផ្តាច់ព្រ័ត្រ។

យោងតាមសេចក្ដីប្រកាស ក្រុមដែលបានឈ្នះក្នុងវគ្គវីដេអូជម្រុះទាំង ៥ រួមមាន៖
១. ក្រុម រស្មីវិបុល ក្រុងដូនកែវ មកពីខេត្តតាកែវ
២. ក្រុម រស្មីអូរក្រសាន មកពីខេត្តកែប
៣. ក្រុម ខ្ញុំស្រលាញ់វប្បធម៌នៃ ស.ស.យ.ក ខេត្តកំពង់ស្ពឺ
៤. ក្រុម សិល្បៈយុវជន ជំនាន់ថ្មីចំបក់កោង មកពីខេត្តស្វាយរៀង
៥. ក្រុម សាមុត មកពីខេត្តបន្ទាយមានជ័យ។
កាលពីថ្ងៃទី៨ ខែតុលា ឆ្នាំ២០២៥ គណៈកម្មការមេប្រយោគ រួមមានឯកឧត្តមបណ្ឌិត គឹម ពីនន់ ឯកឧត្តម យន់ ខៀន សាស្ត្រាចារ្យ សេង សំអាន លោកស្រីសាស្ត្រាចារ្យ អ៊ុយ លតាវណ្ណ និងលោកសាស្ត្រាចារ្យ ចាន់ សារិន ព្រមទាំងក្រុមការងារនាយកដ្ឋានសិល្បៈទស្សនីយភាពនៃក្រសួងវប្បធម៌និងវិចិត្រសិល្បៈបានធ្វើការត្រួតពិនិត្យវីដេអូចូលរួមប្រកួតវគ្គវីដេអូជម្រុះ មហោស្រពល្ខោនយីកេទូទាំងប្រទេស ឆ្នាំ២០២៥ ក្រោមប្រធានបទ “គុណធម៌ និងកតញ្ញូ” ។ គណៈកម្មការមេប្រយោគ បានពិនិត្យវាយតម្លៃ និងដាក់ពិន្ទុលើវីដេអូសម្ដែងរបស់ក្រុមល្ខោនយីកេនីមួយៗ ដោយការយកចិត្តទុកដាក់ មានសុក្រិតភាព ធ្វើការជម្រុះ ចម្រាញ់យកក្រុមសិល្បៈឆ្នើមចំនួន៥ក្រុម ដើម្បីបន្តទៅកាន់វគ្គផ្ដាច់ព្រ័ត្រ។
សូមបញ្ជាក់ថា ការរៀបចំព្រឹត្តិការណ៍ “មហោស្រពល្ខោនយីកេទូទាំងប្រទេស ឆ្នាំ២០២៥” គឺក្នុងគោលបំណងដើម្បីចូលរួមថែរក្សា លើកស្ទួយ អភិរក្សវប្បធម៌ប្រពៃណីជាតិ អត្តសញ្ញាណជាតិ និងលើកកម្ពស់កិត្យានុភាពជាតិ ជាពិសេសលើកទឹកចិត្តដល់ សិល្បករ ល្ខោនយីកេឱ្យមានលទ្ធភាពចូលរួមក្នុងសកម្មភាពវប្បធម៌ព្រមទាំងបានបង្ហាញនូវសមត្ថភាព និង ទេពកោសល្យរបស់ខ្លួនដល់មហាជនឱ្យបានស្គាល់ ព្រមទាំងបានដឹងនូវតម្លៃសិល្បៈអរូបីមួយនេះ។ ដើម្បីចូលរួមអបអរសាទរមហោស្រពនេះដែរ ក្រសួងនឹងរៀបចំឱ្យសិល្បករ អង្គការ សមាគម សិល្បៈមហាជនទូទាំងប្រទេសដែលមានចំណេះជំនាញល្ខោនយីកេ បានចូលរួមប្រកួតប្រជែងក្នុងមហោស្រពដើម្បីស្វែងរកម្ចាស់ជ័យលាភីពានរង្វាន់ និងប្រាក់រង្វាន់លើកទឹកចិត្តជាច្រើន។
ព្រឹត្តិការណ៍វប្បធម៌ដ៏មានតម្លៃនេះ បានទទួលការសហការរៀបចំ និងផ្សព្វផ្សាយពីក្រុមហ៊ុន APSARA MEDIA SERVICES (AMS) ដោយមានគោលបំណងពង្រីកការផ្សព្វផ្សាយឲ្យទូលំទូលាយ និងឈានដល់គ្រប់ស្រទាប់មហាជន។
“មហោស្រពល្ខោនយីកេទូទាំងប្រទេស ឆ្នាំ២០២៥” វគ្គផ្តាច់ព្រ័ត្រនឹងប្រព្រឹត្តិទៅ នាថ្ងៃទី២០ ដល់ ២៣ ខែវិច្ឆិកា ឆ្នាំ២០២៥ នៅសាលសន្និសីទចតុម្មុខ និងមានការផ្សាយផ្ទាល់តាមហ្វេសប៊ុកផេកផ្លូវការរបស់ក្រសួងវប្បធម៌និងវិចិត្រសិល្បៈ និងផេកដៃគូសហការរៀបចំផងដែរ ៕



























































Account
Security
Favourite Content