បុរសជនជាតិចិនម្នាក់ ត្រកូល Li អាចរកចំណូលបានដល់ ២៧ម៉ឺនយន់ ឬ ៣៩ ០០០ដុល្លារអាមេរិកក្នុងពេលត្រឹម ២ឆ្នាំ តាមរយៈការបើកថ្នាក់បង្រៀនជិះកង់ មានកូនសិស្សជាង ៧០០នាក់ រាប់ចាប់ពីអាយុ ៤ឆ្នាំដល់ ៦៨ឆ្នាំ។ នេះបើផ្អែកតាមការចុះផ្សាយរបស់ South China Morning post នៅថ្ងៃទី១៧ ខែមករា។

ថ្មីៗនេះ អ្នកប្រើប្រាស់បណ្ដាញសង្គមចិនបានចាប់អារម្មណ៍ទៅលើថ្នាក់បង្រៀនជិះកង់របស់លោក Li និស្សិតថ្នាក់អនុបណ្ឌិត ឯកទេសអប់រំផ្នែកកីឡា ពីសាកលវិទ្យាល័យកីឡាសៀងហៃ (SUP) ខណៈលោកកំពុងមានទីផ្សារខ្លាំង។
លោកបានរំឭកថា កាលពីប៉ុន្មានឆ្នាំមុន លោកបានរកឃើញថា ការបង្រៀនជិះកង់គឺជាតម្រូវការមួយដែលកំពុងខ្វះខាត ទើបលោកសម្រេចចិត្តបង្កើតអាជីវកម្មនេះ។ បច្ចុប្បន្ន លោកបានបង្រៀនសិស្សចំនួន ៧០០នាក់រួចមកហើយ ភាគច្រើនមានអាយុ ២០ឆ្នាំ ដែលក្នុងនោះមានមនុស្សស្រីប្រមាណ ៧០ភាគរយ។
លោក Li ត្រូវធានាថា សិស្សរបស់គាត់នឹងអាចជិះកង់បាននៅពេលបញ្ចប់ការសិក្សា។ សម្រាប់មនុស្សធំ ជាទូទៅលោកត្រូវបង្រៀន ២ថ្នាក់ក្នុងមួយវគ្គ ដោយមួយថ្នាក់ៗមានរយៈពេលប្រមាណ ១ម៉ោង ៣០នាទី ទៅ ២ម៉ោង។ សម្រាប់កុមារវិញ ថ្នាក់សិក្សាអាចច្រើនជាងនេះ ដោយសាររយៈពេលក្នុងមួយថ្នាក់ខ្លីជាង ពោលគឺមិនលើសពី ១ម៉ោង ៣០នាទី ព្រោះកុមារងាយនឹងអស់កម្លាំងជាងមនុស្សពេញវ័យ។

លោក Li បានប្រាប់ថា ការបង្រៀនជិះកង់នេះក៏បាននាំនូវភាពអត់ធ្មត់ និងសមត្ថភាពក្នុងលើកទឹកចិត្តសិស្សដល់លោកផងដែរ។ លោកលើកតួយ៉ាងថា៖ “មនុស្សជាច្រើនមិនហ៊ានជិះកង់ ដោយសារតែផលប៉ះពាល់ផ្លូវចិត្តដែលបន្សល់ពីការដួលកង់កាលពីក្មេងៗរបស់ពួកគេ។ ដូច្នេះ ខ្ញុំបានជជែកលើកទឹកចិត្ត ដើម្បីជួយកាត់បន្ថយកង្វល់ទាំងនោះ”។
ដោយត្រៀមបញ្ចប់ការសិក្សាថ្នាក់អនុបណ្ឌិតនៅក្នុងខែមិថុនា លោកក៏មានគោលបំណងកែលម្អវិធីសាស្រ្តបង្រៀន និងពង្រីកទីផ្សាររបស់ខ្លួន មិនត្រឹមតែនៅសៀងហៃនោះទេ តែក៏ទៅកាន់ខេត្តជិតៗនោះ ដូចជា ខេត្ត Zhejiang និង Jiangsu ភាគខាងកើតប្រទេសចិនផងដែរ៕


























Account
Security
Favourite Content